Цахим сүлжээнд өчигдөр (2025.12.23) цэргийн албан хаагч бусдад зодуулж буй нөхцөл байдал бүхий бичлэг түгсэн.

Энэ асуудалтай холбогдуулан Дотоодын цэргийн штабын дарга, Бригадын генерал Р.Чингис, Дотоодын цэргийн 05 дугаар ангийн захирагч, Хурандаа Д.Манлайбаатар нар сэтгүүлчдэд мэдээлэл өглөө. 

Хурандаа Д.Манлайбаатар "Нэр бүхий иргэн, мэдээллийн сайтад өчигдөр 23:00 цагийн орчимд мэдээллийг нийтэлсэн. Бид цочирдсон. Ингээд ЦЕГ, Дотоодын цэргийн штабаас шаардлагатай арга хэмжээг авлаа. ХЭҮК-той хамтран ажиллаж байна. 

Мэдээллийг авсан даруй манай албан хаагчид дотоод хяналт, шалгалтыг эхлүүлсэн. Хугацаат цэргийн албан хаагчдын дунд дүрмийн бус харилцаа үүссэн гэх асуудлыг СХД-ийн цагдаагийн албан хаагчид мөрдөн шалгаж байгаа. Бичлэгт дүрс нь дурдагдсан албан хаагчийг шүүх эмнэлгийн байгууллагад үзүүллээ. Цэргүүдэд эрүүл мэндийн эрсдэл үүссэн эсэхийг тогтоолгохоор Төрийн тусгай албан хаагчдын эмнэлэгт үзлэгт хамруулсан. Ар гэрийнхэнтэй нь холбоо бариулах арга хэмжээ авч байна.

Дөрвөн иргэний дунд асуудал үүссэн, тэд бүгд нэг онд татагдсан цэргүүд, бүгд бага дарга нар.

Хүн бие засах, усанд орох зэрэг өрөөнд камер байршуулах нь хуулиар боломжгүй. Асуудал хугацаат цэргийн албан хаагчдын ахуйн хэрэглээний буюу хувцас сольдог, угаадаг өрөөнд болсон. Тэд 2025 оны нэгдүгээр ээлжээр төв орон нутгаас цэрэгт татагдсан иргэд. Дөрвөн иргэний дунд асуудал үүссэн, тэд бүгд нэг онд татагдсан цэргүүд, бүгд бага дарга нар. Цэргүүдийн биеийн байдал хэвийн, нарийн мэргэжлийн эмчид үзүүлэх шаардлагагүй гэсэн аман мэдээлэл, урьдчилсан дүгнэлтийг эмч нараас авсан. Асуудлыг ил гаргасан хэвлэл мэдээллийн байгууллагад талархал илэрхийлье, цаашид хамтран ажиллах боломжтой" гэлээ. 

Бригадын Генерал Р.Чингис "Цэргүүдийг зогсоодог асуудал бидэнд байхгүй. Олон аавын хүүхдүүдийг нэг жилийн албанд татахдаа эр хүн болоосой, эх орны хүү болоосой л гэж хүсдэг. Бид дүрмийн бус харилцааг Батлан хамгаалах байгууллага, Зэвсэгт хүчин, Дотоодын цэрэг гээд аль ч нэгжид хүлээн зөвшөөрдөггүйг та нар эхлээд ойлго. Номхон зогсоож байгаад цохих ёстой гэдэгт бид хариулах ямар ч боломжгүй. Асуудал хаана болсныг ангийн захирагч сая хэллээ. Камергүй, бид харах боломжгүй газарт, амрах командын дараа үүсжээ. 

Хүний эрх талаасаа камер байрлуулах боломжгүй "хар бүс" гэж байдаг юм. Бид цочирдсон, зураг авсан хүнд үнэхээр талархаж байна. Ийм мэдээлэл бидэнд хэрэгтэй байна. 

Гар хүлсэн нь бага түрүүч, нөгөөх нь түрүүч юм билээ. Тэд хоорондын харилцаанаас болж муудсан. Түүнээс цэргийн байгууллага хүн зовоодоггүй. Бид иргэд, хэвлэл бүгдтэй нь хамтарч ажилламаар байна. Цэргийн байгууллага хүнийг хөнөөдөг газар биш. Бид бүгд үр хүүхэдтэй, ар гэртэй. Бидэнд ч асуудал тулгарвал үр хүүхдийнхээ төлөө явах л болно. Цаашид хамтраад хууль эрхзүйн бодлогоо яаж сайжруулах вэ гэдэг талаас ажиллана. Бид энэ асуудлыг зүгээр орхихгүй" гэв.