УИХ дахь МАН-ын бүлгийн өнөөдөр / 2025.11.03/-ийн хуралдаанаар Монгол Улсын 2026 оны төсвийн тухай хуулийг хэлэлцүүлэгт бэлтгэж байгаа ажлын хэсгийн мэдээлэлтэй танилцаж байна.

Боловсрол, эрүүл мэндийн салбарын ажилчин, алба хаагчид цалин нэмэхийг шаардаж байгаа. Монголын багш нарын Үйлдвэрчний эвлэл, БШУЯ, Гэр бүл, Хүний хөгжил, нийгмийн хамгааллын яамтай хэлэлцээрийн ширээний ард суусан. Нийт найман зүйл бүхий цалин урамшуулал нэмэх шаардлага хүргүүлжээ.

Дээрх хэлэлцээрийг үр дүнд хүргэх, цалингийн шатлалыг өсгөх асуудлыг Төсвийн тухай хуулийн ажлын хэсэг амралтын өдрүүдэд ажиллаж, төсвийн санхүүжилтийг шийдэх хоёр хувилбарыг бүлгийн хуралдаанд танилцуулж, улс төрийн шийдэл гаргах санал оруулан хэлэлцэж байна.

Мөн тэтгэвэр, халамжийн тэтгэмжийг нэмэгдүүлэх төсвийн санхүүжилтийг хэрхэн урсгал зардлыг танаж ирэх оны төсөвт суулгах асуудлыг ярилцлаа. Бүлгийн хуралдаан үргэлжилж байна.

УИХ-ын гишүүн С.Эрдэнэбат "Үндсэн цалинг 2.8 сая төгрөг буюу 1.4 сая орчим төгрөгөөр нэмэх зөвшилцөлд хүрсэн байна. Харин 2027 онд 3.5 сая руу оруулах шийдэлд хүрчээ гэж ойлголоо. Үүнийг яг одоо МАН-ын бүлэг ярьж байна, миний хувьд дэмжихээр саналаа өгөөд гарч ирлээ. Шууд 3.5 сая хүргэхэд 3-4 их наяд төгрөг шаардахаар байгаа. Ирэх жил "Боловсролын жил" гэж зарласан бол УИХ улстөрийн шийдвэр гаргах ёстой. 

Хөдөлмөрийн яам хэлэлцээрийг бүртгэж албан ёсоор шийдэх ёстой. Бүлэг шийдчихвэл Хөдөлмөрийн яам бүртгэнэ гэж ойлгосон" гэв.