Нийслэлийн Баянзүрх дүүрэгт ахмад настан болон хүүхдүүдэд дагнасан тусламж, үйлчилгээ үзүүлэх, хэвтэн эмчлүүлэх 160 ортой эмнэлэг баригдсан ч ашиглалтад орохгүй удааширсаар байна.

Тойргийн сонгогч иргэдийн хүсэлтээр УИХ-ын гишүүн Ж.Чинбүрэн өнөөдөр (2025.01.13) тус эмнэлгийн барилга дээр ажиллав. Тэрбээр “Ойролцоогоор 8 орчим тэрбум төгрөгөөр ахмад, хүүхдийн зориулалттай 160 ортой эмнэлэг барьсан, ажил амжилттай дууссан.

Баянзүрх дүүрэгт улсын чанартай эмнэлэг байдаггүй, томуу, томуу төст өвчний энэ үед хүүхэд, хөгшчүүдэд ор олдохгүй байгаа энэ үед эмнэлэг ашиглалтад орчихвол маш их нэмэртэй байна. Ашиглалтад оруулах хүсэлтийг удаа дараа холбогдох газруудад нь хүргүүлсэн ч хүлээгдсээр байгаа. Барилгын ажил дууссан, улсын комисс хүлээж авахад бэлэн болсон. Гэвч яагаад ашиглалтад оруулахгүй байгаа шалтгааныг мэдэхгүй байна” хэмээлээ.

Орчин үеийн дэвшилтэт стандарттай, найман давхар тус эмнэлгийн барилга өмнө нь цэргийн Казармын зориулалтаар 3 давхар баригджээ. 1993 оноос Эрүүл мэндийн 15 дугаар төвийн байр болгон ашиглаж байгаад 2019 онд Баянзүрх дүүргийн ахмад болон хүүхдүүдэд дагнасан эмнэлгийн тусламж үйлчилгээ үзүүлэх найман давхар эмнэлэг болгон өөрчилсөн. Эмнэлгийн 2022 онд багтаан ашиглалтад оруулахаар төлөвлөөд байжээ.