"Хөгжлийн банкны" гэх хэргийн гэм буруугийн шүүх хуралдаан үргэлжилж байна.

Хөгжлийн банкны гүйцэтгэх захирал асан Н.Мөнхбат "Яллах дүгнэлтэд ойлгохгүй байгаа хэд хэдэн зүйл байна. Надад хамаарах хэсэгт ЗГ-ын болон ТУЗ-ийн тогтоол гаргаж гэх мэтчилэн зүйл дурдлаа. Намайг ЗГ эсхүл ТУЗ-ийн тогтоол гаргасан гэж буруутгаж байгаа юм уу? Үүнийг он, сартай, гэрээтэй нь тодруулж хэлэх боломжтой юу?

Жишээлбэл, "Эрдэнэс Монгол" компанид олгосон зээлтэй холбоотойгоор Хөгжлийн банкны захирлын зөвшөөрлөөр 170 тэрбум төгрөгийг шилжүүлэн бодит өртгөөс илүү өндөр үнээр замыг нь худалдан авсан гэх мэтчилэн асуудал хэлж байна. Үүнд намайг буруутгаад байна уу, энэ ямар учиртай вэ?

Мөн "Бэрэн групп" ХХК-ийн зээлтэй холбоотой намайг буруутгасан байна. 2014-2017 оны хооронд 7 удаагийн санхүүжилт хийсэн гэнэ. Би 2017 оны 11 сард ажлаа өгөөд, албан тушаал хашилгүй жил гаруй болчихсон байсан. Энэ 7 санхүүжилт дотор надтай холбоотой нь хэд байгаа вэ?

Намайг улстөрийн нөлөө бүхий албан тушаалтан гэж зүйлчилсэн байна. Би амьдралдаа улстөрийн нөлөө бүхий албан тушаалтан байж үзээгүй. Үүнийг яллах дүгнэлт дотроос хайгаад олсонгүй" гэж тодруулав.

Үүнд прокурор "Улстөрд нөлөө бүхий этгээд гэж хэн бэ гэж Эрүүгийн хуулийн тайлбарт байдаг. УИХ-ын гишүүн, ТНБД гэх мэт улстөрд нөлөө бүхий этгээдүүдийг хуульд тодотгосон байгаа. Өөрөөр хэлбэл, шүүгдэгч өөрөө заавал улстөрд нөлөө бүхий байхыг шаардаагүй. Н.Мөнхбатын тухайд захирлаар ажиллаж байхдаа Н.Алтанхуяг, Н.Батбаяр гэх улстөрд нөлөө бүхий этгээдүүдтэй бүлэглэж, албан тушаалын байдлаа ашиглан бусдад давуу байдал бий болгосон. Энэ зүйл заалтад хамаарч байна" гэлээ.