Монгол Улсын Засгийн газар болон “Рио Тинто” группийн хооронд Оюу Толгойн хөрөнгө оруулалтын гэрээтэй холбоотой шинэ шатны хэлэлцээр эхэлжээ.

Энэ хүрээнд Засгийн газрыг төлөөлж Сангийн сайд Б.Жавхлан болон Аж үйлдвэр, эрдэс баялгийн сайд Г.Дамдинням нар ажлын хэсгийг ахалж буй. Хэлэлцээрийн гол зорилго нь зээлийн хүүгийн хувь хэмжээг бууруулах, Үндэсний баялгийн санд орж ирэх хөрөнгийн урсгалыг түргэсгэх, мөн компанийн засаглал, ил тод байдлыг сайжруулахад чиглэж байна.

Аж үйлдвэр, эрдэс баялгийн сайд Г.Дамдинням хэлэхдээ, "Сангийн сайд Б.Жавхлан сайд бид хоёр Засгийн газрын, Монгол Улсын талыг төлөөлсөн ажлын хэсгүүдийг ахлаад ажиллаж байна. Бид гурван үндсэн асуудлыг шийдье гэсэн зорилготойгоор хэлэлцээрээ эхэлчихсэн явж байна. 

Нэгдүгээрт, Б.Жавхлан сайдын танилцуулсан зээлийн хүүгийн хувь хэмжээг бууруулах асуудал. Үүний үр дүнд Монголын талын авах үр өгөөж нэмэгдэнэ. Өөрөөр хэлбэл, ногдол ашгаа авах хугацаа наашилна, төслийн үр өгөөж нэмэгдэнэ гэсэн үг.

Хоёрдугаарт, Үндэсний баялгийн санд энэ мөнгө аль болох эрт орж, ард иргэдэд шууд үр өгөөжөө өгөх, Үндсэн хуулийн 6.2 хэрэгжих тухай асуудал. Үүний төлөө бид хэлэлцээр хийж байна.

Мөн энэ хүрээнд менежментийн төлбөрийн асуудал бий. 1.5 тэрбум ам.долларын асуудал. Энэ нь Дубайн гэрээ гэж хүчингүй болсон гэрээн дээр суурилсан гэрээнд хамаарна. Тэнд 6 хувийн шимтгэл байгаа нь олон улсын түвшнээс өндөр үзүүлэлт. Энэ асуудал бас төслийн үр өгөөжтэй холбоотой учраас яригдаж байна.

Хэлэлцээр үргэлжилж байгаа учраас тактикийн нарийн зүйлсийг дэлгэрэнгүй ярих боломжгүй байна.

Гуравдугаарт, энэ бол засаглалын асуудал. Засаглалын асуудал гэдэг нь Монголын талыг төлөөлж байгаа гурван гишүүнээс гадна independent /бие даасан/ буюу чөлөөт төлөөлөлтэй, удирдах зөвлөлийн гишүүнтэй болох тухай асуудал юм. Мөн мэдээлэл ил тод болох тухай, Монголын тал гэрээнд заасны дагуу шууд хориг тавих эрхтэй болох тухай асуудлууд орж байна.

Өөрөөр хэлбэл, компанийн ТУЗ болон гүйцэтгэх удирдлагын түвшний засаглал, ил тод байдал, хяналттай холбоотой асуудлуудыг бид ярина. 

Саяхан, "Оюу Толгой" ХХК дээр худалдан авах ажиллагаанд хулгай, зөрчлийн асуудал яригдсан. Энэ ч бас засаглалын ил тод байдлын асуудал юм.

Энэ гурван хүрээнд бид хэлэлцээр хийж байна. Сайд болон манай багийн зорилго маш тодорхой. Монголын ард түмэнд ээлтэй, сайн шийдвэр гаргах. Засгийн газраас бидэнд тогтоол гаргаж, хэлэлцээрийн хүрээ, хязгаар, удирдамжийг баталсан. Нааштай үр дүн гаргана гэдэгт итгэлтэй байна.

-"Онтрэ" компанитай холбоотой асуудал яригдах уу? 

-"Онтрэ" компанитай холбоотой асуудал энэ хэлэлцээрийн төгсгөлд яригдана. Энэ удаагийн хэлэлцээрийн хүрээнд бид эл компанийн асуудлыг тухайлан ярихгүй. Учир нь "Онтрэ" компанитай холбоотой хоёр лиценз хоёул "Онтрэ" компани дээр байдаг, Рио Тинто-д байдаггүй.

Эхний ээлжид бид төрийн эзэмшлийн 34 хувиа тогтоох, тэр хувиа хэрхэн шилжүүлж авах вэ гэдгээ ярина. Дараа нь тэр хувиа хэрхэн авах вэ гэсэн рояалти хэлбэрээр үү, АМНАТ уу, хөрөнгө оруулалт хэлбэрээр үү, худалдаж авах уу зэрэг нь бүгд дараагийн шатны хэлэлцээрт орно.

Рио Тинтотой энэ асуудлыг одоохондоо ярих эрт байна.

-Хэр удаан үргэлжлэх бол?
-Бид одоогоор Б.Жавхлан сайдтайгаа дөрвөн хоногийн хэлэлцээр хийхээр төлөвлөж буй. Хэрвээ сунавал эхний шат мөн сунана.

Нэг зүйлийг ойлгох ёстой. Бидний хувьд арванхоёрдугаар сарын 31, ирэх нэгдүгээр сарын 31-ны өдөр гэдэг эцсийн хугацаа юм шиг ойлгогдож байгаа. Гэхдээ энэ хугацаа аль хэдийн эхэлчихсэн, асуудалгүй гэсэн зарчим барьж байна" гэлээ.