"Монгол Контент" ХХК 2005 оны аравдугаар сарын 1-нд үйл ажиллагаа эхлүүлсэн. "Монголын анхны дижитал контент компани" тодотголтой энэ хамт олон GoGo.mn үндэсний портал, цахим сайтыг 2007 онд "үйлдвэрлэв". Ингээд өнгөрснийг нэхэн бичээд л байна гэж бодов уу?. Үгүй дээ. Энэ удаад бид үүх түүх, мэдээ, сурвалжилга бичихгүй.

Харин 2007 оноос хойш 15 жил, 5475 хоног, 131,400 цагийн турш хамт байсан үзэгч, уншигчдадаа зориулан GoGo.mn-ийн камер, микрофоны ард хэн ажилладгийг танилцуулахыг зорилоо.

Өдөр тутмын мэдээ. Үйл явдлын сурвалжилга. Асуудал хөндсөн нийтлэл. Байр суурь. Үзэл бодол асуусан ярилцлага. Сүхбаатарын талбайн жагсаал. Ажил хаялт. Хандив тусламж. Барилаа, хорилоо. Өөр юу ч билээ, хаана ч билээ өчнөөн асуудал, амьдрал ундарч, үргэлж л цаг нарт шахагдаж, сэдэв санаанд "шатаж" явдаг хүмүүс энд ажиллана.

Энэ удаад их ажлаас түр амсхийж хамт олонтойгоо ярилцах, тэднийг хүнийх нь хувьд тодорхойлох сонирхолтой үүрэг надад оногдов. GoGo.mn сайтын хамгийн отгон ажилтан нь би. Ирц бүртгэлийн ухаалаг программ "Ажилласан жил: 11 сар 3 хоног" гэсэн хугацааг дэлгэцэд харуулж байна.

Ингээд аливаа ажилд үргэлж сэтгэл, зүтгэл нэгддэг нөхдөө тодорхойлбол:

НЭР: Р.АДЪЯАСҮРЭН
АЛБАН ТУШААЛ: ЕРӨНХИЙ РЕДАКТОР
GOGO.MN-Д АЖИЛЛАСАН ЖИЛ: 12

Тэр дандаа л завгүй суудаг. Ажилтны нийгмийн асуудал, амьдрал ахуй, компанийн төлөвлөгөө, гэрээ хэлэлцээр, бичиг цаас, ISO, ISAS стандарт гээд алийг нь ч орхигдуулахгүй амжуулагч. "Амжилт гэдэг амжуулахын л нэр" гэдэг хэний ч юм хэлсэн энэ үгийн голч агуулгыг бид түүнээс олж хардаг.

Ажил, амьдрал аль алинд нь гялалзаад л байх. Ажлын цаг дуусаад харвал "Хүн урт наслах биш чанартай л амьдрах ёстой" гэх философитой хөнгөн, дэврүүн. Гудамжинд дуулж, клубт бүжиглэж, эсхүл бүхнээс холдож, ганцаар үлдээд буйданд шигдэн ном уншаад суучхаж мэдэх нэгэн. Хөгжихийн төлөөх зогсошгүй хүсэлтэй, хөгжилдөж ч бас чаддаг томоогүй хүн.

Тэр үргэлж гал цогтой. Түүний байгаа газарт дандаа л инээд, хөөр дүүрэн, эрч хүч ундарч байдаг.

НЭР: Э.ЭНХМАА
АЛБАН ТУШААЛ: СЭТГҮҮЛЧ
GOGO.MN-Д АЖИЛЛАСАН ЖИЛ: 8 /НИЙТ АЖИЛЛАСАН ЖИЛ: 18/

Залуу сэтгүүлчид бидний их сургуулийн танхимд номоос уншиж, олноос сонсож, интернэтээс олж харсан "Далай ээж-Цаазын тавцанд" гэх алдарт нийтлэлийн эзэн Цэрэндоржийн Балдорж эрхлэгчийн редакц, "Өнөөдөр" сониноос ажлын гараагаа эхэлсэн шинэхэн сурвалжлагч түүний салбартаа хийсэн хоёр дахь шилжилт нь GoGo.mn сайт байв.

Монголын сэтгүүлзүйн салбарт манлайлагч редакцын гал тогоонд "чанагдаж", чадавхжиж, чамбайрсан сэтгүүлч тул бидний модератор. Дотоод, гадаадын томилолтууд, уулзаж ярилцсан зочдынхоо талаар сонирхолтой, сургамжтай, хөгжилтэй дурсамжаас хааяа ярих нь даанч амттай.

Олон жилийн туршлага үг, үйлдэл бүрээс нь мэдрэгдэнэ. Аливаа мэдээллийг маш сайн нягтална, баталгаажуулна. Олон талын эх сурвалжийг сонсоно. Үүний дараа л нийтэлнэ. Одоо цагт улам л ховордож буй "ясны" сэтгүүлч манайд бий. Тэр бол Э.Энхмаа. 

Мэргэжилдээ хайртай, ажилдаа үнэнч. Зөв шулуун, төв шударга. Тохь, түшигтэй нэгэн. Тэрбээр GoGo Gafe ярилцлагыг хөтлөн явуулдаг. GoGo Cafe-д ЭНД дарж саатаарай. 

НЭР: О.СҮХБАТ
АЛБАН ТУШААЛ: ВИДЕО ГРАФИКЧ
GOGO.MN-Д АЖИЛЛАСАН ЖИЛ: 14 /НИЙТ АЖИЛЛАСАН ЖИЛ: 15/

Манай "том ах". Ажилдаа гаршсан, бүгдийг мэдэгч. Тийм гээд бусдыг үл тоож, "би"-г өргөмжлөхгүй. Хариуцлагатай, хурдтай. Хэдэн жилийн өмнө тэр GoGo.mn-ийн зурагчин, зураглаачаар ажилладаг байв. Сонгууль, наадам чуулган, хэлэлцүүлэг, томилолт гээд арван зуу мянган арга хэмжээ, үйл явдлыг камерт буулгасан. Зураг дээр сурвалжилсан бүх үйл явдлын мандат нь харагдаж байна.

Харин одоо Агентлагийн хэлтсийн видео, графикийн ажлыг нугалдаг хүн болсон. Тэр GoGo.mn гэдэг сайт байгуулагдахаас өнөөдрийг хүртэл хичээл, зүтгэл, хөдөлмөр бүхнээ зориулан ажиллаж буй манай хууччуудын нэг.

Ажлын ийм арвин туршлагатай тул бид түүнийг "том ах" гэдэг.

НЭР: Б.ЭРДЭНЭЧИМЭГ
АЛБАН ТУШААЛ: РЕДАКТОР
GOGO.MN-Д АЖИЛЛАСАН ЖИЛ: 8 /НИЙТ АЖИЛЛАСАН ЖИЛ: 14/

Яагаад ч юм түүнийг харахаар "Айзам" хамтлагийн "Итгэл", "Чи минь", "Чамдаа зориулъя" гэх мэт аядуу, намуухан дуунууд санаанд ордог. Тэдний залууд, Туркт оюутан явахад нь энэ дуунууд хит болж байсан ч юм шиг, зүгээр л түүнийг тодорхойлох "зөөлөн" дуунууд болохоор ч тэр үү, мэдэхгүй.

Харцны чинь сайхан талимаанд автан байхдаа би
Хайрын чинь сайхан үгийг шимтэн сонсохдоо
Өөр хэнд ч өгөөгүй ариун хайраа
Өөрт чинь би өгөхдөө харамссангүй ээ..наая наая наая.

"Айзам"-ын энэ дууны үг шиг л ойлголцоход амар. Амбиц, асар хүнд бодол. Биеэ барьж бодлоо нуух маяг ч үгүй. Ил цагаан, эв зөөлөн хүн бол Б.Эрдэнэчимэг. Гаднах байдлыг тодорхойлбол дүрэлгэр нүдтэй. Дугараг царайтай. Жижиг, жижигхнээр хурдан хурдан алхана. Үргэлж яарч явна. Эдийн засгийн сэтгүүлч болоод тэр үү ажил, ахуй бүгдийг төлөвлөнө. Хааяа үүнийгээ зөрччихвөл хэлээ гаргадаг гэнэ сэргүй.

Тэрбээр Туркт бакалавр хамгаалсан. Харин тун саяхнаас СЭЗИС-ийн оюутан болж, магистрын зэрэгт шамдаж буй. Сэтгүүлч Б.Эрдэнэчимэг СЕО буланг хариуцан ажилладаг.  ЭНД  дарж буланд саатаарай.

НЭР: Б.АРИУНБИЛЭГ
АЛБАН ТУШААЛ: АЛБАНЫ ЗАХИРАЛ
АЖИЛЛАСАН ЖИЛ: 12

Их сургуулиа төгсөөд л "Монгол Контент" ХХК-аас ажлын гараагаа эхэлсэн тэрбээр өдгөө 12 дахь жилдээ ажиллаж байна. Өнгөрсөн хугацаанд компанийнхаа бүхий л бүтээгдэхүүн, үйлчилгээ болон харилцагч байгууллагуудтай хамтран олон төсөл, хөтөлбөрийг амжилттай хэрэгжүүлж ирсэн.

Чамбай, нямбай, зарчимч имиж түүнийх. Шинийг санаачилж, "Алив ээ, бид чадна аа" гэж урамшуулагч, дулаахан үгийн үйлдвэрлэгч. Угаас удирдан зохион байгуулах чадвартай төрсөн мэт ажил, мэргэжил нь түүнд тун чиг зохидог.

Хувь хүний хандлага талаас нь ажиглавал тэр маш цэвэрч. Энэ байдал нь гараа маш удаан, савандаад л, савандаад л угаадгаас анзаарагдана. Биеэ авч яваа байдал, мэдлэг боловсрол, эелдэг намуухан ааш аяг бүхнээрээ бидэнд үлгэрлэдэг. Хурлын өрөөнд, цахилгаан шат хүлээнгээ, цайны цагаар гээд таарах бүрдээ "Өнөөдөр та сайхан харагдаж байна" гэж өдрийн хэд магтмаар бүсгүй дээ, манай албаны захирал.

Нээрэн тэр Ла явдаг, Сан явдаг.  Хэл усандаа ус цас. Яах ч үгүй, зүгээр гайхуулсан юм, хэхэ.

НЭР: Г.ӨНӨБОЛД
АЛБАН ТУШААЛ: ГЭРЭЛ ЗУРАГЧИН, ВИДЕО ИНЖЕНЕР
GOGO.MN-Д АЖИЛЛАСАН ЖИЛ: 1 /НИЙТ АЖИЛЛАСАН ЖИЛ: 8/

Түүний дуранд бүх л амьдрал багтана. Заримдаа сайн зургийн эрэлд гараад Баянхошуугийн уулаар баахан алхана. Тэгснээ буцаж ирээд төрийн ордноос шууд дамжуулна. Усан борооноор жагсаал дунд явж л байдаг. Наадмаар Төв цэнгэлдэх, Хүй долоод харлаад л зогсож байна.

Тэр гоё, сайхан зураг гэхээс илүүтэй агшныг, мэдрэмжийг буулгахыг зорьдог. Дуулиан, шуугианаас илүү эгэлхэн амьдрал, орой гэртээ харихад зуухан дээр хоол буцалж, уур савсахын адил тийм л илч, дулааныг буулгах дуртай зурагчин, зураглаач.

Хор шар, атаа жөтөө, шатаж шаралхах шалтгаангүй нэгэн. "Ажлаа л сайн хийнэ дээ. Аяндаа бусад нь болчихно" гэх даруухан зорилготой, тэгээд л боллоо. Тиймдээ ч дэндүү амгалан амьдарна. Хаа хүрэхээ хэдийн мэдчихсэн хүн л ийм энгүүн байдаг биз. Хэзээ нэг өдөр түүний авсан зургийг WORLD PRESS-ээс харж ч магад. Учир нь тэр өөрийн дарсан зургаа дэлхийд түгээх зорилготой.

НЭР: А.НАРАНЦАЦРАЛ
АЛБАН ТУШААЛ: СЭТГҮҮЛЧ, ОРЧУУЛАГЧ
GOGO.MN-Д АЖИЛЛАСАН ЖИЛ: 11

Бодол санаа, зан төрх, аяг ааш аль нь ч элдэв маяггүй, энгийн, үнэн. Хэт драмлаг амьдралын хэнээнээс ангид орших монгол ахуйтай бүсгүй. Инээж л суудаг. Эрж, хайсан асуулт бүрд “Эгчид нь байгаа” гэж хариулдаг Жуужааг минь санагдуулам, буй бүхнээрээ “байдаг” эгч.

Хам хум амжуулах, хийсэн болох тааруу хүмүүжил түүнд үгүй. Орос, Англи, Япон хэлтэй. Тэр жендерийн мэдрэмжтэй сэтгүүлч. "Охидын тоглоом, хөвгүүдийн тоглоом, эмэгтэй хүний ажил, эрэгтэй хүний ажил гэж байхгүй. Зүгээр л хүүхдийн тоглоом, хүний ажил л гэж бий" гэх үзэлтэй, мэдрэмжтэй мэдээлэгч. Тэр төгөлдөр хуур тоглож, сонгодог хөгжим сонсох дуртай. Улсын филармоны уран бүтээлчдийн "улаан" фэн.

Сэтгүүлч А.Наранцацрал "Хүчирхийллийг үл тэвчье"  буланг хариуцаж ажилладаг. Булангийн мэдээллийг манай сайтын "мэдээ" цонхон дахь НИЙГЭМ  цэсээс унших боломжтой.

НЭР: Б.НЯМДАРЬ
АЛБАН ТУШААЛ: СЭТГҮҮЛЧ
GOGO.MN-Д АЖИЛЛАСАН ЖИЛ: 8 /НИЙТ АЖИЛЛАСАН ЖИЛ: 11/

Тэр бол төв. Ярихдаа ч хэлэхдээ ч, явахдаа ч, ирэхдээ ч, бичихдээ ч бодохдоо ч ерөөс бүхий л зүйлд төв. Хааяа нэг хошигноно. Хошигнох нь хүртэл худал, үнэний тэг дундуур тийм нэг төв. Ягштал цаг барьдаг. Ярьсан ч ажлаас хэтэрдэггүй. Дугуй жийгээд ирчихнэ, бас харьчихна. Ер нь л бусдад болоод өөртөө төвөггүй амьдардаг хүн дээ.

Амьтанд "ухаангүй" хайртай.  "Энэ дэлхий зөвхөн хүнд зориулагдаагүй" гэдгийг хоёр гараа, бас хөлөө өргөөд дэмждэг. Түүнийг гэрт нь, зусланд нь нохой, загас, шувуу, эмгэн хумснууд гээд олон амьтан хүлээж байдаг. Ажлын өдөр дуусаж амралтын хоёр хоног эхлэхэд өнөөх амьтад руугаа сэтгэл тэмүүлээтэй. Хаана ч юм таарах эзэнгүй муурт өгөх гэж "хоол" халааслаад гардаг дулаахан сэтгэлтэн.

Бид түүнийг "Боловсролын Нямдарь" гэж тодорхойлдог. GoGo.mn-д нийтэлж буй боловсролын салбарын мэдээ мэдээлэл, албаны хүмүүсийн ярилцлага, Сайдын шийдвэр, Засгийн бодлого, тогтоол бүхнийг Б.Нямдарь сэтгүүлч үндсэндээ "базна". Хүүхдийн сэтгэлзүйчдийн ярилцлага ч мөн түүнийх.

Б.Нямдарь сэтгүүлч боловсролын мэдээ, мэдээллээс гадна "Соёлын довтолгоо", "Элчин Сайд" буланг бэлтгэн хүргэдэг. Булангуудад ЭНД, ЭНД дарж саатаарай.

НЭР: А.ЭРХЭМБАЯР
АЛБАН ТУШААЛ: СЭТГҮҮЛЧ
GOGO.MN-Д АЖИЛЛАСАН ЖИЛ: 3

Тэр бол спортын хорхойтон. Хөл бөмбөг, сагсан бөмбөг, ширээний теннис, бокс, бөх, морь, сур. Pubg, dota-2 гээд сонирхохгүй, мэдэхгүй спорт ховор. Дэмждэг баг нь Liverpool, New York Knicks.

Тэр зохиолын дууны ганц ч мөр мэдэхгүй. Хурд, Харангын дуу явбал дахилтыг нь дутуухан аялна. Хааяа ах, эгч нартай том сэдвээр додигор яриа өрнүүлж шинжлэх ухаан, геополитик, түүхэн үйл явдлын тухай сураглах нь сүрхий.

Бас нэг сонирхол нь кино. Тэр өдөр бүр шахуу шинэ кино үзнэ. Түүнийгээ шүүн тунгааж ирээд "Би хувьдаа" гэж бидэнд сонирхуулан ярьж, шүүмж ч өрнүүлнэ. Тэр олон киноноос хамгийн дуртай нь Lord of the Rings, Hobbit, Fantastic Beasts, Kungfu Panda.

Уншдаг ном нь ч сүрхий. Ги де Мопассаны өгүүллүүд, "Дэлхий бөөрөнхий биш" "Хакеруудын нууц ажиллагаа" л гэнэ. Хааяа түүний сонирхол, яриа хөөрөө бидэнд хичээл заах нь бий. Ийм нэгэн догь сэтгүүлч манай спорт  цэсийг хариуцан ажилладаг.

НЭР: Х.КӨГЕРШИН
АЛБАН ТУШААЛ: СЭТГҮҮЛЧ, ОРЧУУЛАГЧ
GOGO.MN-Д АЖИЛЛАСАН ЖИЛ: 6

Хэн нэгэн урьтаж яриа эхлэхгүй л бол түүнийг даруухан гэж тодорхойлоод, тэр ойлголттойгоо л үлдэнэ. Гэтэл үгүй  ээ. Олон үггүй ч хаа нэг ёгсхийтэл голыг нь олж хэлчхээд ёжтой инээх нь хоржоонтой. Нэг их юм бодож, төлөвлөж, түүндээ түүртэж амьдрахыг хүсдэггүй. Өнөөдөр гоё байна, маргааш болно биз, ирээдүйд "Тэгээд л амьдарна даа" гэх бүүр, түүрхэн төлөвлөгөөтэй.

Орост бакалавр хамгаалж, Хятадад магистрт суралцсан. Зургаан орны хэлээр чөлөөтэй ярина. Олон ч оронд аялсан. Одоо ч явна, аялна гэж ярина. Бас ирнэ, амьдарна гэнэ.

Нэгэн хэвийн амьдрал, өглөө ирдэг, орой тардаг ажлаас илүү нэг тийм нисэж бууж, алдаж онож, амьдралыг огт өөр талаас нь мэдрэхийг хүсдэг, адал явдал хайгч. Тэр өөрөө л хүсвэл өнөөдөр ч үүргэвчээ үүрээд аялалд гарчхаж мэдэх элдэв хүлээсгүй, эрх чөлөөг хүсэгч. Эршүүд хэр нь эвлэгхэн хэв маяг,  донж төрхтэй.

Тэр манай улстөрийн сэтгүүлч.

НЭР: О.ХАНДМАА
АЛБАН ТУШААЛ: СЭТГҮҮЛЧ
GOGO.MN-Д АЖИЛЛАСАН ЖИЛ: 2

Тэр ихэнхдээ хүсэл, мөрөөдөл, догдлол мэдрэмжээ хуваалцана. Гэтэл заримдаа байж болох бүхий л инээдтэй сэдвийг бодолгүйгээр хамж яриад ханатлаа инээнэ. Хаа нэг хачин гүн харцтай болчихно. Тэгснээ гэнэтхэн дуу орж хавиар нэг инээд, энерги түгээх тодорхойлж боломгүй бүсгүй.

Сэтгэл хөдлөлөө нуудаггүй, нууж ч чаддаггүй тийм өөрийнхөөрөө, зоргоороо мэдрэмжийг нь, хүүхдийнх шиг гэнэн инээмсэглэлийг нь хамт олон нь хайрладаг юм. Бодол, төсөөлөл, мэдрэмж гэдэг үгсээр түүнийг тодорхойлж болохуйц.

Тэр Л.Өлзийтөгс, Г.Аюурзанын номуудад дуртай. Хамгийн дуртай ном нь Л.Өлзийтөгсийн "Үзэхийн хязгаар". Хичээж байгаа хүнийг амьдрал аяндаа шагнадаг гэдэгт итгэдэг. Амьдралаас их юм хүсдэггүй. Хийе гэснээ өөрийнхөө хүссэнд хүртэл хийгээд, тайван намуухан амьдрахыг илүүд үздэг нэгэн. Бас шинэ сорилтуудад дуртай.

"Сайн байна уу, GoGo.mn таныг зориод асуулт асуухаар хүрээд ирлээ" гэж эхэлдэг "GoGo-ийн асуултууд" буланг тэр бэлтгэдэг. Буланд ЭНД дарж саатаарай.

НЭР: А.БИЛЭГЖАРГАЛ
АЛБАН ТУШААЛ: ЗУРААЧ
АЖИЛЛАСАН ЖИЛ: 6

"Хүмүүс амжилт, эрх мэдэл, хөрөнгөнд шунаад амьдралд жинхэнэ аз жаргал өгдөг зүйлсийг мартдаг юм шиг санагддаг. Зүгээр л гадаа гараад агаар амьсгалж суух, тэнгэр ширтэх, эсхүл бороонд норох ч юм уу. Ийм жижиг зүйлсээс аз жаргал мэдрээсэй гэж боддог оо. Бүгд л цагтай уралддаг. Гэхдээ тэгж явахдаа аз жаргалаа битгий мартаасай. Бид амьдралын л төлөө яваад байдаг. Гэтэл үнэндээ амьдрал үүрд биш шүү дээ".

Тэр харав уу, манайд ийм л эгэл бүхнээс хайр мэдэрдэг, бас борооноос, цаснаас, өвлөөс хавраас ч хамаг сайхныг олж хардаг хүмүүс их ээ. Тэдний нэг нь Билэгээ.

Тэр маш олон төрлийн хөгжим сонсдог, хэв маягт баригдах хүсэлгүй нэгэн. Зах зухаас нь дурдвал Rap, Kpop, Pop, Metalic. Oird bol BE'O-Counting stars, Ali gatie-It's you, Xxxtentacion-Jocelyn Flores, Xxxtentacion-Hope, Dreamgirl-Teenage Blue, Eminem-Mockingbird, BIGBANG-Loser...За за энэ хүрээд зогсъё.

Сүүлд номын худалдаанаас Harper Lee-To kill a mockingbird, William Gording-Lord Of The авч уншсан гэнэ. Харин Geoge Orwell-Animal farm уншихаар Монголын яг өнөөгийн тогтолцоо харагддаг гэсэн.

Түүний хийдэг ажил тун ч сонирхолтой. Нэг ёсондоо өөрийнхөө тархинд цоо шинэ ертөнц бий болгоно. Жишээ нь, бидний мэдэх "Маамуу" хүүхэлдэйн киноны дүрийг хөгжүүлэхдээ Аами ямар хувцас өмсөх, Таамигийн сургууль ямар байх, тэр хоёрын очиж тоглодог ой, мод ямар хэлбэр, дүрстэй байх гэхчлэн дизайнерын шийдлүүдийг төсөөлөн бодож, зурдаг.

НЭР: Б.АРИУН
АЛБАН ТУШААЛ: МАРКЕТИНГИЙН МЭРГЭЖИЛТЭН
АЖИЛЛАСАН ЖИЛ: 15

GoGo.mn сайт нээгдээд 15 жил болсон. Үүний 12 жилд нь маркетингийн мэргэжилтнээр ажилласан хүн бол Б.Ариун. Анх оператораар ажилд орж GoGo Map, GoGo Music, GoGo Karaoke, GoGo Tv зэрэг бүхий л үйлчилгээнд ажиллаж ирсэн, манай арвин туршлагатай ажилчдын нэг.

Анх ажилд ороод харилцагч, үйлчлэгч нартай "GoGo.mn сайтаас холбогдож байна" гээд ярихаар "Хаанаас гэсэн бэ" гэх лавласан асуулт зайлшгүй дагалддаг байж. Энэ асуулт яваандаа "Миний өнөөдрийн зурхайг хараад өгөөч", "Үс засуулахад ямар өдөр вэ", "Бэр гуйж болох болов уу", "И-баримтын мөнгө хэзээ орох вэ" болж хувирчээ. Өдрийн зурхай, цаг агаарын мэдээгээ GoGo.mn-ийг сонгон уншиж, өглөөг эхлүүлдэг хүн олон доо.

Эелдэг инээмсэглэл, хонхорхой хацарт хөөрхөн Ариун маань тун саяхан компани дотроо алба, хэлтсээ сольсон. Харин түүний ажлыг  А.Аргынбек хүлээн авч, GoGo-ийн Маркетингийн мэргэжилтнээр ажиллаж байна. Манай маркетингтай холбогдох дугаар сайтын доод буланд "Холбоо барих" цонхонд бий.

НЭР: Б.ЭНХМӨРӨН
АЛБАН ТУШААЛ: МАРКЕТИНГИЙН МЭРГЭЖИЛТЭН
АЖИЛЛАСАН ЖИЛ: 3

Түүний инээж, ярьж, ажиллаж байгааг харахад "Үхсс, энэ амьдралд асуудал байгаа юм уу" гэж бодогддог. Учир нь тэр бүхнийг зохицуулдаг, болгодог, бүтээдэг  эрч хүч юм.

Тэр ямар ч их ажилтай байсан хажуу, хавийнхантайгаа хошигнож амжина. Ихэнх хүмүүс хаха үгүйдээ л хэхэ гэж инээдэг байхад Энхмөрөнгийн инээд л надад хохо гэж сонсогддог. Тэр инээд нь цагаахан, гэгээхнийг нь илтгэнэ.

Түүний хамгийн их хэлдэг үг "НӨАТ нь хаана байна", "Сайн байна уу, Монгол Контент компаниас ярьж байна". Тендер, төсөлд түүний оролцоо чухал. Хамтрагч байгууллагуудын маркетинг, сурталчилгааг хийнэ. GoGo.mn сайтын контентыг олон нийтэд хэрхэн хүргэх талаар төлөвлөгөө зохионо. Ийм олон ажлыг инээж байгаад л амжуулчихдаг, энерги түгээгч манайд бий...

Ер нь маркетингийнхаан гэж хэн ч анзаардаггүй, хэнд ч анзаарагддаггүй хэр нь тун ч их ажилтай хүмүүс байдаг даа.

НЭР: Ч.БАДАМГАРАВ
АЛБАН ТУШААЛ: ПРОГРАММ ХӨГЖҮҮЛЭГЧ
АЖИЛЛАСАН ЖИЛ: 4

Манай IT-ийн залуус бусадтай төдийлөн сэтгэл, мэдрэмжээ уудлаад, эмороод байхгүй. Эсхүл завгүй ч юм уу, ямартай ч дуугүй төрлийн хүмүүс. Ихэнх цагийг компьютерын ард өнгөрүүлж, бидний харахад жирэлзсэн олон тоо, үсэгтэй код дунд л сууж байдаг. Тэд өдөр бүр үндсэн ажлаасаа гадна бусад алба, хэлтсийнхэндээ дэмжлэг үзүүлнэ.

Ч.Бадамгарав "Монгол Контент" ХХК-д дөрөв дэх жилдээ ажиллаж байгаа программист. Сүүлийн жил компанийн брэндингэд анхаарч, GoGo.mn сайтын шинэчилсэн хувилбарыг бүтээхэд голлох үүрэгтэй ажилласан.

Энэ талаар "Сайтын уншигчдад цаг үеийн мэдээ, мэдээллийг илүү хурдан, хүртээмжтэй, энгийн байдлаар хүргэхэд түлхүү анхаарсан. Тухайлбал, сайт ачаалах хурдыг илүү сайжруулж, шинэ цэсүүд нэмж, өмнөх өдрүүдийн мэдээг цаг хугацаагаар шүүж харах боломжтой болсон" гэсэн юм.

Өдөр бүр л ямар нэгэн шийдэх шинэ асуудлууд гарч ирж, түүнд гаргалгаа хайдаг тул ажил нь түүнд тун ч сонирхолтой санагддаг гэнэ лээ. Загвар өмсөгч байж болмоор өндөр. Комеди ч ярьчихмаар марзан.

Заримдаа оффис дотор хар нүдний шил зүүчихсэн сууж харагдана. Асуухаар "Нүдээ хамгаалж байна" гэдэг. Тусламж, дэмжлэг хүссэн асуулт бүрд болохгүй гэж огт цааргалдаггүй "Болох байх аа, за одоохон" л гэдэг бүтээгч билээ, тэр.

НЭР: Г.ТЭГШСҮРЭН
АЛБАН ТУШААЛ: СЭТГҮҮЛЧ
GOGO.MN-Д АЖИЛЛАСАН ЖИЛ: 11 САР

Эцэст нь, энэ бол би. GoGo.mn сайтын сэтгүүлчээр 2021 оны долдугаар сараас ажиллаж эхэлсэн. Анх ажилд ороход хамгийн түрүүнд ойлгомжтой байдал нь таалагдаж билээ. Өнөөдөр хэн, хаашаа явах, ямар мэдээ, сурвалжилга бичих, түүнийгээ хэдэн цагт дуусгах. Ерөөс хэн, юу хийх нь тов тодорхой.

Найз дундаа орж маазраад л ажлын цагийг үр бүтээлгүй өнгөрөөх ойлголт захиралд ч ажилтанд ч байдаггүй. Бүгд ажилдаа чин сэтгэлээсээ ханддаг, бүгд нэг зүгт, нэг зорилгод нэгдсэн бол нэг нь ч хойш суулгүй хамтдаа хичээдэг. Ингээд их ажлын ард хамт олноороо гарчхаад инээлдэж суухын сайхныг нь ээ. Нэг тийм хүндлэх шалтгаантай хүмүүс нэг дор цугларчихсан шиг санагддаг.

Би гитар хөгжимд зүрхнээсээ хайртай. Аm, Dm, G, С, Em бас F, Fm аккорд байхад амьдралд өөр нэг их юм хэрэггүй дээ. Ер нь аливаад амархан шантардаггүй, амьдарч байгаа орчиндоо ач холбогдол өгч, байгаагаа бусдынхтай харьцуулж миардаггүй, байгаадаа сэтгэл дүүрэн хөнгөхөн амьдрахыг л хичээдэг.

Миний хувьд "ГУТАЛ" цувралыг бэлтгэдэг. Буланд ЭНД дарж саатаарай.

GoGo.mn сайтын ард ийм хүсэл тэмүүлэл, бодол мөрөөдөлтэй, ийм уран бүтээлчид ажилладаг юм. Энд багтсан хүмүүс "Монгол Контент" ХХК-ийн ажилчдын хэсэгхэн нь. Бүгдийг нь багтаахад их цаг зарцуулах тул энэ удаад төлөөллийг л онцоллоо.

Сониноос, Дэлхийд өрсөлдөх Монгол агуулгыг бүтээх зорилготой "МОНГОЛ КОНТЕНТ" ХХК  Олон улсын чанарын удирдлагын тогтолцоо ISO 9001:2015 болон хэвлэл мэдээллийн салбарын ISAS MEDIA 9001:2016 стандартыг үйл ажиллагаандаа амжилттай нэвтрүүлсэн.

Ингэснээр GoGo.mn ISO, ISAS стандарт нэвтрүүлсэн анхны хэвлэл мэдээллийн байгууллага болсон юм. Энэ хүртэл уншсан та бүхэнд баярлалаа.

Ташрамд, 15 жилийн турш GOGO.MN-тэй хамт байсан эрхэм уншигч, хамтрагч байгууллага, хамт олон бүхэнд чин сэтгэлийн талархал илэрхийлье. Мөн өнгөрсөн хугацаанд байгууллага, хамт олныхоо төлөө хөдөлмөр, сэтгэлээ зориулан хамтран зүтгэж байсан үе, үеийн ажилтнууддаа ойн баярын мэнд хүргэе.