УИХ-ын чуулганы нэгдсэн хуралдаан эхэллээ. УИХ-ын чуулганы нэгдсэн хуралдаанаар Засгийн газрын 2024-2028 оны үйл ажиллагааны хөтөлбөрийг батлах асуудлыг хэлэлцэж байна. 

УИХ-ын гишүүн М.Нарантуяа:

-Хөдөлмөр, нийгмийн хамгааллын сайд халамж хавтгайрсан, үүнийг танах хэрэгтэй гэж хэлж байна. Сайдтай санал нэг байна. Жишээ нь хүнсний талоноор амьдардаг 128 мянган иргэн байна гэж яриад байгаа. Үнэхээр хөл, гар, эрүүл мэндийн хувьд бүрэн бүтэн хэр нь төрийн халамж аваад ажилгүйдэл, ядуурлын тоог нэмээд халамж хавтгайраад байгаа асуудлаа сайд маань маш сайн тодорхойлоод, хэрэгцээгүй, шаардлагагүй халамжаа танах хэрэгтэй.

Харин оронд нь "Цалинтай ээж" гэдэгт хэдээс хэдэн насны хүүхэдтэй хүмүүс багтах вэ гэдгийг маш сайн тодорхойлоод “Цалинтай ээж” хөтөлбөрөөрөө ээжүүдэд цалин шиг цалин олгоосой гэж хүсэж байна. Тийм боломж байхгүй бол “Цалинтай ээж” гэдэг хөтөлбөрөө “50 мянган төгрөг ч хаа юм” гэж өөрчилдөг юм уу. Үгүй бол одоо хагас өдрийн цалин ч 50 мянган төгрөг биш болсон.

Шинэ сайд маань судалгаа маш сайн хийгээд, боломж байгаа бол хэрэгцээгүй халамжаа танаад ээжүүдэд төрийн халамж хэрэгтэй тодорхой цаг хугацаанд халамжлаасай гэж хэлмээр байна.