"Бөөрөлжүүтийн станц 14 жилийн дараа ашилалтад орж, ахин тог таслахгүй" гэдгийг хотын мээр хэлж байлаа. https://gogo.mn/r/mwm8q

"Энэ оны эхний өдөр Бөөрөлжүүт цахилгаан станц 40МВт эрчим хүч нийлүүллээ. Тус станц энэ сарын 6-наас 150 МВт буюу бүрэн хүчин чадлаараа ажиллах юм. Ингэснээр 2024-2025 өвлийн оргил ачааллын үед цахилгааны хязгаарлалт хийхгүй байх боломж бүрдэж, нийслэлчүүдийн аминд орох нь" гэж мэдээлээд ердөө хоёр долоо хоногийн нүүр л үзэж буй.

Атал 2025 он гарсаар хоёр ч удаа тог тасалдав. Эхнийх нь шинэ оны хоёр дахь өдөр бол удаах нь өчигдөр буюу энэ сарын 15-ны өдөр байв.

Тодруулбал, Өчигдрийн 15:00-23:00 цагийн хооронд нийслэлийн есөн дүүрэг болоод Төв аймагт цахилгаан хязгаарлаж магадгүй хэмээн УБЦТС ТӨХК-аас мэдээлсэн. https://gogo.mn/r/xvg8o

Мэдээлсэн хуваарийн дагуу дээрх байршлуудад цахилгаан хязгаарлав.

Оршин суугчийн мэдээлж буйгаар "21:00-22:00 хооронд БЗД-ийн 5,8,21-р хороо, Улаанхуаран, Шинэ амгалан хороолол, Хилчин, Баганат өргөө хотхонд цахилгаан хязгаарлана гэсэн боловч манай 35-р хороонд цахилгаан хязгаарласан. Цахилгааны хязгаарлалт 22:00-00:00 цаг хүртэл үргэлжилсэн" ажээ.

Тиймээс амлалтаасаа ухарч нийслэлчүүдийн цахилгааныг яагаад тасалдуулсныг тодруулахаар Диспетчерийн үндэсний төвийн албаны дарга Б.Ганбаттай холбогдлоо.

Тэрбээр "ТЭЦ-4 станцад гэмтэл гарсан тул цахилгаан хязгаарлах шалтгаан болсон. Зууханд үүссэн гэмтлийн засвар өнөөдрийн 18 цаг хүртэл үргэлжлэхээр байна.

Тэр хүртэл есөн дүүргүүдэд тодорхой хугацаагаар цахилгаан хязгаарлалт үргэлжилнэ.

Бөөрөлжүүтийн станцын нийлүүлж буй цахилгаанаас хамаарч цахилгаан тасалдсан зүйлгүй" хэмээн ярилаа.

Гэхдээ түүнтэй холбогдохоос өмнө УБЦТС ТӨХК-ийн мэдээллийн ажилтан н.Баярсайханаас дээрх асуудлыг тодруулахад, "Оргил ачааллын үеэр буюу 17:00-22:00 цагийн хооронд систем доголдох аюултай тул чадлын хязгаарлалт хийсэн. Үүнийг бол бид мэдэхгүй. Хаана чадал унана, тэр газарт цахилгаан шууд хязгаарлагддаг.

Хаана цахилгааны өндөр хэрэглээтэй байна, тухайн газарт л шугамд хэт ачаалал үүсээд, хязгаарлагддаг гэсэн үг" хэмээн тайлбарласан юм.

Өөрөөр хэлбэл дээрх эх сурвалжуудын мэдээлэл хоорондоо зөрөөд байна.