УИХ-ын чуулганы хуралдаан үргэлжилж байна. УИХ-ын гишүүн Г.Дамдинням “Би шинэ сайд томилогдох үед “Авлига” хороололтой холбоотой асуудлыг ярьж байсан. Улаанбаатар хотын захирагч болон бусад албаны хүмүүс захиргааны эрхзүйн акт тавиад л байдаг, тэгсэн ч болохгүй байна гэдэг асуудлыг ярьж байна. Хуулиа мөрдүүлмээр байна, энэ барилгын үйл ажиллагааг зогсооход юу нь болохгүй байна вэ. Үүнд хариулт өгнө үү, ХЗДХ-ийн сайд О.Алтангэрэл ээ” гэв.

УИХ-ын дарга Д.Амарбаясгалан “Г.Дамдинням гишүүн хоёр жил энэ асуудлыг хөндөн ярьж байгаа. Дарга, сайд нар очихоороо нураана л гээд байгаа. Хоёр жилийн өмнө Ерөнхий сайд очиж ажиллаад голын голдирол өөрчилсөн байна, олон нийтэд үерийн усны эрсдэлтэй нөхцөл үүсгэсэн байна гэж мэдэгдсэн. Үүнээс хойш зөвшөөрөл өгсөн эсэх, ямар бодитой ажил хийснээ Хотын удирдлагууд 7 хоногийн дотор  УИХ-д мэдээлэл ирүүлэх хэрэгтэй. Шаардлагатай гэвэл ажлын хэсэг байгуулж шалгах ёстой” гэлээ.

ХЗДХ-ийн сайд О.Алтангэрэл “Дахин нэмж зөвшөөрөл өгсөн эсэх нь албан тушаалын асуудал. Үүнд АТГ оролцох ёстой. Манай яамны харьяанд ШШГЕГ үйл ажиллагаа явуулж байна. Энэ байгууллага шүүхээс гарсан шийдвэрийг биелүүлэх ёстой.

Захиргааны хэргийн шүүхэд энэ барилгатай холбоотой асуудал гацсан байна. Захиргааны процессын хуулиа үзэхээр энэ хэрэг аль хэдийнэ шийдэгдсэн байх ёстой, харамсалтай нь одоо болтол огт шийдэгдээгүй байгаа. Шүүхийн шийдвэр гарах хүртэл шийдвэрийн биелэлтийг түдгэлзүүлэх захирамж гарсан, энэ захирамжийг бид яаж ч чадахгүй.

Өнгөрсөн жилүүдэд Г.Дамдинням гишүүний тавьж байгаа асуудал шиг, олон том төслүүд Захиргааны хэргийн шүүх дээр гацаж байгаа. Энэ дунд иргэд Монгол Улсад хууль, ёс хаана байна вэ гэдэг гомдлыг хэлж байна. Дуулиан шуугиантай хэргүүд Захиргааны хэргийн шүүхэд яагаад удаж, гацаж байгаад зохих бодлого барьж ажиллаж байна. УИХ-ын даргын хэлсний дагуу холбогдох хууль хяналтын байгууллагууд нь АТГ-тай хамтраад, ажлын хэсэг гаргаад хамтраад ажиллъя. Асуудлыг нэг талд нь гаргах цаг болсон” гэлээ.