Цар тахлын үед сурагчдад цахимаар суралцах боломжийг олгох зорилгоор Мобиком Корпораци ХХК-иас санаачлан хэрэгжүүлсэн "Smart Education" төсөл өдгөө дөрөв дэх жилдээ үргэлжилж, нийт 14 сургуулийн 27,000 сурагчид хүрч, боловсролын хүртээмжийг нэмэгдүүлэхэд хувь нэмрээ оруулсаар байна.

"Smart Education IV" төслийн хүрээнд Хан-Уул дүүргийн 41 дүгээр сургууль иж бүрэн дижитал танхимтай боллоо. Өндөр хурдны интернэт, зөөврийн компьютер, VR төхөөрөмж, мөн энэ төхөөрөмжөөр үзэхэд зориулан боловсруулсан интерактив хичээл, ухаалаг самбар гээд технологийн дэвшлийг шингээсэн энэхүү танхимыг өчигдөр хүлээлгэн өглөө.

Энэ үеэр газарзүй болон англи хэлний хичээлүүдийн нээлттэй хичээл, дуучны үзүүлбэрүүд өрнөснөөс гадна мэргэжлийн тамирчид сурагчдад анхаарал төвлөрөлтийг сайжруулдаг крикет спортоор хичээллэхийг зааж өглөө.

Мобиком Корпораци ХХК-ийн Маркетингийн газрын захирал Б.Эрдэнэ-Очир "Энэ удаагийн төслийн нээлтийг нийслэлийн 41 дүгээр сургуульд хийж буйд туйлын их баяртай байна.

Нийт 280 сургуулиас төсөл хэрэгжүүлэх хүсэлт хүлээж авсан. Ингэснээр нийт Мобикомын хэрэглэгчдийн дунд санал асуулга явуулснаар зургаан сургуулийг сонгон төслийг хэрэгжүүлэхээр болсон. Өөрөөр хэлбэл хэрэглэгчдийнхээ оролцоог давхар хангасан гэсэн үг.

Бид дан ганц техник тоног төхөөрөмжөөр хангаад орхиогүй. Нэмэлтээр хичээлийн судлагдахууны программууд суулгаж өгсөн. Хичээлээ сонирхолтой байдлаар үзэж буй хүүхдүүдийн идэвх оролцоо сайжирч, үр дүнтэй суралцах болов уу гэж найдаж байна.

Түүнчлэн багш нарын заах аргачлал илүү боловсронгуй болж, ажлыг нь хөнгөвчлөх боломж бүрдэж байна. 

"Smart Education IV" төслийн бас нэг онцлог нь хүсэл мөрөөдлөө биелүүлж, ур чадвараа хөгжүүлэн, боломж бололцоогоо нээхэд нь сурагчдад туслахаар менторшип хөтөлбөрийг хэрэгжүүлж буй.

Төсөл хэрэгжихээр сонгосон зургаан сургуулиас 50 хүүхдийг сонгон шалгаруулж, нийт 10 менторын зөвлөгөө, мэдлэг, туршлага, ур чадвар, үнэт зүйлсээ хуваалцах  юм. 10-11-р ангийн сурагчдад мэргэжлээ хэрхэн зөв сонгох зэрэг хувь хүний хөгжлийн дэмжлэг үзүүлэхээр төлөвлөсөн" гэв.

Цахим ангид байрлуулсан эдгээр ухаалаг самбар, зөөврийн компьютер бүрд байгалийн шинжлэх ухааны хичээлүүдэд ашиглах программууд суулгаж өгчээ. Дурдвал, англи хэлний “Pearson english” хөтөлбөр, математикийн хичээлийн "Eduten" хөтөлбөр зэрэг программ суулгаснаараа онцлог байна.

Жишээ нь газар зүйн хичээл үзэж байгаа тохиолдолд хүүхдүүд VR төхөөрөмжийг тусламжтайгаар үлэг гүрвэлийг дэргэдээс нь харж, үзэсгэлэнт улс орнуудаар аялж буй мэдрэмж авах боломжтой юм.

Нийслэлийн 41 дүгээр сургуулийн  англи хэлний багш Б.Батсолонго "Би сургуульдаа багшлаад гурван жил болж байна.

Одоогоор 6-7 дугаар ангийн сурагчид “Pearson english” хөтөлбөрөөр суралцаж байгаа бол 3-4 дүгээр ангийн сурагчид туршилтын хугацаанд явж байна.

“Pearson english” хөтөлбөрөөр суралцахад цахим хэрэглэгдэхүүн маш их шаардагддаг. Гэтэл хүүхэд ухаалаг утасгүй, дата байхгүй учраас хүндрэл үүсдэг. 

Харин "Smart Education" төслийн хүрээнд анги танхимыг нь бүрэн цахимжуулж, ухаалаг болгож өгснөөр үүсээд буй хүндрэлийг цогцоор нь шийдэж байна. Өөрөөр хэлбэл, хүүхдүүд тухтай орчинд, хичээлийн хэрэглэгдэхүүнээр бүрэн хангагдахын зэрэгцээ, багш миний хөдөлмөрийг хүртэл хөнгөвчилж байна.

Хичээлийн судлагдахуун, хэрэглэгдэхүүн бүрэн байгаа нөхцөлд хүүхэд хичээлээс хоцрогдохгүй. Эсрэгээрээ хүүхдийн идэвх оролцоо нэмэгдэнэ.

Цахим болгон тохижуулсан ангид дөнгөж сая хичээллээд гарч ирлээ. Хэрэглэхэд маш хялбар юм. Хүүхдүүддээ хэрхэн ашиглах зааврыг өгөхөд л дагаад хийж байна. Хичээлээ заахад маш дөхөм, урамтай байлаа. Хүүхдүүд маань ч гэсэн хичээлдээ эрч хүчтэй оролцлоо" хэмээн ярилаа.

Нээлттэй хичээлд оролцсон сурагчдын сэтгэгдлээс,

4-р ангийн сурагч Г.Болор-Эрдэнэ "Ийм гоё тав тухтай орчинд хичээл хийхэд илүү төвлөрдөг юм байна.

Манай ангийнхан VR төхөөрөмж зүүгээд газар зүйн хичээл үзсэн. Улаан цутгалан гэх газар очиж, байгалийн сайханд аялсан. Яг л дэргэд нь байгаа мэт үнэхээр гоё санагдсан. Монгол орон минь үнэхээр үзэсгэлэнтэйг мэдэрлээ. Цахим ангид хичээллэх маш сонирхолтой байна".

4-р ангийн сурагч М.Одбаяр "Цахим ангид англи хэл болон математикийн хичээл үзлээ. Англи хэлний хичээлээр дуулдаг хэсэг гоё байсан.

Хичээлийг ухаалаг самбарт үзэх амар байдаг юм байна. Өмнө бол багшийн хэлж өгснийг, бас самбар дээр бичсэн зүйлсийг л хуулж бичдэг байсан.

Одоо хичээлээ илүү сайн ойлгож байна. Энэ ангид өдөр ирээд орой болтол байгаад л баймаар" хэмээн ярив.

"Smart Education IV" төслийн хүрээнд энэ жил Улаанбаатар хотын гурав, Говь-Алтай, Баян-Өлгий, Сэлэнгэ аймгийн буюу орон нутгийн гурав буюу нийт 6 сургуульд иж бүрэн дижитал танхимыг тохижуулан хүлээлгэн өгч байгаа аж. Ингэснээр нийт 27 мянган сурагч технологийн дэвшилтэт орчинд суралцах боломжтой болж байна.

АХЛАХ АНГИЙНХНЫ АЛДАЖ БОЛОМГҮЙ БОЛОМЖ: “SMART” ЭВЕНТ

Түүнчлэн төслийн нээлтийг тохиолдуулан энэ сарын 25-нд TEDxUlaanbaatar-тай хамтран "SMART" эвентийг зохион байгуулах аж.

Ахлах ангийн сурагчдад зориулсан энэхүү арга хэмжээнд кино найруулагч П.Золжаргал, продюсер О.Баярсайхан, дугуйтай аялагч Б.Очирваань, "Тесла" компанийн дата инженер Э.Жавхлан зэрэг салбартаа тэргүүлж, өөрчлөлт эхлүүлсэн залуус оролцож өөрсдийн түүх, туршлагаа хуваалцахаас гадна ирээдүйн карьер, мэргэжил сонголтын талаарх шинэ, сонирхолтой мэдээллүүдийг өгч, хэлэлцүүлэг өрнүүлнэ.

Мөн төсөлд хамрагдсан Хөвсгөл, Дундговь, Булган аймгийн сурагчдын өдөр тутмын амьдралыг харуулсан баримтат гэрэл зургийн интерактив үзэсгэлэн, төслийн үр шимийг хүртсэн хүүхдүүдийн талархлын захидалтай танилцах боломжтой.

"SMART" эвентийн урилгыг 2024 оны аравдугаар сарын 18-ныг дуустал Мобикомын 9,000 төгрөгийн дижитал картаар цэнэглэсэн эхний 700 сурагчид илгээнэ. Та амжиж дугаараа цэнэглээд энэ өдөрлөгийн урилгыг авах боломжтой гэлээ.