"Үндэсний агуулгыг дэлхийд" уриатай Монгол контент ХХК-ийн "Маамуу" төслийн хамт олноос энэ хичээлийн жилд нийслэлийн Баянзүрх дүүрэгт шинээр ашиглалтад орсон гурван цэцэрлэгт хүүхэд, багачуудын хайртай дүр болох Аами, Таамигийн тоглоом, сургалтын хэрэглэгдэхүүнийг хандивлалаа.

Компанийн зүгээс шинэ цэцэрлэгийн тохижилтод хувь нэмэр оруулах үүднээс хамт олныхоо дунд сайн үйлсийн аян зарласан байна.

Аяны хүрээнд цугларсан тоглоом болон "Маамуу" брэндийн хүүхдийн сэтгэн бодох чадварыг хөгжүүлэх, бага насны хүүхдэд зөв төлөвшил, боловсрол, хүмүүжлийг олгох зорилготой цуврал ном, тоглоом зэргийг Нийслэлийн Баянзүрх дүүргийн 289,  297, 301 дүгээр цэцэрлэгийн удирдлага, хүүхэд багачуудад хүлээлгэн өгөв.

"Монгол контент" ХХК-ийн гүйцэтгэх захирал Э.Чинзориг "Дэлхийд өрсөлдөх Монгол агуулгыг бүтээх нь бидний эрхэм зорилго. Энэ зорилгын хүрээнд манай компани "Маамуу" төслийг 2016 оноос хойш хөгжүүлж, багачуудын хайртай дүр Аами, Таамиг бүтээсэн.

Мөн хүүхдийн сургалт, хүмүүжилд ач холбогдолтой контентуудыг дүрээр дамжуулан хүргэхээс гадна олон төрлийн ном, бүтээгдэхүүн, дасгалын дэвтэр зэргийг сургалтын "Цөм" хөтөлбөрийн дагуу боловсруулж ирлээ.

Технологи хурдтай хөгжиж, дижитал хувьсал явагдаж буй энэ үед манай хамт олон цаашид  "Маамуу" төслөө дижитал хувилбарт бүрэн шилжүүлэхээр ажиллаж байна. Бага насны хүүхдүүд гар утас, таблет зэргийг олон цагаар хэрэглэх нь эрүүл мэндэд сөргөөр нөлөөлдөг. Гэвч дижитал эриний "уугуул" иргэдэд технологийн хэрэглээг багаас нь  тодорхой хязгаартайгаар, эцэг эхийн хяналтан дор хөгжүүлж, зөв дадал зуршил суулгаж өгөх нь зүйтэй гэж бид үздэг" гэлээ.

Нийслэлийн Баянзүрх дүүргийн 289 дүгээр цэцэрлэгийн эрхлэгч Ц.Удвал "Манай цэцэрлэг 2021 оны хоёрдугаар сард ашиглалтад орсон. Есдүгээр сарын 1-нээс сургалтын үйл ажиллагааг эхлүүлээд байна. Нийтдээ 240 хүүхдийн хүчин чадалтай. Одоогоор 4-5 насны хамран сургах тойргийн 225 суралцагчаас өдөрт 160-170 хүүхэд хүлээн авч байна.

Үйл ажиллагаагаа эхлээд удаагүй байгаа учраас хүүхдүүдийн нас, сэтгэхүйн онцлогт тохирсон тоглоом, хичээлийн хэрэглэгдэхүүн хомс байгаа. Энэ үед бидний ажлыг дэмжиж, хүүхдийн сурч хөгжих орчныг бүрдүүлэхэд хувь нэмэр оруулж тоглоом, ном зэрэг хэрэглэгдэхүүн хандивлаж байгаа "Монгол Контент" ХХК-ийн хамт олон болон МААМУУ брэнддээ  хүүхэд, багачууд, эцэг эхчүүдийнхээ өмнөөс баярласан, талархсанаа илэрхийлье" гэсэн юм.

Мөн Баянзүрх дүүргийн 8 дугаар хороонд энэ оны наймдугаар сарын 25-ны өдрөөс эхлэн үйл ажиллагаагаа явуулж буй 301 дүгээр цэцэрлэгт тоглоом хандивлалаа. Тус цэцэрлэгт 4-5 насны 152 хүүхэд суралцаж байна.

Цэцэрлэгийн эрхлэгч О.Оюунмаа "Манай цэцэрлэгийн барилгын ажлыг энэ оны тавдугаар сарын 20-ний өдөр улсын комисс хүлээн авсан. Одоогоор 10 бүлэгт 240 хүүхэд хүлээн авах хүчин чадалтайгаар үйл ажиллагаагаа явуулж байна.

Нээгдээд удаагүй шинэ цэцэрлэг учраас анги танхимын ширээ, сандал, хүүхдийн тоглоом, сургалтын хэрэглэхүүнтэй болохоос эхлээд тохижилтын ажил чухал байгаа.

Энэ үед Монгол контент ХХК-ийн "Маамуу" төслийн хамт олон хүүхдүүдийн хайртай дүр, өхөөрдөм Аами, Таамигийн зөөлөн тоглоом, ном, хөлөгт тоглоом бэлэглэж буй нь үнэхээр цагаа олсон тус боллоо. Та бүхэнд чин сэтгэлийн талархал илэрхийлж, ажлын амжилт хүсье" гэв.

Монгол Контент ХХК үндэсний дүрийг бий болгох, хүүхдийн контентийн сул орон зайг нөхөх, хүүхдийн боловсрол, төлөвшилд хувь нэмэр оруулах зорилготой “Маамуу” төслийг эхлүүлээд зургаан жилийг ардаа үджээ. Энэ хугацаанд тус компанийн уран бүтээлчид "Маамуу" 2D анимэйшн хүүхэлдэйн киноны 16 анги, хүүхдийн нэвтрүүлгийн 200 гаруй дугаарыг толилуулсан байна.

Мөн саяхан "Маамуу" хүүхэлдэйн кино, 3D анимэйшн хэлбэрээр үргэлжилж "Нисдэггүй шувуу" нэртэй шинэ анги цацагдсан билээ. Хүүхэлдэйн киног  ЭНДЭЭС  үзэх боломжтой.