Төрийн ордонд УИХ-ын Төсвийн байнгын хороо хуралдаж байна.

УИХ-ын гишүүн Б.Түвшин “Ирээдүй өв сан болон Хуримтлалын санг энэ онд 2.3 их наяд төгрөгөөр нэмэгдүүлэх юм байна. Эдгээр санд одоо үлдэгдэл хэд байгаа вэ, үүн дээр 2.3 их наядыг нэмээд хэд болох вэ? Үүнд тооцох өгөөжийг хаана, яаж бүртгэж байна вэ? Энэ сангийн мөнгөнүүдээс хаана, ямар өгөөжтэй хөрөнгө оруулалт хийсэн талаар мэдээлэл өгөөч” гэв.

Сангийн яамнаас Ирээдүйн өв сангийн нийт үлдэгдэл энэ оны эцсээр 3.9 их наяд төгрөгт хүрэхээр байна. Одоогийн байгаа үлдэгдэл 3.6 их наяд төгрөгтэй тэнцэж байгаа. Ирээдүй өв сангийн үлдэгдэл 1.8 их наяд төгрөг Төв банкны долларын дансанд, 1.8 их наяд нь Төрийн санд байгаа. 2024 ондоо багтаан үүнийг Төв банкан дахь долларын дансанд байрлуулна. Хуримтлалын сангийн үлдэгдэл 499.5 тэрбум төгрөг байгаа. Ирэх онд сангийн үлдэгдэл их наяд 61.6 тэрбумд хүрэх төлөвтэй байгаа гэж мэдээлэв.

Сангийн сайд Б.Жавхлан “Мөнгө 100 хувь Төв банканд байгаа гэж ойлгох нь зөв. Энд өгөөжгүй хадгалаад байна гэж ярьж байгаад өндөр өгөөж амласан банкнуудад аваачиж байршуулаад юун өгөөж манатай алдсан гашуун түүх бидэнд бий.

Тиймээс сүүлийн 5 жилийн хугацаанд эрсдэлтэй банкнуудад мөнгө байршуулах ажлыг бүрэн зогсоосон. Ингээд Төв банканд байршуулж байна. Төсвийн мөнгөөр бүрдэж байгаа сангууд найдвартай бас хөрвөх чадвартай байх ёстой. Энэ хоёр биелж байвал дараа нь өгөөж хайж болно. Найдвартай л хадгалж байвал өгөөж хайхгүй ч байсан болно” гэлээ.