Сонгинохайрхан дүүргийн 192-р цэцэрлэг хүүхдүүдэд муудсан махаар хоол хийж өгч байсныг эцэг, эхчүүд илрүүлэн гомдол гаргажээ. Тус цэцэрлэгийн зарим хүүхдэд гүйлгэх, бөөлжих, халуурах зэрэг шинж тэмдэг илэрсэн бөгөөд ханиад байж болзошгүй гэж арга хэмжээ авсан боловч үр дүнгүй байсан тухай ээжүүд ярьсныг бид мэдээлсэн. Мэдээг ЭНДЭЭС уншина уу.

Одоо ямар нөхцөл байдалтай байгааг үргэлжлүүлэн тодруулахаар өнөөдөр тус цэцэрлэгийг зорьсон юм. Цэцэрлэгийн үүднээс асрагч эмэгтэй тосож, дарга яриа өгөх боломжгүй, дарга завгүй гэв.

Тэрээр хэлэхдээ, ХХААХҮЯ, Нийслэлийн боловсролын хэлтсээс хүмүүс ирж шалгалт хийсэн. Өнгөрсөн даваа гарагт бүх муудсан махыг "Хүнс хангамж төв" ОНӨААТҮГ гэх нийлүүлэгч байгууллага руу буцаасан.

-Махыг цэцэрлэгт хүргэж ирсний дараа муудсан гэх мэдээлэл байсан.
-Аль аль талдаа л асуудал гарсан. Тиймээс хэн хэн нь л өөрсдийгөө зөвтгөх гэнэ шүү дээ. Ажлын цагаар хүргэж ирэх байсан махыг замын түгжрэлээс болж удлаа гэсэн шалтгаанаар шөнийн гурван цагт авч ирсэн. Ачааны машинд хөргүүр байхгүй. Нойтон мах ачаад бүх цэцэрлэгүүдээр тойроод явж байгаа.

Наймдугаар сарын 31-ний өдөр бүх цэцэрлэг л хүнсээ авч байгаа учраас ачаалал их байсан биз. Манай цэцэрлэгийнхэн ч гэсэн ачаалал ихтэй байсан.

-Хүүхдүүдийн биеийн байдал ямар байна вэ?
-Өнөөдрийн байдлаар 120 хүүхэд ирсэн. Гэдэс нь өвдөж байгаа хүүхэд байхгүй. Өвчтэй гэж эмнэлэгт очсон хүүхэд байна гэж би сонсоогүй. Хүмүүс арай л дэндүү дэвэргэж яриад байна.

-Багш ажилтнууд ч гэсэн муудсан махаар хийсэн хоол идсэн үү?
-Бүгд л идсэн. Гэдэс хямарч өвдсөн нэг ч хүн байхгүй.