УИХ-ын гишүүн П.Сайнзориг Засгийн газрыг огцруулах санал гаргаж, гарын үсэг цуглуулж эхэлсэн тухай албан бус мэдээлэл түгээд байв. Үүнийг баталгаажуулж тэрбээр сэтгүүлчдэд мэдээлэл хийлээ. 

УИХ-ын гишүүн П.Сайнзориг "Би УИХ-ын гишүүний хүлээсэн тангараг, бүрэн эрхийнхээ хүрээнд Үндсэн хууль зөрчиж, парламентын засаглалд халдаж, эдийн засгийг доройтуулж, ард иргэдийг төөрөгдүүлж, нийгмийг эмх замбараагүй байдал руу түлхэж байгаа Ерөнхий сайд Г.Занданшатарыг огцруулах асуудлыг хөндөж байна.

Ерөнхий сайд 100 хоногт юу амжуулсан тухай мэдээлэл хийсэн. Бид нөхцөл, байдлыг дүгнэсэн. Эдийн засгийн тухай макро тоо, баримт бүгд худлаа. Хүн албан тушаалдаа улайрч болох ч олон нийтийг төөрөгдүүлж болохгүй.

2026 оны төсвийн тухай хуулийн төсөлд Аудитын ерөнхий газраас дүгнэлт өгчээ. Энэ дүгнэлтэд төлбөрийн тэнцэл 492.4 сая ам.долларын алдагдалтай. Шууд хөрөнгө оруулалт 945 сая ам.доллар болж буурсан, тэнцлийн алдагдлыг гадаад өрөөр санхүүжүүлэх эрсдэл байна гэжээ.  

Экспортын гол орлого огцом унаж, валютын цэвэр нөөц хэдийнээ хасах дүн рүү орсон. Тийм ч учраас “Эрдэнэс тавантолгой”-г түшиглэн нэг тэрбум ам.долларын оффтэйк гэрээг дахин шинээр байгуулна гэдэг зүйлийг ярьж байгаа. Үүнийг улсын төсөв дагуулаад оруулж ирсэн. Өмнөх нууцалсан оффтэйк гэрээнүүдийн асуудлаа шийдэж чадаагүй, балаг нь арилаагүй байхад дахиад ийм гэрээ зурна гээд оруулаад ирсэн. Үүнд би санал нийлэхгүй байгаа.

Бүх зүйл болж байгаа мэтээр сошиал дээр рийл шахаж Засгийн газрын ажлыг хийж байгаа нь туйлын харамсалтай.

Хоёрдугаарт, “Эрдэнэс тавантолгой” ХК-ийн худалдан авах журамд хууль бусаар өөрчлөлт орсон. “Чалко”-оос зээл авахаар сэдэж байх шиг байна. Ийм дүр зураг руу явж байгаа. Эдийн засгийн өсөлт 5.6 хувьтай байна.

Төсвийн хөрөнгө оруулалт, санхүүжилт, тендер бүгд зогссон. Эдийн засаг ямархуу хэмжээнд доройтож, элгээр хэвтсэнийг эндээс харж болно. Миний тандсан мэдээллээр төрийн сангийн данс улайсан, цалин тэтгэврээ олгож чадах уу гэдэг ч эргэлзээ рүү орж байгаа. Энийг аргалж оффтэйкээр мөнгө босгож ирнэ гэдэг зүйлийг сэдэж байна. ОУВС-ийн төлөөлөгчид Монголд ажиллаж байгаа. Тэд манай улсын эдийн засгийн нөхцөл байдлыг үнэлээд та хэд үндсэндээ дефолт буюу дампуурлын ирмэгт орсон олон улсын валютын сангийн хөтөлбөрт хамрагдах эсэхээ шийд гэдэг зүйлийг ярьж буй юм билээ. Ийм л нөхцөл байдалтай эдийн засаг болчхоод байхад бүх юм болж байгаа мэтээр сошиал дээр рийл шахаж Засгийн газрын ажлыг хийж байгаа нь туйлын харамсалтай.

Ахмадууд тэтгэврээ, багш нар цалингаа нэмүүлэхээр жагсаж байна, харамсалтай. Энэ нөхцөл байдлыг хэн ч ярихгүй, гар ч уулзахгүй байна. Өргөн хэрэглээний бараа, бүтээгдэхүүний үнэ ямар айхавтар байгаа билээ. 

АМНАТ-тай холбоотой шүгэл үлээсний төлөө намайг маш олон янзаар гүтгэж байна. Би төрийн албанд зарчимтай ажиллах гэж орж ирсэн юм. АМНАТ-ын асуудлыг ярьж эхлэхэд салбарын сайд нь “Энэ удаад л өнгөрөөчих” гэж гуйж байсан. Юу ярина вэ, нийт ард түмэнд хамаатай баялгийг АМНАТ-ын аргачлалыг нь бууруулах замаар хулгайлж байхад УИХ-ын гишүүн би дуугай байж чадахгүй гэж хэлсэн. Харин ч олон нийтийн анхааралд оруулна.

Өмнө нь АМНАТ авч байсан аргачлалууд хүчин төгөлдөр хэвээрээ байгаа. Гэтэл эдгээрийг өөрчлөхгүй, зэрэгцүүлээд дахиад хөнгөлөлттэй үнээр АМНАТ төлөх нөхцөлийг бүрдүүлэх хоёр заалт хийсэн. Аливаа шийдвэр өмнөх шийдвэрээ хүчингүй болгож гардаг шүү дээ. Гэтэл наймаа хийсэн шинжтэй шийдвэр гарсан. 

Засгийн газрын 55 дахь тогтоолыг олоод уншчих хэрэгтэй. Татварын аргачлалыг өөрчлөх замаар хулгай хийж болохгүй. АМНАТ-тай холботой Засгийн газрын шийдвэр наймдугаар сард гарахад 55 сая тонн нүүрс улсын хилээр экспортод гарсан. Цаана нь 30 сая үлдсэн, нийт 85 сая тонн нүүрс зарах төлөвлөгөөтэй байгаа. Үүнээс 30 сая тонн нүүрсний дөрөвний нэг буюу 7.5 сая тонн нүүрсийг биржээр арилжлаа гэхэд 22.5 сая тонн нүүрсийг огт өөр өндөр үнээр зарчхаад үүний зөрүүд АМНАТ тооцохгүй гэдэг тогтоол гаргасан.

22.5 сая тонн нүүрсний тонн тутмыг 1.5 ам.доллароор тооцвол 35 орчим сая ам.доллар. Ингээд бодвол багадаа 200 орчим тэрбум төгрөг алга болчхоод байна. Үүнийг хэлэх нь зөв.  

МАН-ын даргын сунгаа Тусгаар тогтнолын ордноос халиад Төрийн ордонд ороод ирчихсэн, төрийн зовлон болсон. Нуугаад байх юм үгүй. Албан тушаалын шунал гэдэг ямар бохир зүйл байдаг юм бэ. Өгч, авч сурах ёстой биз дээ. Намын хамт олон нь Г.Занданшатарыг Ерөнхий сайд хийгээд үз гэсэн. Боломжгүй юм байна гэдгийг дийлэнх олонх нь сая шийдлээ. Гэтэл үүнийг хүлээн зөвшөөрөхгүй байна. Энэ маргааныг эцэслэх хуулийн бөгөөд улстөрийн шийдэл нь Засгийн газрыг огцруулах юм байна гэж үзэж байгаа. 

Хулгай нуугдсан оффтэйк гэрээнүүдийг ил гаргамаар байна. Энэ гэрээнүүдийг зурж байхад Ерөнхий сайд Г.Занданшатар УИХ-ын дарга байсан. Нууцад авъя гээд сууж байсан хүн нь тэр өөрөө шүү" гэв.