Хөвсгөл аймгийн Тариалан суманд алга болсон хүүгийн цогцсыг анх алга болсон байршлаас 3-4 км зайтай газраас олдсоныг ЦЕГ-аас мэдээлсэн.

Тус сумын Баянхошуу багийн “Сайхан мод” гэх газарт бага насны хүүхэд сураггүй болсон тухай дуудлага энэ сарын 17-ны өдөр бүртгэгдсэн бөгөөд ес дэх хоногтоо эрэн хайж байв.

Эл хэргийн эрэн хайх ажиллагааны талаар ЦЕГ-аас дараах тодруулгыг хүргэж байна.

ЦЕГ-ын Хэвлэл мэдээллийн төлөөлөгч хэлэхдээ, "Өнөөдөр 16 цагийн орчимд хоёр настай хүүгийн цогцсыг анх алга болсон газраас 3-4 км-ын зайтай газраас оллоо. Өмсөж явсан хувцастайгаа олдсон. Харамсалтай үйл явдал боллоо. Цагдаагийн байгууллагаас хуульд заасан чиг үүргийн дагуу үүрэг гүйцэтгэн ажиллаа. Мөрдөн шалгах ажиллагаа үргэлжилж байна.

Одоогоор хүүгийн биед гэмтэл шарх үүссэн эсэх болон бусад нөхцөл байдлыг тодруулахаар шалгаж байна. Эрэн хайх ажиллагаа хийсэн газар мод, тал хосолсон байсан. Хүүг нэг хоногийн өмнө ч болтугай олъё гэж цагдаагийн байгууллага, иргэд хамтран ажилласан. 

-Хүүхдийн цогцос ил харагдах шархгүй байсан гэсэн. Энэ талаар мэдээлэл өгөөч.
-Мөрдөн шалгах ажиллагаа үргэлжилж байна. 

-Хүүгийн цогцсыг анх алга болсон байршлаас 3-4 км зайтай газраас олсон гэсэн. Эрлийн ажил эхэлсэн эхний өдрөөс тухайн бүс нутагт хайгуул хийгээгүй юм уу? 
-Одоогоор эрэн хайх ажиллагааг ямар маршрут чиглэлээр явсныг шууд хэлэх бүрэн мэдээлэлгүй байна. Тодорхой байгууллагын чиг үүрэг бүхий алба хаагч нар ахлаад ажилласан. Дээрх эрэн хайх ажиллагаанд иргэд, төрийн албан хаагчид хамтарсан.

-Олон нийтийн зүгээс үнэрч нохой хайгаад олох боломжгүй байсан юм уу гэдгийг их асууж байна. 
-Өнөөдрийн байдлаар цогцос олдсон газрыг анх алга болсон гэх газраас 2-3 км-ийн зайтай байсан гэж ярьж буй. Мөрдөн шалгах ажиллагааны явцад тухайн газраар эрэн хайх ажиллагааг хийсэн үү, мөн олох боломжгүй нөхцөл байдалтай газар байсан уу гэдгийг давхар шалгана.

-Шалгалт хэр хугацаанд үргэлжлэх вэ? 
-Хүн амиа алдсан хэргийг мөрдөн шалгахад хугацаа их ордог. 

-Хүүгийн бие цогцост хийх дүн шинжилгээг хэрэг гарсан аймагт үргэлжлүүлэх үү, Улаанбаатар хотод авч ирэх үү? 
-Мөрдөн шалгах ажиллагааг прокурорын байгууллагын удирдлага дор хэрэгжүүлдэг тул нэмэлт мэдээлэл өгөх боломжгүй байна" гэв.