Хөшигийн хөндийн газар чөлөөлөлтийн талаар мэдээлэл хийж байна.

Монгол Улсын Их хурлын 2020 оны 52-р тогтоолоор баталсан “Алсын хараа-2050”, Монгол Улсын урт хугацааны хөгжлийн бодлогод “Шинэ Зуунмод” дагуул хотын бүтээн байгуулалтыг эхлүүлж, инженерийн шугам сүлжээ, орон сууцжуулах ажлыг үе шаттайгаар хэрэгжүүлэх зэрэг цогц зорилтыг дэвшүүлсэн.

Энэ бодлогын хүрээнд Төв аймгийн Сэргэлэн, Алтанбулаг сумын нутаг дэвсгэрт хот байгуулалт, дэд бүтцийн чиглэлээр үндэсний хэмжээний томоохон төсөл, хөтөлбөрүүдийг хэрэгжүүлэхэд шаардлагатай нийт 19390.4 га газрыг Газрын тухай хуулийн 16 зүйлийн 16.1.13-д заасны дагуу улсын хэрэгцээнд авахаар газар зохион байгуулалтыг хийж байна.

Барилгын хөгжлийн төвийн тэргүүн дэд дарга О.Одбаяр "Нисэх онгоцны буудал байгаа учраас Ази-Европыг холбосон тээвэр ложистикийн төвийг бий болгохоор төлөвлөсөн. Мөн ажлын байрыг холбосон үйлдвэр, технологийн паркийг төлөвлөсөн.

Хөшигийн хөндий орчмыг 150 мянга орчим хүн амтай дагуул хот болгохоор төлөвлөлт гарсан. Мөн шинэ нисэх онгоцны буудлыг түшиглээд аялал жуулчлал, эдийн засгийн төвийг байгуулах юм. Энэ ерөнхий төлөвлөгөөтэй холбогдуулан Төв аймгийн Сэргэлэн сумыг хотуудыг холбох эдийн засаг, хүнс, хөдөө аж ахуйн бараа бүтээгдэхүүнээр хангах төв болгохоор төлөвлөсөн" гэв.

Газар зохион байгуулалт, геодози, зураг зүйн газрын орлогч дарга М.Буяндэлгэр “Улсын тусгай хэрэгцээнд авахаар төлөвлөж байгаа 19 мянган га газарт газар чөлөөлөх ажлыг зохион байгуулахаар Барилга хот байгуулалтын сайдын тушаалаар газар чөлөөлөх ажлын хэсэг байгуулагдсан. Энэ бүсд 3173 иргэн, аж ахуй нэгж байгууллага газар ашиглаж, өмчилж байгаа.

Засгийн газрын 2017 оны тогтоолоор Газрыг улсын тусгай хэрэгцээнд авах журмын дагуу газар чөлөөлөх ажлыг зохион байгуулна. Үүнд, газрыг нөхөн олговортойгоор солих, хууль бус газар олголтуудыг цуцлах арга хэмжээ явагдах юм. Эхний ээлжинд 76 иргэн, аж ахуй нэгжийн газар эзэмших, ашиглах эрхийг цуцлахаар болсон.

Тийм учраас Төв аймгийн Алтанбулаг, Сэргэлэн суманд газар эзэмшиж, ашигладаг, өмчилдөг иргэн аж ахуй нэгж байгууллагууд өнөөдрөөс буюу 2021 оны долдугаар сарын 29-ний өдрөөс наймдугаар сарын 15-ныг хүртэл хугацаанд Төв аймгийн Газрын харилцаа, хот байгуулалтын албанд ирж тайлбар саналаа хэлэхийг хүсч байна” гэлээ. 

/Бичлэгийг тоглуулж болохгүй бол ЭНД дарж үзнэ үү./