НҮБ-ын Цагдаагийн албаны дарга, цагдаагийн комиссар Файзал Шахкар Монгол Улсад иржээ.

Цагдаагийн ерөнхий газрын дарга, Дотоодын цэргийн командлагч, бригадын генерал Т.Сүхболдын урилгаар Файзал Шахкар тэргүүтэй төлөөлөгчид ирсэн. Тэд Монгол Улсын цагдаа, дотоодын цэргийн байгууллагад 2025 оны 08 дугаар сарын 14-нөөс 17-ны өдрүүдэд ажиллах юм байна.

Хүндэт зочдыг хүлээн авч, НҮБ-ын энхийг дэмжих ажиллагаанд “Цагдаагийн баг” оролцуулах ажлын бэлтгэл ажлын явц байдлын талаар танилцуулж, цаашдын хамтын ажиллагааны талаар санал солилцов.

Уулзалтын үеэр НҮБ-ын Цагдаагийн албаны даргын зүгээс Монгол Улсын цагдаагийн байгууллагын идэвх санаачлагыг өндрөөр үнэлж, НҮБ-ын Үнэлгээ, зөвлөгөөний багийг 2025 оны 4 дүгээр улиралд зохион байгуулах асуудлыг шийдвэрлэх, цаашид хамтын ажиллагааг эрчимжүүлэх талаар идэвхийлэн ажиллахаа илэрхийлэв.

Цагдаагийн комиссар Файзал Шахкарын энэ удаагийн ажлын айлчлал нь Монгол Улсын Цагдаа, дотоодын цэргийн байгууллагаас НҮБ-ын энхийг дэмжих ажиллагаанд оролцуулах цагдаагийн багийн чадавх, бие бүрэлдэхүүний бэлтгэлжилт, техник хэрэгсэл, тоног төхөөрөмжийн бэлэн байдалтай танилцаж, НҮБ-ын Цагдаагийн албаны үнэлгээний багийн айлчлалын товыг тодорхойлж, бүрэлдэхүүнийг томилох чухал ач холбогдолтой юм.

Эх сурвалж: ЦЕГ