Цаг уур орчны шинжилгээний газраас өгсөн мэдээллээр нэгдүгээр сарын 20-ны байдлаар нийт нутгийн 80 гаруй хувьд цастай байна. Манай гэрэл зургийн сурвалжлагч Г.Өнөболд өнөөдөр (2024.01.30) Дундговь аймгийн нутгаар дайран өнгөрөхдөө дараах зураглалыг дурандаа буулгажээ.

Ташрамд мэдээлэхэд, ирэх хоёрдугаар сарын 1-5-ныг хүртэлх цаг агаарын урьдчилсан төлөв:

Хоёрдугаар сарын 2-нд Монгол-Алтайн уулархаг нутгаар, 03-нд баруун аймгуудын нутгийн зарим газраар, говийн аймгуудын нутгийн баруун болон өмнөд хэсгээр, 04-нд төв болон зүүн аймгуудын нутгийн зарим газар, говийн аймгуудын ихэнх нутгаар цас орно. Салхи ихэнх хугацаанд секундэд 5-10 метр.

Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө -38...-43 градус, өдөртөө -28...-33 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Ерөө, Туул, Тэрэлж, Хэрлэн, Улз, Халх голын хөндий, Дарьгангын тал нутгаар шөнөдөө -32...-37 градус, өдөртөө -19...-24 градус, говийн бүс нутгийн баруун өмнөд хэсгээр шөнөдөө -15...-20 градус, өдөртөө -3...-8 градус, Их нууруудын хотгор, Хангайн нурууны өвөр бэлээр шөнөдөө -19...-24 градус, өдөртөө -9...-14 градус, бусад нутгаар шөнөдөө -23...-28 градус, өдөртөө -14...-19 градус хүйтэн байна.