Хичээлийн шинэ жил эхлэх гэж байна. Үүнтэй холбогдуулан хүүхэд, залуусын электрон болон янжуур тамхины хэрэглээ, түүнээс урьдчилан сэргийлэхэд эцэг, эх, нийт насанд хүрэгчид анхаарах шаардлагатай байгаа талаар УИХ-ын гишүүн О.Номинчимэг, Ч.Анар, Б.Мөнхсоёл нар мэдээлэл хийлээ.

УИХ-ын гишүүн О.Номинчимэг “Монгол Улс тамхидалт, тамхи хэрэглэгчдийн тоогоор дэлхийд 7 дугаарт жагсаж байна. Жил бүр 4300 хүн тамхинаас үүдэлтэй өвчнөөр нас барж байгаа тухай статистик бий. Тиймээс бид хаа хаанаа хичээх шаардлагатай байна. Иймд бид хүүхдийг аливаа хэлбэрийн донтолтоос сэргийлэхээр  “Тамхигүй, хорт зуршилтгүй, сургууль, сурагчид” аяныг эхлүүллээ.

Канад, Америк зэрэг оронд хийсэн судалгаагаар электрон тамхийг гоё амттай байлгах нь хүүхэд залуусыг багаас нь никотинд донтуулж байна гэж үзэн зохицуулалт хийсэн байна. Тиймээс хууль тогтоогчдын зүгээс электрон тамхины жимсний, үнэр амтыг хорих нь зүйтэй гэж үзэж байгаа.

Өөр нэг том асуудал бол татвар. Эдийн засгийн аргаар асуудалтай тэмцэх нь үр өгөөжтэй. Манайд янжуур тамхины татвар маш удаан хугацаанд нэмэгдээгүй, дэлхийд байхгүй хямд тамхитай болсон. Онцгой албан татвар төлдөггүй байсан электроны тамхины татварыг үе шаттай нэмж, олдоцтой байгааг хязгаарлах хуулийн төсөл боловсруулж УИХ-ын намрын чуулганд өргөн барихаар бэлтгэл хангаж байна” гэв.

УИХ-ын гишүүн Б.Мөнхсоёл “Үр хүүхэд нь янжуур тамхи татаад байвал эцэг, эхчүүд мэдэх боломжтой. Гэтэл электрон тамхийг хэрэглээд байгаа хүүхдээ мэдэхгүй өнгөрөх тохиолдол байна. Мөн электрон тамхи янжуураас хор багатай гэдэг өрөөсгөл ойлголт байгаа. Дэлхий нийтийн туршлагыг харвал, жишээ нь Сингапур, Тайланд, Энэтхэг зэрэг улсад электрон тамхи хэрэглэхийг бүрэн хоригложээ. Гэтэл Монголд хил гаалиар электрон тамхийг электрон бараа мэтээр маш хөнгөн, амархнаар нэвтрүүлж байна.

Хүнсний барааны дэлгүүрт электрон тамхийг хүүхдийн нүдэнд тусахуйц, анхаарлыг нь татахуйцаар худалдаж хүүхдийг хортой донтолтод өдөөж өгч байна. Аливаа хэрэглээнд донтсон хойно нь эмчлэх, өөрчлөх, болиулах маш хэцүү. Тиймээс нийгэмд амьдарч байгаа насанд хүрсэн бүх хүн ирээдүйн нийгмээ, залуу үеэ сайн сайхан байлгахад анхаарах цаг болжээ. Насанд хүрэгчид өөрсдөө үүнийг энгийн хэрэглээ мэт ойлголт өгөөд байгаад анхаарлаа хандуулах ёстой юм” гэлээ.

Сургалтын байгууллагад электрон тамхи хэрэглэхийг хориглох тухай Боловсролын сайдын тушаал 2024 онд гарсан. Энэ мэтчилэн сурагчдад электрон тамхи хэрэглүүлэхгүй байх олон ажлыг үе шаттай хийж байгаа боловч хэрэглээ багасахгүй байгааг дурдав. Тиймээс эцэг, эх асран хамгаалагч, олон нийтийг хамтран ажиллахыг уриаллаа.

Хүүхдэдээ цаг зарцуулаасай, юунаас болоод хүүхэд электрон тамхи авч хэрэглэж байгааг өдрийн хоолны мөнгөөрөө хорт бодис авч хэрэглэж байгаа эсэхийг хянаасай. Хүүхдэдээ хэрэглэж болохгүй гэсэн ч өөрөө хажууд нь электрон болон тамхи татаж, үйлдлээрээ буруу зуршил харуулахгүй байгаасай, хүүхдээ хорт зуршлаас хамгаалаасай, чин сэтгэлээсээ ярилцаасай гэж уриаллаа.