Томуу, томуу төст өвчний тархалт улсын хэмжээний дэгдэлтийн түвшинд байгааг Эрүүл мэндийн яамнаас мэдээллээ.

Амбулаторид суурилсан тандалтын нэгжүүдэд  278,998 хүн хандаж тусламж үйлчилгээ авснаас 11.9 хувь (33,269) нь ТТӨ-тэй байж, өмнөх долоо хоногоос 5.2 хувиар,  өнгөрсөн оны мөн үеэс 4.3 хувиар тус тус их байна. Нийт ТТӨ-ий 64.2 хувь (21,380) нь орон нутагт, 35.8 хувь (11,889) нь Улаанбаатар хотод бүртгэгдсэн байна.

ТТӨ-өөр өвчлөгсдийн дотор 82.6 хувийг 15, 39 хувийг 5 хүртэлх насныхан эзэлж байгаа ба амьсгалын замын цочмог хүнд халдварын шалтгаант эмнэлэгт хэвтэгсдийн 85.8 хувийг 15, 63.2 хувийг 5 хүртэлх насныхан эзэлж байна.

Лабораторид суурилсан тандалтаар 206 сорьц цуглуулан шинжлэхэд 64.5 хувьд вирус эерэг тодорхойлогдож, өмнөх 7 хоногоос 9.2 хувиар нэмэгджээ. Үүний дотор A(H3N2) вирус 73.7 хувьд илэрч, өмнөх 7 хоногоос 13.2 хувиар нэмэгдсэн ба амьсгалын замын синцитиаль вирус 12 хувь,  15.3 хувьд  бусад төрлийн вирус илэрч байна.

Нийт 6,557 хүн хэвтэн эмчлүүлж байгаагаас 42,4 хувь (2,779) нь АЗЦХХ-ын шалтгаантай байна. Эмнэлэгт 2,823  хүүхэд хэвтэн эмчлүүлж байгаагаас  85.6 хувь (2,416) нь амьсгалын замын цочмог хүнд халдварын шалтгаантай байна.

Орон нутагт нийт 3,393 үйлчлүүлэгч хэвтэн эмчлүүлж байгаагаас 27.9 хувь нь ТТӨ-ий шалтгаантай байгаа ба 85 хувь нь хүүхэд, 14.9 хувь нь насанд хүрэгчид байна. Амьсгалын замын цочмог хүнд халдварын нөхцөл байдлын улмаас  нэмэлтээр 379 ор дэлгээд байна.

Нийслэлд нийт 3,164 үйлчлүүлэгч хэвтэн эмчлүүлж байгаагаас 57.9 хувь нь амьсгалын замын цочмог хүнд халдварын шалтгаантай. Үүнээс 87.9 хувь нь хүүхэд, 12.1 хувь нь насанд хүрэгчид байна. Амьсгалын замын цочмог хүнд халдварын нөхцөл байдлын улмаас нэмэлт 468 ор дэлгэн ажиллаж байна.

Эмнэлгүүдийн хүүхдийн тасгийн орны ачаалал нэмэгдэж 847 ор дэлгэн ажиллуулж байна. Эрчимт эмчилгээний тасагт 72 хүүхэд эмчлүүлж байгаагаас 70.8% нь амьсгалын замын цочмог хүнд халдварын шалтгаантай байна.

Хүүхдийн яаралтай тусламжийн тасгаар 2,445 хүн үзүүлснээс 1,904 нь томуу томуу төст өвчний шалтгаантай байна.  

Орон нутагт: Нийт 979 хүүхэд хүлээн авах, яаралтай тусламжаар үйлчлүүлсэн байгаагаас 61.7 хувь нь АЗЦХХ-ын шалтгаантай байна.

Нийслэлд: Нийт 2,959 хүүхэд хүлээн авах, яаралтай тусламжаар үйлчлүүлсэн байгаагаас 81 хувь нь АЗЦХХ-ын шалтгаантай байна.

Товчлол: 
•  АЗЦХХ - амьсгалын замын цочмог хүнд халдвар
•  ТТӨ -томуу, томуу төст өвчин

Эх сурвалж: ЭМЯ