Жил бүрийн 7 дугаар сарын 30-нд Хүн худалдаалахтай тэмцэх дэлхийн өдөр тохиодог. Энэ жилийн хүрээнд “Залилангийн цаадах хохирогчид” сэдвийг онцолж, хуурамч ажлын саналаар хүмүүсийг хуурч, цахим залилан үйлдэхийг албаддаг хүн худалдаалах гэмт хэрэг өсөн нэмэгдэж буйд дэлхий нийтийн анхаарлыг хандуулж байна.

Хуурамч ажлын саналд хууртан өөр улсад очсон хүмүүс зохион байгуулалттай гэмт бүлэглэлүүдийн гарт орж, сүрдүүлэг, хүчирхийлэл, дарамтын дор цахим залилан үйлдэхэд хүрдэг. Тэдний бичиг баримтыг хураах, зорчих эрхийг нь хязгаарлах, өрийн дарамтад оруулах зэрэг олон төрлийн мөлжлөгт өртөх нь түгээмэл байдаг.

ОУШХБ 2022–2025 оны хооронд Ази, Номхон далайн бүс нутагт албадан гэмт хэрэг үйлдүүлэх зорилгоор худалдаалагдсан 3,100 гаруй хүнд шууд тусламж үзүүлсэн юм.

Хүн худалдаалахтай тэмцэх бүсийн шинэчилсэн стратеги (2026-2030) нь дараах чиглэлд төвлөрнө:

• Хохирогчдыг илрүүлэх, хамгаалах;
• Хүн худалдаалах гэмт хэргээс урьдчилан сэргийлэх;
• Шилжин суурьшигчид болон бусад эрсдэлт бүлгийн хүмүүсийн эмзэг байдлыг бууруулах;
• Хохирогчдыг нийгэмд тогтвортой эргэн нэгтгэх;
• Гэмт этгээдүүдэд хариуцлага тооцох;
• Улс орнуудын хамтын ажиллагааг бэхжүүлэх.

Энэхүү стратеги нь хүн худалдаалах гэмт хэргийн хохирогчдыг албадан үйлдүүлсэн хууль бус үйлдлийнх нь төлөө шийтгэх ёсгүй гэсэн олон улсын зарчмыг онцолж, тэднийг хамгаалах, тусламж үйлчилгээ болон шударга ёсны хүртээмжийг сайжруулахыг уриалж байна.

Олон улсын шилжилт хөдөлгөөний байгууллага өнгөрсөн 25 жилд дэлхий даяар хүн худалдаалах гэмт хэргийн 100,000 гаруй хохирогчид шууд тусламж үзүүлээд байна.