"Монгол Контент" ХХК-иас эрхлэн гаргадаг GoGo.mn  сайт Олон улсын чанарын удирдлагын тогтолцоо ISO 9001 болон Хэвлэл мэдээллийн салбарын ISAS MEDIA 9001 стандартыг үйл ажиллагаандаа нэвтрүүллээ. Ингэснээр GoGo.mn хэвлэл мэдээллийн салбарт Олон улсын чанарын удирдлагын тогтолцоог хосоор нь баталгаажуулсан анхны редакц болов.

Стандарт баталгаажуулалтын аудитыг Холбооны Бүгд Найрамдах Герман Улсын Үндэсний итгэмжлэлийн байгууллага Deutsche Akkreditierungsstelle (DAkkS)-ийн ОХУ дахь итгэмжлэгдсэн түнш DQS Holding гүйцэтгэжээ.

2007 оноос хойш тасралтгүй 15 жил үйл ажиллагаа явуулж буй GoGo.mn сайтын хамт олон хэвлэл мэдээллийн байгууллагуудыг түүчээлэн ёс зүйн зарчмаа анх удаа уншигч, хэрэглэгчдэдээ нээлттэй зарлаж байв. Энэ удаад хэвлэл мэдээллийн салбарт зориулан боловсруулсан ISAS MEDIA 9001 Олон улсын стандартыг салбартаа анх удаа үйл ажиллагаандаа амжилттай нэвтрүүлснийг баталгаажуулалтын компаниас онцлов.

Олон улсын чанарын удирдлагын тогтолцоо ISO 9001 стандартыг хэрэгжүүлэх нь тухайн байгууллагын үйлдвэрлэл, үйлчилгээний чанар тасралтгүй сайжрах, үр ашиг, үнэлэмж нэмэгдэхэд  ач холбогдолтой. Харин ISAS MEDIA 9001 тогтолцоог нэвтрүүлснээр сэтгүүлчийн ажлын байрны журам, редакцын нийтлэлийн бодлого, мэдээ, сурвалжилга бэлтгэх үйл явц тогтсон нэг стандарттай болдог онцлогтой.

GoGo.mn сайтын ерөнхий редактор Р.Адъяасүрэн "Манай сайт тасралтгүй 15 жил үйл ажиллагаа явуулж нийгэм, улс төр, эрүүл мэнд, эдийн засаг гээд олон чиглэлээр иргэдийн мэдэх эрхийг хангах үндсэн үүргийн хүрээнд ажиллаж байна. Сүүлийн нэг жилийн хугацаанд сайтын хандалтын статистикийг харвал өдөртөө 500-750 мянга хүртэл хэрэглэгч цаг үе, үйл явдлын мэдээнээс гадна бидний хөндөж буй сэдвийн, манай онцлох контентуудыг уншиж, үзэж, сонсож байна. Бидний үүрэг бол эдгээр хэрэглэгчийг үнэн зөв, тэнцвэртэй мэдээллээр хангах юм.

Өнгөрсөн хугацаанд бид салбартаа түүчээлэгч байхыг хичээн ажиллаж ирсэн. Тэр утгаараа олон улсын чанарын тогтолцоог нэвтрүүлэх ажилд түүчээлэн, удирдлагын багийн зүгээс санал нэгдсэний үндсэн дээр энэ удаагийн баталгаажуулалтад орж, тэнцлээ.

Процесс тодорхой, эрсдэлийг тооцоолж, түүнийг даван туулах төлөвлөгөөтэй ажиллах нь тухайн байгууллагын үйл ажиллагаа тасралтгүй, тогтвортой өсөж, хэрэглэгчдэд үр өгөөжтэй байхын баталгаа гэж болно. Тэр дундаа хэвлэл мэдээллийн салбар хүнээс хамааралтай ялгаатай бүтээгдэхүүн үйлдвэрлэдэггүй байх нь хамгийн чухал.

Тодруулбал, хөрөнгө оруулагч хэн байх, тухайн цаг үед байгууллагыг, редакцыг хэн удирдаж байгаагаас мөн тухайн асуудлыг хэн гэдэг сэтгүүлч сурвалжилж байгаагаас үл хамаараад нийтэлж буй бүтээл нь тэнцвэртэй, хараат бус, олон нийтэд чиглэсэн байх ёстой. Хэвлэл мэдээллийн гэж тодотгоод буй ISAS MEDIA 9001 тогтолцоо үүнийг л хангахыг шаардаж байгаа юм.

Мөн редакцын бодлого байна уу, түүнийгээ баталсан уу, ажилтнууддаа таниулсан уу, өдөр тутмын үйл ажиллагаандаа ямар журам мөрддөг юм, эрсдэл үүсвэл түүнийг даван туулах төлөвлөгөө юу байна, уншигч хэрэглэгчийн санал хүсэлтийг хэрхэн хүлээн авч байна гээд өдөр тутмын үйл ажиллагаа тодорхой заавар журмын дагуу явагдаж буй эсэхийг баталгаажуулдаг стандарт гэж хэлж болно. Түүнчлэн хэрэглэгч буюу уншигчийн санал хүсэлт, эрэлтэд нийцүүлэн бүтээлээ гаргаж, түүндээ тусгаж байгаа эсэх ч чухлаар тавигдана. Энэ нь эргээд уншигч, үзэгчдэд үнэн бодит, тэнцвэрт мэдээллийг хүргэх үндсэн хөшүүрэг болж байгаагаараа онцлог" гэв.

GoGo.mn сайт нийтийг соён гэгээрүүлэх мэдээлэл түгээх, мэдээллийг олон талт эх сурвалжаар баяжуулан хүргэж хэрэглэгч, уншигчид өөрийн оюун бодлоор шүүн тунгаан, дүгнэх бодлого барьж ажилладаг. Цаашид чанарын баталгаатай бүтээгдэхүүн үйлдвэрлэхийн төлөө хичээн ажиллах болно.