Завхан аймгийн зарим нутгаар мөн уулархаг хэсгээр их хэмжээний цас орж зорчих хэсэгт халтиргаа, гулгаа үүссэн тул анхаарал болгоомжтой зорчихыг сануулж байна.

Цаг уурын өртөө, харуулын цасны зузааны мэдээгээр Баян-Өлгий, Завханы ихэнх нутаг, Ховдын өмнөд, Говь-Алтай, Баянхонгорын хойд хэсгээр 0.0-22.0 см цасан бүрхүүл тогтсоноос хамгийн их нь Говь-Алтайн Бугатад 22.0 см, Тонхилд 12.0 см, Завханы Улиастайд 17.0 см, Цагаанчулуутад 15.0 см, Отгонд 13.0 см бусад хэсгээр 0.0-7.0 см цасан бүрхүүл тогтжээ.

Баруун аймгуудаар орж байгаа цас өнөө шөнө маргааш өдөртөө төвийн ихэнх аймгийн нутаг, зүүн аймгуудын хойд хэсгээр цаг агаарын аюултай үзэгдлийн хэмжээнд хүрч нойтон цас, цас орж зарим үед салхины хурд 12-14 м/с хүрч ширүүсэн цасан шуурга шуурна.

Нойтон цас орж, цасан шуурга шуурч, говь, тал, хээрийн нутгаар салхи шуургатай тул тээврийн хэрэгслийн бүрэн бүтэн байдлыг хангаж, баталгаатай тээврийн хэрэгсэл сонгож, анхаарал болгоомжтой зорчихыг анхааруулж байна. Нэн ялангуяа өнөө шөнө, маргааш өдөртөө баруун аймгуудын иргэд болон тус бүс нутгаар зорчиж байгаа жолооч, тээвэрчид онцгой анхаарна уу.

Орон нутгийн замд зорчих тохиолдолд:

• Тээвэрлэлтэд гарахын өмнө мэргэжлийн байгууллагаас цаг агаар, замын нөхцөл байдлын талаарх мэдээллийг авах,
• Тээврийн хэрэгслийн техникийн бэлэн байдлыг сайтар шалгах
• Бензин, түлшийг хангалттай нөөцлөх
• Замын нөхцөл хүндэрч тээвэрлэлт гүйцэтгэхэд хүндрэлтэй нөхцөл байдал үүссэн тохиолдолд аюулгүй байдлыг хангаж зогсох,
• Хөдөлгөөнд соёлтой оролцох,
• Шөнийн цагт гэрэл шилжүүлэх,
• Жолооч болон зорчигчид суудлын бүсийг тогтмол зүүх,
• Замын нөхцөл байдал тохируулж хурдаа сонгож явах.

Эх сурвалж: ЦУОШГ