Өвөлжилтийн бэлтгэл, арга хэмжээний явцтай танилцах өргөтгөсөн хуралдаан өнөөдөр боллоо. 

Энэ үеэр нийслэл Улаанбаатар хот, бусад төв суурин газрын нийтийн аж ахуйн салбарын бэлтгэл арга хэмжээний талаар Хот байгуулалт, барилга, орон сууцжуулалтын сайд Э.Бат-Амгалан танилцуулахдаа, "2025 оны зургаадугаар сарын 12-ны өдрийн 2025/03 дугаартай “Орон сууц, нийтийн аж ахуйн байгууллагуудын өвөлжилтийн бэлтгэлийг эрчимжүүлэх тухай” албан даалгаврын хүрээнд улсын хэмжээнд орон сууц, нийтийн аж ахуйн ашиглалтын чиглэлээр үйл ажиллагаа явуулж буй 89 байгууллага өвөлжилтийн бэлтгэл ажлын явцыг салбарын яаманд 14 хоног тутам ирүүлж ажиллаж байна.

2025 оны 8 дугаар сарын 12-нд 21 аймгийн Засаг дарга, Ерөнхий архитектор, Газрын харилцаа, БХБ-ын газрын дарга болон салбартай холбоотой удирдлагуудтай хамтран өвөлжилтийн бэлтгэлийн талаар хурал хийж, 2025 оны 10 дугаар сарын 20-ны дотор өвөлжилтийн бэлтгэлийг бүрэн дуусгах чиглэл, үүрэг даалгаврыг өгсөн.

Мөн 8 дугаар сарын 15-17-нд Говьсүмбэр аймаг, Дорноговь аймгийн Замын-Үүд, Сайншанд хотод томилолтоор ажиллаж, өвөлжилтийн бэлтгэл ажлын явц болон улсын, нийслэл, дүүрэг, орон нутгийн төсвийн хөрөнгөөр хэрэгжиж буй ажлуудтай газар дээр нь танилцлаа.

Томилолтын үеэр анхаарал татсан нэг асуудал нь боловсон хүчний хомсдол байлаа. Нарийн мэргэжлийн инженер, технологич, лабораторийн ажилтан, шинжээч нарын дутагдал бий. 

Салбарын 2025-2026 оны өвөлжилтийн бэлтгэлийн хүрээнд нийт 71929 ажлыг 119.8 тэрбум төгрөгөөр санхүүжүүлэхээр төлөвлөснөөс, 2025 оны наймдугаар сарын 14-ний байдлаар 39,736 ажилд 24.8 тэрбум төгрөг зарцуулсан байна. Өөрөөр хэлбэл улсын хэмжээнд өвөлжилтийн бэлтгэл ажил 55 хувийн биелэлттэй байна.

Орон нутгийн 38 байгууллага 57.6 тэрбум төгрөгийн санхүүжилтээр 1430 ажил хийхээр төлөвлөснөөс наймдугаар сарын 14-нд 9.9 тэрбум төгрөг зарцуулан 775 ажлын биелэлтэд хүрсэн буюу мөн 55 хувийн гүйцэтгэлтэй байна.

Мөн аймгийн төвүүдийн нийтийн аж ахуйн байгууллагуудаас ес нь 50 хувиас доош гүйцэтгэлтэй явж буй. Үүнд:

• Сэлэнгэ аймгийн “Цэнгэг ус” компани,
• Хөвсгөл аймгийн “Хөвсгөл ус суваг”,
• Дархан-Уул аймгийн “Дархан ус суваг”,
• Дорноговь аймгийн “Чандмань илч”,
• Говь-Алтай аймгийн “Ундарга-Алтай”,
• Завхан аймгийн “Амь ус трейд”,
• Архангай аймгийн “Ар ус хударга”,
• Сүхбаатар аймгийн “Дөрвөлж”,
• Дундговь аймгийн “Дундговь ус”,
• Баян-Өлгий аймгийн “Суат”,
• Увс аймгийн “Чандмань-Увс”,
• Өмнөговь аймгийн “Гүний ус” компаниуд байна.

Түүнчлэн сумдын хэмжээнд үйл ажиллагаа явуулж буй 17 байгууллагаас 50 хувиас доош гүйцэтгэлтэй байгууллагууд байна. Тухайлбал:

• Сэлэнгэ аймгийн Мандал сумын “Цант-Орхон” (18 хувь),
• Архангай аймгийн Эрдэнэмандал сумын “Эрдэнэмандал хөгжлийн дэд бүтэц” (22 хувь),
• Өмнөговь аймгийн Цогтцэций сумын “Цогтөрнөх” (25 хувь),
• Өвөрхангай аймгийн Хархорин сумын “Хархорин ус суваг” (40 хувь),
• Завхан аймгийн Тосонцэнгэл сумын “Тосоночир хайрхан” (50 хувь).

Улаанбаатар хотод, ОНӨААТҮГ-ын 4 байгууллага, хувийн орон сууцны ашиглалтын 47 байгууллага, хоёр ТББ мэдээгээ ирүүлсэн. Нийслэлд 61.2 тэрбум төгрөгийн санхүүжилтээр 70,499 ажил хийхээс наймдугаар сарын 14-нд 8 тэрбум төгрөг зарцуулж, 38,961 ажлын биелэлт хангагдсан байна. Өөрөөр хэлбэл нийслэлийн өвөлжилтийн бэлтгэл ажил мөн 55 хувийн гүйцэтгэлтэй байна.

Салбарын яамнаас аравдугаар сарын 20-ны дотор улсын хэмжээнд өвөлжилтийн бэлтгэлийг 100 хувь хангах чиглэл өгч ажиллаж буй. 

Цаашид аймгийн Засаг дарга нар шугам сүлжээ, тоног төхөөрөмжийн насжилтыг тодорхойлж, эрсдэлийн үнэлгээ хийж, эрэмбэлж, засвар шинэчлэл хийх, хэвийн ажиллагааг хангах, мөн цаг уурын онцгой нөхцөл байдал, гэнэтийн аваар гарсан тохиолдолд ажиллах нарийвчилсан төлөвлөгөө батлуулж, хэрэгжүүлэх шаардлагатай. Үүнд шаардлагатай аюулгүйн нөөц, сэлбэг материалыг бүрдүүлэх тал дээр дэмжлэг үзүүлэх хэрэгтэй байгааг онцолъё" гэлээ.