Сүхбаатарын талбайд үргэлжилж буй жагсаалын үеэр нэг иргэний биеийн байдал мууджээ.

Энэ талаар ЦЕГ-ын Хэвлэл мэдээллийн төвөөс тодруулахад "Олон хүн бие биеэ түлхсэнээс болж нэг иргэний бие муудсан. Цагдаагийн байгууллагаас яаралтай чөлөөлөх коридор гаргаж, тухайн иргэнийг эмнэлгийн байгууллагад хүлээлгэж өглөө" гэж мэдээллээ.

Мөн "Одоогийн байдлаар цагдаагийн байгууллагаас тусгай хэрэгсэл хэрэглээгүй, жагсагчдыг тайван замаар үзэл бодлоо илэрхийлэх талаар сэрэмжлүүлэг мэдээллийг хүргэж байна. Жагсагчид цагдаагийн албан хаагчдыг жагсаалд нэгд гэх мэтчилэн өөр зүйл шаардаж байгаа нь эмх замбараагүй байдалд уриалж байгаа үйлдэл болж байна" гэдгийг цагдаагийн байгууллагаас анхаарууллаа.

Түүнчлэн жагсагчид дунд согтууруулах ундааны зүйл хэрэглэсэн хүмүүс байгаа тул тэднийг олны дундаас гаргах арга хэмжээ авч эхэлжээ.

Хэрэв Жагсаал, цуглаан хийх журмын тухай хуулийг албан тушаалтан зөрчсөн болон үйлдэл нь гэмт хэргийн шинжгүй бол Төрийн албаны тухай хуульд заасан хариуцлага хүлээлгэнэ. Харин энэ хуулийг зөрчсөн хүн, хуулийн этгээдэд Эрүүгийн хууль, эсхүл Зөрчлийн тухай хуульд заасан хариуцлага хүлээлгэнэ. Иймд иргэн та аливаа жагсаал, цуглаанд оролцохдоо дараах хуулийн заалт, шаардлагыг сахин биелүүлэх үүрэгтэй.