Цагдаагийн албан хаагчид одоогоос жил гаруйн өмнө (2024.0624) хоёр хүнийг хөнөөсөн ноцтой гэмт хэргийг илрүүлсэн. Хэрэг үйлдсэн гэх этгээд нь Чингэлтэй дүүргийн 19 дүгээр хороонд оршин суух хаягтай, 20 настай этгээдийг болохыг мэдээлж байв. Хэрэг шүүхэд шилжсэн. Шүүх хурлын урьдчилсан хэлэлцүүлгийг энэ сарын 17-ны өдөр Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхэд товложээ.

Шүүх хурлын зард шүүгдэгч буюу хэрэгт холбогдсон этгээдүүдийн нэрийг Ц.Дагвадорж, Х.Энхсайхан гэж бичжээ. Тэдэнд Эрүүгийн хуулийн 13.2-2,2, 10.1-2,6, 17.3-1, 17.8-1, 26.1-2, 17.1-3.1, 12.5-1, 10.1-2.1, 10.1-2.7 дахь зүйл ангиар яллах дүгнэлт үйлдсэн байна.

Зүйл ангиас харвал:

• Хоёр ба түүнээс дээш хүн хулгайлах,
• Хоёр ба түүнээс дээш хүнийг алах, ингэхдээ онц харгис хэрцгийгээр мөн хохирогчийн биеэ хамгаалж чадахгүй эсвэл жирэмсэн болохыг мэдсээр байж,
• Залилах гэмт хэргийг байнга үйлдэж амьдралын эх үүсвэрээ болгох,
• Эд хөрөнгө устгах гэмтээх,
• 16 насанд хүрээгүй хүнтэй бэлгийн харьцаанд орох зэрэг гэмт хэрэгт холбогдуулан яллах дүгнэлт үйлджээ (Эх сурвалж: Эрүүгийн хууль). 

Эргэн сануулахад, энэ хэргийн талаар жилийн өмнө тухайн үеийн Цагдаагийн ерөнхий газрын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр “Нийслэлийн СБД-т энэ сарын 8-9-нд шилжих шөнө 32 настай З-ийн амь насыг хохироосон. Мөн ХУД-т энэ сарын 20-21-нд шилжих шөнө 16 настай Д-ийн амь насыг хохироосон болох нь мөрдөн шалгах ажиллагаагаар тогтоогдсон.

Хэргийн нөхцөл байдлаас шалтгаалан ЦЕГ-ын Тэргүүн дэд даргын тушаалаар Эрүүгийн цагдаагийн алба, Мөрдөн байцаах албан, ХУД, СБД-ийн цагдаагийн  албан хаагчдаас бүрдсэн ажлын хэсэг байгуулан мөрдөн шалгах ажиллагааг үргэлжлүүлж байна” хэмээн мэдээлж байв.