Монгол Улсын иргэн Г.Ган-Очир хилийн чанадад амьдарч байгаа. Түүнийг сураггүй болоод найм хонож буй талаар мэдээлэл түгээд байв.

Үүнд Гадаад харилцааны яамны хэвлэлийн төлөөлөгч Р.Нямдаваа "Монгол Улсын иргэн Г.Г сураггүй алга болсон гэх мэдээлэл гарсан даруйд Гадаад харилцааны яамнаас хилийн чанад дахь дипломат төлөөлөгчийн газруудаар дамжуулан  тодруулсан. Улмаар түүнийг Интерполын шугамаар эрэн сурвалжилж байсны дагуу Швед улсад саатуулсан тухай мэдээлэл ирлээ. 

Олон Улсын Эрүүгийн цагдаагийн байгууллагатай харилцах, тус байгууллагын шугамаар эрэн сурвалжлах асуудал нь холбогдох бусад байгууллагын чиг үүрэгт хамаарах тул Гадаад харилцааны яамнаас дэлгэрэнгүй мэдээлэл өгөх боломжгүй"  гэж мэдээлэв. 

Ташрамд мэдээлэхэд, иргэн Г.Ган-Очирыг:

• Шүүхийн шийдвэр гүйцэтгэх ерөнхий газрын харьяа Цагдан хорих 461 дүгээр хаалттай хорих ангийн алба хаагч болон цагдаагийн алба хаагч нарыг албан үүргээ биелүүлэхтэй нь холбогдуулан хүч хэрэглэн эсэргүүцсэн,
• Бусдын байшинг галдан шатааж хууль бусаар устгасан,
• Сонгуулийн ерөнхий хорооны ажил хэргийн нэр хүндэд халдсан илт худал мэдээллийг олон нийтэд тараасан” гэх хэрэгт холбогдуулан шалгаж байсан.

Тэрбээр Эрүүгийн хуулийн 23.1 дүгээр зүйлийн 1 /Хууль сахиулагчийг эсэргүүцэх/, 17.8 дугаар зүйлийн 3.1 /Эд хөрөнгө устгах гэмтээх/, 13.14 дүгээр зүйлийн 1 /Худал мэдээлэл тараах/ зааснаар яллагдагчаар татагдсан байхдаа буюу 2022 оны 7 дугаар сард Монгол Улсын хилээр гарч, оргон зайлсан. Иймд түүнийг Интерполоор олон улсад эрэн сурвалжилж байгааг Улсын Ерөнхий прокурорын газраас жилийн өмнө мэдээлсэн.