Хичээлийн шинэ жил эхлэх гэж буй энэ өдрүүдэд Улаанбаатар хотын замын хөдөлгөөний ачаалал эрс нэмэгддэг.

Иймд нийслэлийн удирдлагуудын зүгээс иргэдийн дунд санал асуулга явуулж, үр дүнд нь үндэслэн автомашиныг улсын дугаарын тэгш, сондгой тоогоор хязгаарлан хөдөлгөөнд оролцуулах эсэхийг шийддэг.

Энэ жил ч мөн тээврийн хэрэгслийг ажлын өдрүүдэд улсын дугаарын тэгш болон сондгойгоор ангилан бүсчлэл харгалзахгүйгээр хөдөлгөөнд оролцуулахыг дэмжих эсэх санал асуулгыг явуулжээ. Санал асуулгыг өчигдөр 00:00 цагт хаасан. Энэ талаар мэдээлж байна. 

Энэ сарын 27-ны өдрөөс эхлэн 20 хоног улсын дугаарын тэгш, сондгойгоор хязгаарлаж замын хөдөлгөөнд оролцуулахаар шийдвэрлэсэн. Есдүгээр сарын 1-ний өдөр уг зохицуулалт үйлчлэхгүй гэж нийслэлийн Автозамын түгжрэлийг бууруулах төсөл, хөтөлбөрийн зохицуулагч Д.Бадарсан болон ТЦА, ЗХУТ-өөс мэдээллээ.

Автомашины улсын дугаар нь: 

• Сондгой тоогоор төгссөн бол: 8-р сарын 27, 29, 31-нд, 9-р сарын 3, 5, 7, 9, 11, 13, 15-нд хөдөлгөөнд оролцоно.
• Тэгш тоогоор төгссөн бол: 8-р сарын 28, 30-нд, 9-р сарын 2, 4, 6, 8, 10, 12, 14, 16-нд хөдөлгөөнд оролцоно.