Манай редакцад “Дорноговь аймгийн Даланжаргалан сумын нутагт БНХАУ-ын иргэд өөрийн улсын тугаа хатгасан. Очоод юу болоод байгааг асуухад манай газар, нутаг гэх агуулгатай хариу тайлбар хэлж байна” гэх мэдээллийг иргэнээс ирүүлэв.

Мэдээллийг тодруулахаар Дорноговь аймгийн Даланжаргалан сумын Иргэдийн төлөөлөгчдийн хурлын дарга Э.Сүхбаатартай холбогдлоо. Тэрбээр “Манай суманд ашигт малтмалын олборлолт, баяжуулалтын үйл ажиллагаа явуулах зөвшөөрөлтэй “Хас рич” ХХК-ийнхан өөрсдийн ашиглалтын лицензтэй газрынхаа заагийг тогтоох зорилгоор 4-5 газарт цэг хатгасан байсан. Тугийг өчигдөр (2025.08.28) орой 17:00 цагийн орчимд хатгажээ. Бид тэр даруйд нь очиж ажиллаад, тугийг тухайн өдрийн 19:00 цагийн орчимд буулгаж хураан авсан. Асуудлыг шалгуулахаар мэдээллийг Гадаадын иргэн харьяатын газар гэх мэтчилэн холбогдох байгууллагад уламжлаад байна.

Би өмнө нь хоёр удаа тухайн компанийн талбайд очиж шалгалтын ажиллагаа явуулж, энэ компанийн үйл ажиллагааг зогсоож, талбайг лацадсан байгаа. Мөн Гадаадын иргэн харьяатын албан хаагчид ирж ажиллаж байсан” гэдэг мэдээллийг өглөө.

Дэлгэрэнгүй мэдээллийг эргэн хүргэнэ.