Өнгөрч буй долоо хоногт улс, оронд өрнөсөн онцлох үйл явдлыг тоймлон хүргэж байна.

ОЛИМП ЭХЛЭВ

Дөрвөн жил тутам дэлхийн хүмүүсийн хүсэн хүлээдэг наадам болох Олимп албан ёсоор эхэллээ. 

Франц улсын нийслэл Парис хотноо болж буй энэ удаагийн наадмын нээлт анх удаа цэнгэлдэхийн гадна буюу Сена мөрөн дагуу боллоо. Ингэснээр 100 жилийн дараа Парис хотноо зуны олимп дахин болж байгаа аж. Сонирхуулахад тус хотод өмнө нь түүхэндээ хоёр удаа Олимп болж байсан ба тодруулбал тэртээ 1900, 1924 онуудад болж байв.

Олимпын зохион байгуулах хорооны мэдээлснээр 10,500 орчим тамирчин наадамд оролцох төлөвтэй байна. Улс орнуудын баг тамирчид усан онгоцон дээр зогсон Сена мөрний дагуу явсан нь онцгой байлаа. https://gogo.mn/r/mwg1w

ГАДААД ХАРИЛЦААНЫ САЙД Б.БАТЦЭЦЭГ АНУ-Д АЙЛЧЛАВ

Гадаад харилцааны сайд Б.Батцэцэг Америкийн Нэгдсэн Улсад хийж буй айлчлалынхаа хүрээнд АНУ-ын Төрийн нарийн бичгийн дарга Энтони Ж.Блинкен-тэй 2024 оны 7 дугаар сарын 23-ны өдөр албан ёсны уулзалт хийв.

Америкийн Нэгдсэн Улсын Төрийн нарийн бичгийн дарга Э.Блинкен АНУ нь Монгол Улсын “гуравдагч хөрш” гэдгээрээ бахархдаг бөгөөд “ардчиллын баян бүрд” Монгол Улсын Гадаад харилцааны сайд Б.Батцэцэгтэй Ерөнхий сайд Л.Оюун-Эрдэнийн 2023 оны 8 дугаар сард хийсэн албан ёсны айлчлалаас хойш Вашингтон хотноо ийнхүү дахин уулзаж байгаадаа баяртай байгаагаа илэрхийлэв. https://gogo.mn/r/69ywd

БӨХЧҮҮДИЙН ДОПИНГИЙН ШИНЖИЛГЭЭНИЙ ХАРИУГ ЗАРЛАВ

Допингийн шинжилгээнд хамрагдсан 28 бөхийн шинжилгээний хариу (хэвийн илэрцтэй) 07 дугаар сарын 16-ны өдөр, 3 бөхийн шинжилгээний хариу 07 дугаар сарын 18-ны өдөр, 1 бөхийн шинжилгээний хариуг 07 дугаар сарын 22-ны өдөр Монголын үндэсний допингийн эсрэг байгууллага болон Үндэсний бөхийн салбар хорооны цахим шуудангаар тус тус хүлээн авчээ.

Ирсэн шинжилгээний хариугаар аймгийн арслан Г.Хишигбат, М.Буяндэлгэр, цэргийн арслан Г.Жамбалдорж нараас допингийн төрлийн хориглосон бодис илэрсэн байна. https://gogo.mn/r/j6lj8

ЦАГДААД ЗОДУУЛСНЫ УЛМААС 21 НАСТАЙ ИРГЭН НАС БАРСАН ГЭХ ХЭРЭГ ГАРАВ

Цагдаагийн байгууллагаас хэрэгт холбогдуулан шалгаж, хорих 461 дүгээр ангид саатуулаад байсан иргэн нас барсан хэрэг гарчээ.

Тодруулбал, 21 настай иргэн О 461 дүгээр ангид саатуулагдаж байх хугацаанд биеийн байдал муудаж, Улсын гуравдугаар төв эмнэлгийн Эрчимт эмчилгээний тасагт энэ сарын 22-ны өдөр хүргэгдэн ирсэн байна. Гэсэн ч энэ сарын 23-ны өдөр нас барсан байна.

Ар гэрийнхнийх нь зүгээс түүнийг цагдаагийн албан хаагчдад зодуулсны улмаас амь насаа алдсан гэж үзэн гомдол гаргажээ. Гомдлыг Авлигатай тэмцэх газар шалгаж байгаа гэж Цагдаагийн ерөнхий газраас мэдээллээ.  https://gogo.mn/r/veq8k