Ерөнхийлөгч У.Хүрэлсүх сэтгүүлч Н.Өнөрцэцэгт уучлалт үзүүллсэн тухай мэдээлэл цацагдлаа.

Энэ тухай "Зариг.мн" сайтын редакцаас "Монгол Улсын Ерөнхийлөгч Олон улсын эмэгтэйчүүдийн эрхийг хамгаалах өдөр сэтгүүлч Н.Өнөрцэцэг болон нэр бүхий гурван эмэгтэйд уучлал хүссэн захидлыг үндэслэн уучлал үзүүллээ" гэж мэдээлжээ.

Эргэн сануулахад, сэтгүүлч Н.Өнөрцэцэгт 4.9 жилийн хорих ял оноосон. Анхан шатны шүүхийн шийдвэрийг хүлээн зөвшөөрөөгүй тул давж заалдсан. Давж заалдах шатны шүүх хурлыг ялыг хэвээр үлдээсэн юм.

Анхан шатны шүүхийн шийдвэр 2024 оны долоодугаар сарын 20-ны өдөр гарснаас хойш тэрбээр 8 сарын дараа ийнхүү суллагдахаар болов.

Шүүхээс сэтгүүлч Н.Өнөрцэцэгийг:

• Нэр бүхий 4 иргэн, 1 хуулийн этгээдийн нэр төр, алдар хүнд, ажил хэргийн нэр хүндэд халдсан илт худал мэдээллийг олон нийтэд тараасан,
• Хувь хүний хуулиар хамгаалагдсан нууцыг олж мэдсэн хүн өөрийнх нь зөвшөөрөлгүйгээр цахим сүлжээ ашиглаж задруулсан,
• Татвар төлөгч хувь хүн, хуулийн этгээдийн удирдах, гүйцэтгэх албан тушаалтан татвар төлөхөөс зайлсхийх зорилгоор их хэмжээний татвар ногдох орлогоо зориуд худал тодорхойлсон, нуусан,
• Татвар төлөхөөс зайлсхийх гэмт хэргийн улмаас олсон хөрөнгө, мөнгө, орлого гэдгийг мэдсээр байж ашигласан,
• Төрийн нууцад хамаарах мэдээ, баримтыг хадгалсан” гэмт хэрэг үйлдсэн гэм буруутайд тус тус тооцсон юм.