Энэ сарын 1-ний өдрөөс эхлэн замын хөдөлгөөний зөрчлийг хиймэл оюунаар илрүүлэн шийдвэрлэх автомат хяналтын систем ажиллаж эхэлсэн. 

AI-д суурилсан замын хөдөлгөөний зөрчил илрүүлэх систем хэрэгжиж эхэлсэн эхний зургаан хоногт 6800 орчим зөрчил бүртгэгдэж, үүнээс 6300 орчим нь иргэдэд зөрчил болж очжээ. Уг системийн хүрээнд дугаар халхалсан тээврийн хэрэгслийг бодит цагийн горимоор илрүүлж, шууд арга хэмжээ авч байгаа талаар ЗХУТ ОНӨТҮГ-ын Хөдөлгөөн зохицуулалт, хяналтын хэлтсийн дарга Н.Намуугаас тодрууллаа. 

-Камержилт Улаанбаатар хотын ямар байршлуудыг хамарч байна вэ?
-Улаанбаатар хотын гэрлэн дохиотой бүх уулзвар буюу явган хүний гарц, гурав болон дөрвөн замын уулзваруудыг хамарсан нийт 176 гэрлэн дохиотой уулзварт камер суурилуулсан. Ер нь гэрлэн дохио байгаа л бол тухайн байршилд камер ажиллаж байна гэж ойлгож болно.

-Дугаараа уутаар бүрхэх, халхлах, стандартын дагуу байршуулаагүй тохиолдолд хиймэл оюун зөрчлийг илрүүлж чадаж уу? 
-Тээврийн хэрэгслийн улсын дугаарыг уутаар бүрхэх, халхлах, стандартын дагуу байршуулаагүй тохиолдолд AI систем тухайн дугаарыг таньж чадахгүй байна гэдгийг Тээврийн цагдаагийн байгууллагад мэдээлдэг. 

-Танигдаагүй дугаарын мэдээллийг яаж шалгаж, шийдвэрлэдэг вэ?
-Танигдаагүй дугаарын мэдээлэл бодит цагийн горимоор дараагийн уулзварууд руу дамжиж, тухайн чиглэлд үүрэг гүйцэтгэж буй цагдаагийн алба хаагчдад мэдээлэл очдог.

Үүний дагуу жишээлбэл “Баруун дөрвөн замын уулзвар дээр дугаар нь танигдахгүй тээврийн хэрэгсэл Бөмбөгөр зах руу чиглэн явж байна” гэх мэт мэдээлэл дамжуулж, дараагийн уулзвар дээр зогсоон газар дээр нь арга хэмжээ авдаг.

-Дугаар танигдахгүй байвал зөрчил илрүүлж чадахгүй юу? 
-Дугаар танигдахгүй байна гэдэг нь торгууль ногдуулахгүй гэсэн үг биш. Харин ч эсрэгээрээ дугаарын стандарт зөрчсөн гэдэг үндэслэлээр шалгагдаж, холбогдох зөрчлийг арилгуулах арга хэмжээ авдаг.

-Дугаар бүдгэрсэн, шүршсэн, стандартын бус байршилтай бол яах вэ?
-Хэрэв дугаар бүдгэрсэн, шүршсэн, эсвэл стандартын бус байршилтай бол AI систем тухайн зөрчлийг илрүүлж, эрх бүхий албан тушаалтанд шилжүүлэн шалгуулдаг. Дээрх дурдсан шиг цагдаагийн ажилтанд мэдээллийг нь илгээж тухай бүрд нь арга хэмжээ авна гэсэн үг.

-Систем хэрэгжиж эхэлснээс хойш зөрчлийн тоо буурсан уу?
-AI систем хэрэгжиж эхэлсэн эхний зургаан хоногийн хугацаанд нийт 6,800 орчим зөрчил бүртгэгдэж, үүнээс 6,300 орчим нь иргэдэд зөрчил болж очсон.

Өдөрт дунджаар 20 гаруй дугаар халхалсан зөрчлийг илрүүлж, газар дээр нь арилгуулж байгаа бөгөөд энэ төрлийн зөрчил мэдэгдэхүйц буурсан.

-Өмнөх үеийнхтэй харьцуулахад ямар өөрчлөлт гарсан бэ?
-Системийг хагас жилийн хугацаанд туршиж байхад зөвхөн мэдээллийн шинжтэйгээр өдөрт 70 мянга орчим мессеж иргэдэд илгээгддэг байсан бол, одоо торгууль бодитоор хэрэгжиж эхэлснээр өдөрт 1000-2000 зөрчил болж буурсан байна. 

-AI системийн илрүүлсэн зөрчилтэй холбоотой гомдлыг хаана гаргах вэ?
-AI системийн илрүүлсэн зөрчилтэй холбоотой гомдлыг Цагдаагийн байгууллага хүлээн авч, шалгаж шийдвэрлэдэг. Камержилтын системийг Замын хөдөлгөөний удирдлагын төв хариуцдаг ч торгууль ногдуулах, цуцлах эрх нь зөвхөн цагдаад хамаарна.

-“Шалгагдаж байна” гэсэн мессеж иргэдэд очих болжээ. Энэ нь ямар утгатай вэ?
“Шалгагдаж байна” гэсэн мессежийг зарим иргэн торгууль гэж эндүүрэх тохиолдол байдаг. Гэвч буруу тогтоогдсон зөрчил бодитоор шалгагдаж, үндэслэлгүй бол цуцлагддаг.

-Цаашид AI системээр ямар зөрчлүүдийг илрүүлэх вэ?
-Одоогоор AI систем нь

• Гэрэл дохио зөрчих
• Зохих эгнээ бариагүй
• Замын тэмдэг, тэмдэглэгээг зөрчин эгнээ солих, буруу эгнээгээр зорчих зөрчлийг илрүүлж байна.

Цаашид уулзвар руу орох хориотой үед нэвтрэх, явган хүний гарц дээр зогсох, түр зогсохыг хориглосон хэсэгт зогсох зэрэг нийт 10 орчим төрлийн зөрчлийг үе шаттайгаар нэмэхээр ажиллаж байна.

-Мэдээлэл өгсөн баярлалаа.