Балбад эсэргүүцлийн жагсаал өрнөж байна. Тус улсад байгаа Монгол Улсын иргэдийн нөхцөл байдлын талаар Гадаад харилцааны яамнаас “Одоогоор Балба Улсад Монгол Улсын дөрвөн иргэн байгаа гэх мэдээлэл байна. Дели дэх ЭСЯ тухайн иргэдтэй холбоотой ажиллаж, үйл явдлыг анхааралтай ажиглаж байна. Бүгд зочид буудалдаа аюулгүй байна, хоол хүнсний хангамж тасраагүй. Балба дахь өргөмжит консул болон Дели дэх ЭСЯ-аас тогтмол холбоотой ажиллаж байна.

Мөн шашны чиглэлээр суралцаж байгаа 11, 13 настай хоёр хүүхэд байгаа. Хариуцсан багштай нь тогтмол холбоотой ажиллаж байна. Аюулгүй нөхцөл байдалд байгаа” гэлээ.

Балбад Монгол Улсын нийт 6 иргэн буй бөгөөд тэднийг аюулгүй байгааг Гадаад харилцааны яамнаас мэдээлэв. Ташрамд мэдээлэхэд, Балба улсын Z үеийн төлөөллүүд цахим орчинд улстөрч, эрх баригчдын хүүхдүүдийн тансаг хэрэглээг хурцаар шүүмжилжээ. Үүний хариуд Засгийн газраас нь цахим сүлжээг хориглох шийдвэр гаргасан. Үүнийг эсэргүүцсэн Z үеийн төлөөллүүд эсэргүүцлийн жагсаал өрнүүлж буй. Энэ жагсаалын үеэр 19 хүн амь үрэгдэж, 400 гаруй иргэн бэртсэн гэж мэдээлж байгаа. 

Мөн эсэргүүцлийн жагсаалын үеэр парламентын байр, зарим хэвлэл мэдээллийн байгууллагын барилга шатсан. Үймээний дараа Ерөнхий сайд К.П.Шарма Оли нь огцорсон зэрэг үйл явдал өрнөж байна.