Нийслэлд өнөөдөр усархаг бороо үргэлжлэн орно. Үүнтэй холбогдуулан нийслэлийн Онцгой байдлын газрын Шуурхай штабаас нөхцөл байдал, авч хэрэгжүүлж буй арга хэмжээний талаар мэдээлэл өглөө.

Цаг уурын байгууллагаас өнөөдөр 05:00-07:00, 14:00-16:00, 20:00-00:00 цагийн хооронд усархаг бороо орохыг мэдээлж, сэрэмжлүүлж байна. Мөн Улаанбаатар хотод 15:00 цагаас хойш усархаг аадар бороо орно, аюулт үзэгдлийн хэмжээнд хүрч болзошгүй гэдэг таамгийг мөн хүргүүлжээ. Иймд дүүргүүдийн шуурхай албад онцгойлон бэлтгэл ханган ажиллаж буй юм байна.  

Одоогоор БЗД, СБД-ийн авто замын уулзварт ус тогтсон гэх дуудлага мэдээлэл Улсын онцгой комиссын Шуурхай штабт ирсэн. Өөр үер, усны аюултай холбоотой дуудлага мэдээлэл ирээгүй байгааг НОБГ-ын Шуурхай штабаас мэдээллээ. 

Хотын дарга Х.Нямбаатар өнөөдөр үүсэж болзошгүй эрсдэлийг тооцоолон дүүргүүдийн шуурхай штаб, Засаг дарга нарт 8 үүрэг өгчээ. Тухайлбал, үер ус тогтож болзошгүй 95 цэгт бэлтгэл, бэлэн байдлыг хангах, В1 давхар зэрэг цахилгааны систем, авто зогсоол байрладаг хэсэгт хамгаалалтын далан үүсгэх зэрэг үүрэг өгсөн байна.

Мөн “Төрийн захиргаа, холбогдох мэргэжлийн байгууллагууд өнөөдөр уртасгасан цагаар ажиллана, тиймээс цагтаа тарна гэдэг асуудал байж болохгүй” гэдэг үүрэг, даалгаврыг УОК-ын дарга, Шадар сайд С.Амарсайхан өгчээ.

Үерийн эрсдэлтэй бүсэд 1917 айл, өрх бий аж. Эдгээр айлд сэрэмжлүүлэг, урьдчилан сэргийлэх мэдээ мэдээллийг өгч, нүүн шилжих мэдэгдэл хүргүүлжээ. Өнөөдөр үргэлжлэн орох усархаг борооны улмаас үерийн өндөр эрсдэл үүсэж болзошгүй байна. Иймд:

• Иргэдэд  урьдчилан сэргийлэх мэдээ, мэдээллийг эрчимтэй хүргэх шаардлагатай,
• Шаардлагатай тохиолдолд ус ихээр тогтдог байршлуудад автомашины хөдөлгөөнийг хязгаарлах арга хэмж авах,
• Улаанбаатарт аянга, цахилгаан, борооноос хамааран цахилгааны хэлбэлзэл үүсэж объектын гал түймэр гарах эрсдэл өндөр болсон. Энэ эрсдэлээс урьдчилан сэргийлж цахилгаан хангамж, галын аюулгүй байдалд үзлэг, шалгалт хийхээр үүрэг, даалгавар өгчээ.