Нийслэл хотод түр зуурын усархаг бороо 17:00 цагт орж эхэлсэн. Цаг уурын байгууллагаас өгсөн мэдээллээр Улаанбаатар хотын төв хэсгээр аадар бороо 17:00-17:45 цагийн хооронд 45 минут орж 12.5 мм хур тунадас оржээ.

НОК-ын шуурхай штабын бүрэлдэхүүн бэлэн байдалд ажиллаж байгаа бөгөөд одоогоор үер устай холбоотой 2 дуудлага мэдээлэл иржээ.

Усархаг бороо үргэлжлэн орох тул мэргэжлийн байгууллагаас өгч буй зөвлөгөөг хэрэгжүүлж үерийн аюулаас сэргийлж, замын хөдөлгөөнд оролцож буй жолооч нар сонор, сэрэмжтэй байхыг НЗДТГ-аас анхаарууллаа.

Энэ сарын 23-27-ныг хүртэлх цаг агаарын урьдчилсан төлөв:

Наймдугаар сарын 23-нд баруун аймгуудын нутгийн зүүн хэсэг, төвийн аймгуудын нутгийн зарим газар, говийн аймгуудын нутгийн баруун хэсгээр, 24-нд Монгол-Алтай, Хэнтийн уулархаг нутаг, говийн бүс нутгийн зүүн хэсэг, Дарьгангын тал нутгаар, 25-нд баруун аймгуудын нутгийн зарим газар, төвийн аймгуудын нутгийн баруун хойд хэсгээр, 26-нд баруун болон говийн аймгуудын нутгийн зарим газар, төвийн аймгуудын ихэнх нутаг, зүүн аймгуудын нутгийн баруун хэсгээр бороо, дуу цахилгаантай аадар бороо, мөндөр орно.

Салхи ихэнх хугацаанд секундэд 5-10 метр, борооны өмнө түр зуур ширүүснэ. Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Тэрэлж голын хөндийгөөр шөнөдөө -2...+3 градус, өдөртөө +13...+18 градус, говийн бүс нутгийн өмнөд хэсгээр шөнөдөө +13...+18 градус, өдөртөө +23...+28 градус, бусад нутгаар шөнөдөө +6…+11 градус, өдөртөө +16...+21 градус дулаан байна. 24-нд нутгийн баруун хагаст, 25-нд нутгийн зүүн хагаст бага зэрэг дулаарна.