Манай "нийслэлийнхний" хийе, бүтээе гэсэн санаа нь сайхан. Гэхдээ бүтээн байгуулалтууд нь "бушуу туулай борвиндоо баастай"-н үлгэр болж байна.

Өнгөрсөн долоо хоногт бүтээн байгуулалтын ажил нь дуусаагүй атал ашиглалтад орсон мэтээр мэдээлсэн "Урт цагаан"-ы дахин төлөвлөлтийн барилга байгууламжийн талаар бид сурвалжилсан. Гүйцэтгэгч нь "хараахан дуусаагүй байна аа" гэж байхад захиалагч болох "нийслэлийнхэн" нээчихлээ хэмээн мэдээлээд л. Олон нийтийн нүдний өмнө ил босож буй ажил гэдгийг мартчихдаг юм болов уу. Мөн илт худал мэдээлэл тархаавал хуулийн хариуцлага хүлээнэ гэдгийг умартчихдаг юм болов уу. 

Дээрх жишээтэй ижил нэгэн бүтээн байгуулалт Баянзүрх дүүргийн товчоо өнгөрөөд Налайх явах замд бий. Бидний хэлж заншсанаар "Адам, Эва"-ийн хөшөөтэй хэсэгт "Экстрем спортын талбай байгууллаа" гэх мэдээг энэ оны дөрөвдүгээр сард НЗДТГ-аас мэдээлсэн. 

Тодруулбал, "Баянзүрх дүүргийн 10 дугаар хороонд экстрем спортын талбай тохижуулж дууслаа. Тус бүтээн байгуулалтад экстрем спортын талбай, авто синема, задгай тайз, элсний волейбол, хүүхдийн тоглоомын талбай, гэрэлт гудамж, худалдааны гудамж, явган болон дугуйн зам, дугуй түрээсийн талбай, ногоон байгууламж, чийрэгжүүлэлтийн талбай, 3х3 сагсан бөмбөгийн талбай болон болон бусад тохижилтыг хийлээ. Мөн тэшүүрийн хэсгийг байгуулна" гэж нийтэлсэн юм. 

Мэдээг үзсэн даруйдаа олон нийтийн амрах, хөгжилдөх талбай нэгээр нэмэгдсэнийг сурвалжилъя хэмээн БЗД-ийн Хэвлэл мэдээллийн ажилтантай холбогдоход, "Бүрэн ашиглалтад ороогүй. Ашиглалтад орсны дараа утсаар залгаж мэдээлье. Удахгүй байх гэж бодож байна" хэмээн хариулсан юм. Гэвч эргэж холбогдоогүй.

Ингээд өчигдөр буюу энэ сарын 11-ний өдөр дахин холбогдоход, "90 гаруй хувийн гүйцэтгэлтэйгээр ашиглалтад оруулсан. Очоод сурвалжилж болно" гэв. 

Биднийг очиход, спортын талбай тус бүрийн ажил дууссан байв. Харин дээр дурдагдсан задгай тайз, авто синема, худалдааны гудамж алга.

Тэд энэ ажлыг хийж дууслаа гэснээс хойш дөрвөн сар өнгөрчээ. Зуны сар зургаа биш. Монголын барилга байгууламж барьдаг улирал үндсэндээ шувтарч байна.

Ашиглалтад оруулсан гэх талбайд нь барилгын материалууд ил задгай. Хажуугаар нь хүүхдүүд гүйлдэж тоглоод л. Өчигдөр орой нь орсон борооны ус зассан зам дээр нь хуримтлагдаад, түүнийг нь хүүхдүүд туулж тоглоод л. Эрсдэлтэй нөхцөл гэж хүлээж авч, нааш цааш гэж зааварлах ч хүн алга. Жинхэнэ утгаараа "экстрем" талбай тэнд байна. 

Худалдааны гудамжных нь барилгууд дуусаагүй ч тэнд бүтээж хөдөлмөрлөж байгаа хүн алга. Байгаагаас тэшүүрийн талбайг л усалж байна.

Дууссан гэж мэдээ нийтэлсэн өдрийн огноо чухал уу. Бүтээн байгуулалтаа бүрэн дуусгаад иргэдийг эрүүл аюулгүй орчноор хангах нь чухал уу? Нийслэлийн захирагч аа.

ФОТО: