Засгийн газрын өнөөдрийн ээлжит хуралдаанаас гарсан шийдвэрийг Зам, тээврийн сайд Б.Дэлгэрсайхан танилцууллаа. 

Тэрбээр, "Өнөөдрийн хуралдаанаар Гашуун сухайт, Ганц модны авто болон төмөр замын нүүрсний экспортын асуудлаар мэдээлэл хийлээ. Үндсэн зорилго нь үлдэж буй хугацаанд экспортын тээвэрлэлтийг нэмэгдүүлэх юм.

2025 онд Ганц мод, Гашуун сухайт, Сэхээ, Шивээ хүрэн, Хангимандал боомтоор нүүрс хэвийн экспортлогдож байна.

Ганц мод, Гашуун сухайт боомтоор одоогоор 41.2 сая тонн нүүрс экспортлогдсон.

Цогтцэцийгээс ирсэн төмөр замыг Ганц мод, Гашуун сухайттай холбох ажил 6 дугаар сард гэрээ хийж эхэлсэн бөгөөд хэвийн үргэлжилж байна. Төмөр зам ашиглалтад орсноос хойш анх удаа энэ жил 3.5 сая тонн нүүрс төмөр замаар тээвэрлэгдсэн. Цаашид, 

• Он гарснаар МТЗ (Монголын Төмөр Зам) өдөрт 8-9 цуваа галт тэрэг явуулах төлөвлөгөөтэй.
• Галт тэргээр ирсэн нүүрсийг Гашуун сухайт боомт дээр буулгаж, машины тээвэрлэлтээр цаашаа гаргаж байна.
• ЗГ-аас өгсөн үүргийн дагуу хоногт 150 мянган тонн нүүрс гаргах зорилттой ажиллаж байна.

Машины тээвэрлэлтийн хүндрэлээс шалтгаалан гацаа үүсэж байсан ч шуурхай арга хэмжээ авч, өнөөдрийн байдлаар хоногт 1400 машин нүүрс экспортолж байна.

Ирэх жилүүдэд, 

Төмөр замаар 10 сая тонн нүүрс экспортлох төлөвлөгөөтэй. Хил холболтын төмөр замын ажил одоо 18 хувьтай байгаа бөгөөд гэрээний хугацаанд дуусгахаар ажиллаж байна. 2027 оны 4 сарын эхээр ашиглалтад орсноор жилдээ 30 сая тонн нүүрсийг төмөр замаар экспортлох боломжтой.

Машин болон төмөр замын нийлбэр экспортын хэмжээ 2027 оноос 100 сая тонноос давна гэж тооцож байна.

Мөн Ганц мод, Гашуун сухайт, Цагаан хад дахь нүүрс буулгалтын талбайн тээврийг нэмэгдүүлэх ажлыг энэ оны үлдсэн 20 хоногт эрчимжүүлэхээр ажиллаж байна.

ЭТТ компанитай хамтран экспортын тээврийг 5 дахин нэмэгдүүлсэн. Галт тэргээр тээвэрлэх хэмжээг нэмэгдүүлэх, Чайна Энержи, Си Ар Си компаниудтай хамтран зам холболт болон нүүрсний тээвэрлэлтийг эрчимжүүлэх ажлыг өдөр тутам хянан зохион байгуулж байна" гэв.