УИХ-ын чуулганы нэгдсэн хуралдаанаар “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” Улсын Их Хурлын тогтоолын төслийг хэлэлцэж байна. 

УИХ-ын гишүүн Д.Энтүвшин: 

-Засгийн газраас Хөгжлийн бодлого, төлөвлөлтийн тухай хуулийн 14.1-д заасныхаа дагуу гүйцэтгэлээ ирүүлсэн байна. Мөн дараагийн 5 жилийн төлөвлөгөөг ч хамт ирүүлжээ.

Гэхдээ хуулийн дагуу УИХ энэ асуудлыг хэлэлцээгүй байгаа. Хуульд зааснаар Засгийн газар Монгол Улсын хөгжлийн 5 жилийн үндсэн чиглэлийн хэрэгжилтийн үнэлгээг тухайн хугацаа дуусахаас дөрвөн сарын өмнө УИХ-д танилцуулах ёстой гэж заасан байдаг.

Гэтэл яг энэ танилцуулах үйл ажиллагаа хийгдээгүй учраас эхлээд гүйцэтгэлийн тайлангаа хэлэлцэж, танилцсаны дараа дараагийн төлөвлөгөөг ярих нь зөв гэж бодож байна.

Мөн энэ тайланг хэлэлцсэний дараа УИХ нь Засгийн газарт тодорхой чиглэлүүд өгөх ёстой гэж хуульд тусгасан. Тиймээс эхлээд энэ танилцах ажиллагаагаа хийж байж дараагийн 5 жилийн асуудлыг яаж ярих вэ гэдгээ яримаар байна.

Нөгөө талаас, би түрүүн асуулт асуухдаа ч хэлсэн. Энэ 5 жилийн төлөвлөгөө арай олон, давхардсан шинжтэй санагдаж байна.

Одоо бидэнд гурван түвшний хөгжлийн бодлого, төлөвлөлт бий, 

• Урт хугацааны буюу 30 жилийн,
• Дунд хугацааны буюу 10 жилийн,
• Богино хугацааны буюу 4-5 жилийн төлөвлөгөө.

Үүн дээр нэмээд Засгийн газрын үйл ажиллагааны хөтөлбөр бас байна.

Ингээд олон бичиг баримт давхацчихсан учраас нэг нам эрх барьж байх үед гаргасан бодлого дараагийн Засгийн үед хэрэгжихгүй орхигдох магадлал өндөр байна. Тиймээс энэ 5 жилийн төлөвлөгөөний тогтолцоог цэгцлэх, цөөрүүлэх шаардлагатай гэж үзэж байна.

Тэгэхээр бид яг одоо энэ 5 жилийн төлөвлөгөө хэр хэрэгжсэн, юу болохгүй байна вэ гэдгээ хуулийн дагуу УИХ дээрээ хэлэлцээд, дараа нь дараагийн 5 жилийн асуудлыг ярья гэсэн саналтай байна. 

ШУУД ҮЗЭХ: