Соёлын төв өргөөний барилгыг нурааж, хоёр блок бүхий 50 давхар барилга барих төслийг боловсруулж, саналыг Нийслэлийн Засаг даргын зөвлөлийн хуралд танилцуулахыг хотын дарга үүрэгдэв. 

Тодруулбал, өнгөрсөн арванхоёрдугаар сарын 30-ны өдрийн нийслэлийн удирдах ажилтнуудын шуурхай зөвлөгөөнөөр нийслэлийн захирагч нийт 12 үүрэг даалгавар танилцуулсны нэг нь дээрх төслийг боловсруулж танилцуулах юм. 

Төслийн үндсэн хэрэгжүүлэгч байгууллага нь Нийслэлийн Засаг даргын тамгын газрын Хөрөнгө оруулалтын хэлтэс болон Соёлын төв өргөө гэж тусгасан бол Хяналт тавих албан тушаалтнаар Нийслэлийн Засаг даргын эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалай байх аж. 

Тус төслийн талаарх мэдээлэл нийгмийн сүлжээнд тархсантай холбоотойгоор дээрх захирагчийн даалгасан үүрэг даалгавраас 12 дахь хэсгийг нь буюу "Соёлын төв өргөөний барилгыг нурааж, хоёр блок бүхий 50 давхар барилга барих төслийг боловсруулж, саналыг Нийслэлийн Засаг даргын зөвлөлийн хуралд танилцуулах" гэснийг хасаж, нийтэд харагдуулахгүй болгосон байна. 

Ташрамд дурдахад, өнгөрсөн оны хоёрдугаар сард Соёлын төв өргөөнд ургал засвар хийж байв. Харин он гарснаар мөн барилгын хөрсний ус зайлуулах, барилгын их засвар, тоног төхөөрөмжийн ажилд 3.6 тэрбум төгрөг зарцуулахаар төсөвлөжээ. 

Дээрх асуудлын хүрээнд Соёлын төв өргөөний захирал, НИТХ-ын төлөөлөгч Л.Ариунтуяагаас тодрууллаа. 

Тэрээр хэлэхдээ, "Соёлын төв өргөө нь 1988 онд ашиглалтад орсноос хойш их засвар огт хийгдээгүй, барилгын насжилт хэтэрсэн объект. Өнгөрсөн жил дээврээс ус нэвчиж, шууд заал руу асгарч байсан. Мөн хөрсний ус нэг метр орчим орж ирсэн тохиолдол гарсан тул тодорхой засваруудыг хийсэн.

Ирэх жилүүдэд барилгад дахин засвар хийх, засварын ажлыг хүчитгэх тухай л яригдаж байгаа болохоос 50 давхар барилга барина, нураана гэх мэдээлэл Соёлын төв өргөөд огт ирээгүй. Энэ талаар бидэнд ямар нэгэн чиглэл, албан ёсны мэдээлэл өгөөгүй. 

Соёлын төв өргөө нь түүхэн барилга тул нураах боломжгүй. Одоогоор яригдаж буй зүйл нь зөвхөн байгаа барилгыг засварлах, их засварын ажлыг судлах асуудал юм. 50 давхар барилга, нураалттай холбоотой ямар нэг судалгаа, төлөвлөгөө хийгээгүй. 

Нийслэлийн Засаг даргын үүрэг даалгаварт Соёлын төв өргөөг нураах тухай дурдагдсаныг хараад бид ч гайхсан. Анхнаасаа судалгаа хийсэн юм болов уу гэж лавласан ч ямар нэгэн судалгаа хийгдээгүй, зөвхөн засварын ажил л яригдаж байгаа гэсэн хариуг авсан. 

Барилгын насжилт 40 орчим жил болсон. Дулааны доод шугамууд муудсан, эрчим хүчний ачааллаа дийлэхээ больсон, дулаан алдагдал ихтэй. Өвлийн улиралд танхимууд маш хүйтэн байдаг. Тиймээс засварын ажлыг хийх зайлшгүй шаардлага бий.

Одоогоор 3.6 тэрбум төгрөгийн засварын төсөв яригдаж байгаа. Эхлээд зураг төсөл, магадлал, дараа нь тендерийн шатанд шилжинэ. Засварын ажил энэ оны гуравдугаар сараас эхлэх боломжтой гэж үзэж байна.

Нийслэлийн Засаг даргын захирамжтай холбоотойгоор бидэнтэй хэн ч албан ёсоор холбогдоогүй. Одоог хүртэл нураах, 50 давхар барилга барих тухай яриа огт байхгүй.

Ийм шийдвэр бол маш нарийн тооцоо, судалгаа шаардсан, ул суурьтай хандах ёстой асуудал" гэв.

Харин Нийслэлийн Засаг даргын эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалайгаас тодруулга авах гэсэн ч холбогдож чадаагүй байна. Тодруулга авсан дариуд мэдээлэхээр ажиллаж байна.