-Өнгөрч буй долоо хоногт болсон онцлох үйл явдлуудаас тоймлон хүргэж байна-

Чөлөөт бөхийн 2025 оны Азийн аварга шалгаруулах тэмцээн Йордан Улсын нийслэл Амман хотод үргэлжилж байна. Одоогоор Монголын шигшээ багийн таван тамирчин медалийн тавцанд зогслоо.

• Азийн аваргаас Т.Энхжин мөнгө, З.Болортунгалаг хүрэл медаль авлаа
• Б.Мөнхнар, Б.Отгонтуяа, Э.Дэлгэрмаа нар Азийн аваргаас хүрэл медаль авлаа

Б.ДЭЛГЭРСАЙХАН: ТӨМӨР ЗАМЫН СУУРЬ БҮТЦИЙН ТАРИФЫГ 50 ХУВИАР БУУРУУЛСАН

Засгийн газрын хуралдааны шийдвэрийг Зам тээвэр, хөгжлийн сайд Б.Дэлгэрсайхан танилцуулав. Тэрээр, "Экспортыг нэмэгдүүлэх Засгийн газрын зорилтын хүрээнд манай яамнаас тээвэрлэлтийг нэмэгдүүлэх, тээвэрлэлтийн зардлыг аль болох багасгах, нүүрс ачих, буулгахад гарч буй илүү зардлыг хэмнэх тал дээр анхаарал хандуулан ажиллаж байна.

Энэ хүрээнд өнгөрсөн долоо хоног ЗТХ-ийн сайд, АҮЭБ-ийн сайд, Сангийн сайд нар бүх боомтод ажиллаад ирлээ. Монгол төмөр замын Зүүнбаян-Цогтцэций талд явж байгаа Ханги-Мандалын төмөр замын тарифыг 50 хувиар бууруулсан. Үүнийг зарим хэвлэл тээврийн хөлсийг бууруулсан мэт буруу мэдээлж байна. Энэ ялгаатай. Өөрөөр хэлбэл төмөр замын суурь бүтцийн тарифыг бид 50 хувиар бууруулсан" гэв.

• "Шивээхүрэн боомтоор Гашуунсухайтаас дутахааргүй хэмжээний нүүрс экспортлох боломжтой"
• ЧУУЛГАН: Гашуунсухайт-Ганцмод боомтын хил холболтын төмөр замын хэлэлцээрийг баталлаа

ЭНЭ ОНД ХҮҮХЭД ХАМГААЛЛЫН ЗАРДАЛД 20.6 ТЭРБУМ ТӨГРӨГ ТӨСӨВЛӨСӨН

2025 онд хүүхэд хамгааллын зардалд 20.6 тэрбум төгрөг төсөвлөгдсөн. Өмнө нь  агентлаг, нийслэл дээр ирээд аймгууд руу шилжүүлдэг байсан бол одоогоор Сангийн яамнаас шууд тухайн орон нутагт хуваарилагддаг болсон.

Хуулийн дагуу төлөвлөгдсөн төсөв хүрэх ёстой хүндээ хүрч, шийдэх ёстой асуудлаа шийдэж, нийгэмд үр дүн бий болгох учиртай.

СЭЛБЭ ДЭД ТӨВ АНХНЫ ЖИШИГ “20 МИНУТЫН ХОТ” БОЛНО

Ерөнхий сайдын захирамжаар байгуулагдсан Нийслэлийн Шуурхай штабын VIII хуралдааны талаар Монгол Улсын сайд, Засгийн газрын Хэрэг эрхлэх газрын дарга Н.Учрал танилцуулсан.

Тус хуралдаан энэ сарын 22-нд болж, “Сэлбэ дэд төвийн газар чөлөөлөлт, дэд төвийн гэр хорооллыг орон сууцжуулах төсөл”-ийн явцын мэдээллийг хэлэлцсэн юм.

Сэлбэ дэд төвийн төслийг Чингэлтэй, Сүхбаатар дүүргийн 158 га, 2206 нэгж талбарыг хамруулан хэрэгжүүлэхээр төлөвлөж, холбогдох арга хэмжээг 2020 оноос эхлүүлжээ. 45610 хүн амд зориулан нийгэм, соёлын үйлчилгээний хэрэгцээг хот тосгоны барилгажилтын норм, дүрмийг баримтлан төлөвлөсөн бөгөөд анхны 20 минутын жишиг хот болох юм.

НӨХӨН СОНГУУЛЬТАЙ ХОЛБООТОЙ ШИЛЖИЛТ ХӨДӨЛГӨӨНИЙГ ЗОГСООХ АЙМАГ, СУМДЫН ЖАГСААЛТ

Аймаг, нийслэл, сум, дүүргийн иргэдийн Төлөөлөгчдийн Хурлын 2025 оны нөхөн сонгуулийг 2025 оны 6 дугаар сарын 22-ны өдөр явуулна.

“Аймаг, нийслэл, сум, дүүргийн иргэдийн Төлөөлөгчдийн Хурлын 2025 оны нөхөн сонгуулийн үйл ажиллагааг зохион байгуулах цаг хугацааны хуваарь”-ийн дагуу зөвхөн нөхөн сонгууль явуулах тухайн хэсгүүдэд иргэний шилжилт хөдөлгөөнийг 2025 оны 4 дүгээр сарын 23-наас эхлэн зогсооно.

Иргэний засаг захиргааны нэг нэгжээс нөгөө нэгжид шилжин суурьших хөдөлгөөнийг санал авах өдрөөс 60 хоногийн өмнө зогсоож, санал авах өдрийн дараах өдрөөс сэргээнэ гэж хуульчилсаны дагуу нөхөн сонгууль явуулах тухайн хэсгүүдийн иргэний шилжилт хөдөлгөөнийг 2025 оны 6 дугаар сарын 23-ны өдөр сэргээх юм.