Өчигдөр орой БЗД-ийн 26-р хороонд хөл хорио тогтоохтой зэрэгцээд хорооны засаг дарга солигджээ. Иргэд үүнийг эсэргүүцэж, гарын үсэг цуглуулан хороон даргаа эргүүлэн ажилд нь томилохыг шаардаж байна. 

Цагдаа нар шаардлага тавьж, тараахыг оролдож буй ч эсэргүүцэл илэрхийлж буй иргэд нэмэгдсээр байна. Тэд хороон даргыг шөнө, хууль бусаар  сольсонд нь дургүйцэж буйгаа илэрхийлэв.

Энэ талаар "Хөл хорио тогтоох тухай дүүргийн засаг дарга Н.Баярмөнхийн захирамжид 26 дугаар хорооны дарга "Г.Отгонбаатар" биш "О.Түвшин" гэж бичсэн байснаас засаг дарга солигдсоныг мэдэж, оршин суугчид "хөл хорионы үеэр засаг даргыг халлаа" хэмээн бухимдаж буйг бид мэдээлсэн.

Нийслэлийн хамгийн их хүн амтай БЗД-ийн 26 дугаар хороонд улсын цэцэрлэг сургууль байдаггүй бөгөөд энэ хороонд сургууль барих газрын төлөөх анхан шатны шүүх хуралд өчигдөр хорооны Засаг дарга асан Г.Отгонбаатар тэргүүтэй албан тушаалтнууд ялалт байгуулсан юм. Өдөр нь шүүх дээр ялснаа зарласан ч орой нь засаг дарга солигдсонд иргэд бухимдсан.

Иргэд үзэл бодлоо илэрхийллээ:

БИД ИЙМ БУСАРМАГ НИЙГЭМД АМЬДАРЧ БАЙГАА УЧРААС ИЙМ САЙН ХОРООН ДАРГАТАЙ БАЙХЫГ ХҮСЭЖ БАЙНА

Хороон даргыг ямар намынх вэ гэдгийг би мэдэхгүй. Гэхдээ тэр хүн ажлаа маш сайн хийдэг. 

"-БЗД-ийн 26-р хороонд сургууль цэцэрлэгийн газартай боллоо, анхан шатны шүүх дээр ялсан гэж өчигдөр хороон дарга маань ажлаа хийгээд явж байсан.  Гэтэл өглөө босоод иртэл хөл хорио тогтоочихсон, шөнө нь хороон даргыг ажлаас нь халсан байсан. Фэйсбүүкээр дамжуулаад бид энэ мэдээллийг авлаа. Манай хорооны иргэд маш их эсэргүүцэж байна. Хороон даргыг ямар намынх вэ гэдгийг би мэдэхгүй. Гэхдээ тэр хүний хувьд ажлаа маш сайн хийдэг. Хэнийг ч хэн гэхгүй хорооны иргэн бүрийнхээ асуултад хариулдаг. Бид ийм бусармаг нийгэмтэй байхад ийм сайн хороон даргатай байхыг хүсэж байна.

Яагаад гэвэл тодорхой хэмжээнд бидний эрх ашгийг хамгаалж чадаж байгаа учраас бид авч үлдэх ёстой. Аль нэг намын явуулгаар хороон даргыг солихыг эсэргүүцэж байна. Тийм учраас ямар ч хүний удирдлагагүйгээр өөрсдөө гарч ирж энд зогссон. Монголд хууль бус зүйл газар авч байна. Хятадууд бидний газрыг авчхаад эргээд бидэнд үнэтэй түрээсэлж байна. Энэ хороонд дандаа өсөж хөгжиж байгаа хүүхэд залуучууд амьдардаг. Дандаа хувийн цэцэрлэг сургууль байхаас улсын цэцэрлэг сургууль байхгүй. Үүний төлөө тэмцсэн хүнийг яагаад халж байгаа юм? Ийм учраас бухимдаж байна. 8 сая төгрөгийн төлбөртэй сургуульд хүүхдээ өгөх боломжтой хүн хэр их байгаа вэ? 

ЯАГААД ИРГЭДИЙН САНАЛ ХҮСЭЛТИЙГ ӨЧҮҮХЭН Ч АВЧ ХЭЛЭЛЦЭХГҮЙ БАЙНА ВЭ?

-Баянзүрх дүүргийн засаг даргад хандаад хэлэхэд хуулиа биелүүлээч, иргэд өөрсдөө дэмжээд гаргасан Г.Отгонбаатар гэж хүнийг хүчээр ажлаас нь чөлөөлж хууль бусаар өөр хүнийг тавихаа болич ээ. Иргэдийн хурлаа хийгээч гэж хэлмээр байна.

-Хорио цээрийн үеийг далимдуулаад ийм ажиллагаа явуулж байгаад маш их зэвүүцэж байна. Заавал нэг намын даргын доор цүнх барих ёстой юм уу?  Бид жилийн өмнөөс энэ даргаа авч үлдье гэж янз бүрээр гарын үсэг цуглуулсан. Яагаад энэ 26 дугаар хорооны иргэдийн санал хүсэлтийг өчүүхэн ч авч хэлэлцэхгүй байна вэ? Энийг л Баянзүрх дүүргийн засаг дарга Н.Баярмөнхөөс асуумаар байна. Чөлөөлөгдөх үндэслэл нь юу вэ? Сайн ажиллаж байгаа хүнийг яагаад халж байгаа юм?

БИД ӨӨРСДӨӨ Г.ОТГОНБААТАРЫГ 100 ХУВИЙН САНАЛААР СОНГОСОН

Засаг дарга өөрөө сарын өмнө лайв хийгээд өөрийг нь дүүргийн засаг дарга шахалтад оруулж байна гэж хэлсэн талаар ярьсан. Гэтэл гэнэт биеийн байдал нь муудсан гэж тав хоногийн өмнө өргөдөл өгсөн гэж ярьж байна. Тав хоногийн өмнө өргөдлөө өгсөн хүн яахаараа өчигдөр орой 22 цагт ажлаа хийгээд явж байдаг юм бэ? 

-Хууль бусаар засаг даргыг маань авч хаясанд ундууцсан учраас энд зогсож байна. Өчигдөрхөн тэр хүн Олимп хотхоны арын талбайд сургууль бариулах шүүх хуралд ялсан. Тэр орой нь засаг даргаасаа болиод оронд нь О.Түвшин гэж хүн томилогдсон байна. Бид өөрсдөө Г.Отгонбаатарыг 100 хувийн саналаар сонгосон. Төрийн алба хэр удаан ажилладаг билээ. Гэтэл нэгхэн шөнийн дотор маш хурдан ажиллаж дүүргийн засаг даргын захирамж дээр нь О.Түвшин гэж нэр явж байсан. 
Засаг дарга өөрөө сарын өмнө лайв хийгээд өөрийг нь дүүргийн засаг дарга шахалтад оруулж байна гэж хэлсэн талаар ярьсан. Гэтэл гэнэт биеийн байдал нь муудсан гэж тав хоногийн өмнө өргөдөл өгсөн гэж ярьж байна. Тав хоногийн өмнө өргөдлөө өгсөн хүн яахаараа өчигдөр орой 22 цагт ажлаа хийгээд явж байдаг юм бэ? Тэгэхээр хоорондоо уялдаагүй, хууль бус шийдвэр байсан байх гэж бодож байна.

-Хорооны засаг дарга мундаг ажилладаг залуу. Энэ хүнийг ажлаас нь халах гээд О.Түвшин гэж хүнийг авчирсан юм билээ. Өнөөдөр өглөө дүүргийн Засаг даргатай уулзахад багаараа ажилламаар байна гэж өөрөө хэлсэн. Г.Отгонбаатар газар дээр маргаан үүсгээд газраас болоод ажлаас нь халчхав уу гэж бодож байна. Уг нь их мундаг ажилладаг залуу.

-Г.Отгонбаатар төрийн анхан шатны үйлчилгээг иргэдэд яаж чирэгдэлгүй хариуцлагатай үзүүлж чаддагийг харуулсан өндөр стандарт тогтоосон хүн. Энэ хүний хэмжээнд хүрч ажиллах хүн байхгүй л болов уу." гэлээ.