Сургуулийн өмнөх болон бага боловсролын сургалтын хөтөлбөрийг шинэчлэн боловсруулах, сурах бичгийн эх зохиох, дасгал ажлын дэвтрийг боловсруулах багийн ажил өнгөрсөн 2024 оны наймдугаар сараас эхэлсэн.

Энэ үеэр Боловсролын сайд П.Наранбаяр “Дуржигнатал уншиж байгаа хүүхдээс юу ойлгосныг нь асуухаар "Юу ч ойлгоогүй" гэдэг. Тиймээс минутын уншлага гэдэг зүйлийг эргэн эргэн харах цаг болсон. Уншаад, уншиж буй зүйлийнхээ дотор орж ойлгоод, түүнийгээ илэрхийлж чаддаг хүүхдүүд бий болгох нь академи боловсрол” гэж ярьж байжээ.

Харин өчигдөр (2025.07.29) сайдын ахалдаг Боловсролын үндэсний зөвлөл хуралдаж сургуулийн өмнөх болон бага боловсролын сургалтын хөтөлбөрийн шинэчилсэн төслийг хэлэлцсэн байна. УИХ-ын 2023 оны хаврын чуулганаар Боловсролын багц хуулийг шинэчилж, Боловсролын үндэсний зөвлөлийг байгуулсан. Тус зөвлөл нь төрийн болон төрийн бус байгууллага, их дээд сургууль, оюутан, сурагчдын төлөөллийн байгууллага, иргэний нийгмийн байгууллага, судлаачийн төлөөллийн бүрэлдэхүүнтэй.

Зөвлөлийн өчигдрийн хурлаар:

• “Сургуулийн өмнөх боловсролын хөтөлбөр”-ийг батлахыг дэмжсэн бол
• “Бага боловсролын хөтөлбөр”-ийг сайжруулах шаардлагатай гэж үзжээ.

Сургуулийн өмнөх боловсролын хөтөлбөрийг 30 хүртэл хувиар шинэчилж, багш нарт зориулсан гарын авлага, дасгал ажлын дэвтэртэйгээр боловсруулсан байна. Харин бага боловсролын хөтөлбөрт агуулгын өөрчлөлт оруулжээ. Хөтөлбөрийг аймаг, нийслэлийн цэцэрлэг, сургуулиудад туршин хэрэгжүүлж, олон шатны хэлэлцүүлэг, экспертүүдийн дүгнэлт, зөвлөмж дээр үндэслэн сайжруулж буй юм.

Сургуулийн өмнөх болон бага боловсролын сургалтын хөтөлбөрийн шинэчилсэн төслийг баталснаар 2025-2026 оны хичээлийн жилээс сургуулийн өмнөх боловсролын хөтөлбөр болон бага боловсролын 1-2-р ангийн хөтөлбөр, сурах бичиг шинэчлэгдэх юм.

 Боловсролын сайд П.Наранбаяр хөтөлбөрийг боловсруулах багаас дараах өөрчлөлтийг хүлээж буйгаа онцолсон. Үүнд:

• Унших, уншаад ойлгох, ойлгосноо хэрэглэх чадварыг дээшлүүлэхийн тулд минутын уншлагыг эргэн харж, хүүхдийн сэтгэхүйд тохирсон, утга зохиолд хөтөлсөн, сэтгэлгээг задалсан сурах бичгийг боловсруулан, унших бичгийг сэргээх;
• Дэвшилтэт технологи, цахим ертөнц хөгжиж буй энэ үед хүүхдийн бүтээлч сэтгэхүйг дэмжихийн тулд шинэ сурах бичгүүдийг интерактив буюу мэдээлэл технологитой хорших боломжтой болгох;
• Гэрийн даалгавар, хичээлийн ачааллыг бууруулах, хүүхдэд алдах, алдаанаасаа суралцах эрхийг нь олгох үүднээс балын харандаагаар бичүүлж, хичээнгүй бичигт зарцуулах цагийг багасгаж, бүтээлч ажлын цагийг нэмэгдүүлэх;
• Хүүхэд сургууль дээрээ хичээлийн бус цагаар сууж, давтлага хийдэг байдлыг халахад чиглэсэн агуулгаар сургалтын хөтөлбөр, сурах бичиг, дасгал ажлын дэвтрийг боловсруулах;
• Англи хэл сургалтын үндсэн гадаад хэл болсон. Гадаад хэл сурч байгааг мэдрэхгүйгээр сурах нь хамгийн сайн арга бөгөөд давталт хамгийн чухал. Бага насны хүүхэд нэг хүүхэлдэйн киног олон давтан үзэж чаддаг. Энэ онцлогт нь тохирсон сурах бичгүүд боловсруулах.