-АНУ-аас сэтгүүлч Г.Тэгшсүрэн мэдээлж байна-

Ирэх онд Улаанбаатар хотоос АНУ-ын аль ч хот руу шууд нислэг үйлдэх боломж бүрдэнэ. Одоогийн байдлаар Улаанбаатараас АНУ хүртэл хамгийн багадаа 24-48 цаг хүртэлх хугацаа зарцуулж, дамжин нисдэг бөгөөд шууд нислэг эхэлснээр нислэгийн хугацаа 2-3 дахин буурах боломжтой болохыг Зам, тээврийн хөгжлийн сайд С.Бямбацогт хэллээ.

Ерөнхий сайд Л.Оюун-Эрдэнэ эдгээр өдрүүдэд АНУ-д албан ёсны айлчлал хийж байгаа бөгөөд айлчлалын хүрээнд хоёр улс тээврийн салбарт хамтран ажиллахаар болсон. Өнөөдөр болсон уулзалтаар Монгол Улс, АНУ-ын хооронд олон жил яригдсан “Агаарын тээврийн тухай Монгол Улсын Засгийн газар, АНУ-ын Засгийн газар хоорондын хэлэлцээр”-ийг байгуулсан юм.

Шууд нислэгтэй болохоор долоо хоногт хоёр удаа нислэг үйлдэх боломжтой болно гэж тооцоолж байгаа бөгөөд хоёр улсын эдийн засаг, боловсрол, бизнесийн харилцаа сэргэж, хөрөнгө оруулалт ч нэмэгдэнэ гэж салбарын сайд үзэж байгаагаа илэрхийлсэн юм.

Шууд нислэгтэй холбоотойгоор МИАТ компани хоёр онгоц түрээсээр авч байгаа бөгөөд сард 800 мянган ам.доллар төлөх юм байна. Уг хоёр онгоцны эхнийх нь наймдугаар сарын 10-нд Улаанбаатарт буух бол 2024 оны эхний улиралд багтаан хоёр дахь онгоцоо авах юм.