УИХ-ын чуулганы хуралдаан үргэлжилж байна. Хуралдаанаар Монгол Улсын 2026 оны төсвийн тухай хуулийн төслийн хамт өргөн мэдүүлсэн хууль, тогтоолын төслүүд /Засгийн газар 2025.09.01-ний өдөр өргөн мэдүүлсэн, эцсийн хэлэлцүүлэг, асуулт, хариулт 60 минут/-ийг эцэслэн батална.

Хэлэлцэж буй асуудалтай холбогдуулан УИХ-ын гишүүн Ц.Сандаг-Очир “Төсөв батлагдсантай холбогдуулан авах арга хэмжээний тухай тогтоолын төсөлд “Төрийн болон орон нутгийн өмчийн ерөнхий боловсролын сургууль, цэцэрлэг, МСҮТ, коллеж, насан туршийн боловсролын төвийн багш нарын” гэжээ. “Ажилтнуудын” гэдэг үг орхигджээ. Тэгэхээр эдгээр байгууллагын үйлчлэгч, сантехникч, цахилгаанчин, жижүүр, манаач зэрэг ажилтны цалин мөнгөний нэмэгдлийн асуудал орхигдож байна гэж ойлгох уу?. Зөвхөн багш нарын цалингийн нэмэгдэл орох уу? Энэ тогтоолд гээгдсэн байна. Санаатай гээсэн үү, санамсаргүй гээгдэв үү” гэж асуув.

Үүнд Боловсрол, шинжлэх ухааны сайд П.Наранбаяр “Энэ тогтоолын төслийг бид урьдчилж хараад “ажилтны” гэдэг үг оруулахаар ажиллаж үзсэн. Өнөөдөр бид нийт 93 мянган багшийн цалинг нэмэхэд ₮963 тэрбумын нэмэгдэл хэрэгтэй болсон. Энэ удаад ₮520 тэрбум нь шийдэгдэж байгаа. Энэ төсвийн хүрээнд ажилтнуудын цалинг давхар бодолцох шаардлагатай гэж харж байна. Хууль “багш нарын” гээд гарчихсан. Гэхдээ батлагдсан төсвийн хүрээнд зохицуулалт хийх боломжтой гэж харж байгаа” гэв.

УИХ-ын гишүүн Д.Үүрийнтуяа “Энэ асуудлыг ажлын хэсгийн хүрээнд ярьсан. Зөвхөн нэг үгийн тухай асуудал биш юм, үүний ард 400 тэрбум төгрөгийн асуудал бий. 520 тэрбумаар багш нарын цалинг нэмэхээр төсөвт оруулж батлуулсан. Ажлын хэсэг “ажилчдын” гэдэг үгийг нэмээд, дэмжээд оруулахад 400 тэрбумыг хаанаас гаргах вэ гэдэг асуудал үүснэ. Нэгэнт батлагдсан тогтоолд “ажилтны” гэдэг үг үсгийг нэмэх нь эдийн засгийн хувьд томоохон үр дагавар авчрах эрсдэлтэй байгаа гэдгийг гишүүд ойлгоосой” гэв.