Засгийн газрын хуралдаанаас гаргасан шийдвэрийг танилцуулж байна.  сайд Ц.Туваан дараах мэдээллийг өглөө.

Тэрбээр "Өнөөдрийн хуралдаанаар Аж, үйлдвэр, эрдэс баялгийн яамны эрхлэх асуудлын хүрээнд 3 гол асуудал хэлэлцэгдлээ.

Эхний асуудал нь "Монголросцветмет" ТӨҮГ-ын нэр болон үйл ажиллагааны чиглэлтэй холбоотой. Энэ компанийн үйл ажиллагаа орчин үеийн уул уурхай, тэр дундаа критикал минералын салбарт чиглэгдэх болж, түүний нэрийг "Эрдэнэс Критикал Минерал" гэж өөрчлөх шийдвэр гаргалаа. Сүүлийн үед дэлхий даяар уул уурхайн чиглэлийн үзэсгэлэн, уулзалтууд дээр критикал минералс гэх сэдвээр их ярьж, хөгжлийн энэ чиглэлийг дагах шаардлагатай болсон гэж үзсэн.

Манай яам энэ чиглэлээр ажиллаж, зөвлөхүүдтэй хамтран газрын овор элементийн чиглэлээр ч эрэлт хэрэгцээг судалж байгаа. Тиймээс энэ шийдвэр нь цаг үеэ олсон гэж ойлгож болно.

“Монголросцветмет” ТӨҮГ-ыг  "Эрдэнэс Критикал Минерал" гэж өөрчлөхөөр боллоо.

Дараагийн асуудал бол Монгол Улс хайгуулын тусгай зөвшөөрөл олгох тухай. 2024 оны 4 сараас хойш хайгуулын тусгай зөвшөөрөл олгоогүй байсан бөгөөд энэ асуудал хувийн хэвшил, гадны хөрөнгө оруулагчдад нэлээн хүлээлт үүсгэсэн. Засгийн газар шинэ журам баталж, хайгуулын тусгай зөвшөөрөл олгох үйл явцыг сэргээх шийдвэр гаргалаа. Энэ нь олон улсын уул уурхайн үзэсгэлэнгийн өмнө гарсан эерэг шийдвэр юм.

Монгол Улс 2024 оны төсөвт 20 тонн алт олборлохоор зорилт тавьсан ч одоо 16,5 тонн алт олборлож, энэ дүн нь бага байгаа. Сүүлийн үед алтны ханш түүхэн дээд хэмжээнд хүрч байгаа тул алт олборлолтын чиглэлээр Засгийн газар тодорхой үүрэг чиглэл өгч, цаашид энэ асуудлыг судалж, шийдвэр гаргана гэж мэдэгдлээ.

Үүнээс гадна, нүүрсний үнийн уналттай холбоотойгоор улсын төсвийн орлого буурч байгаа ч алтны олборлолтыг нэмэгдүүлэх асуудлыг Засгийн газарт хэлэлцжээ. Энэ чиглэлээр нэмэлт судалгаа хийгдэж, шийдвэрийг УИХ-д танилцуулах боломжтой гэж үзэж байна.

Хилээр гарч байгаа нүүрсний хэмжээ нь өнгөрсөн жилийн нэгдүгээр сараас өндөр байгаа ч, бодит борлуулалт болон орлого орж ирэх хэмжээ нь буурсан гэдэг үнэн. Тиймээс Засгийн газар ойрын хугацаанд энэ асуудалтай холбоотой тодорхой шийдвэрүүдийг гаргаж, ажиллах төлөвлөгөөтэй байна" гэлээ.

ШУУД: