Засгийн газраас төрийн өмчит компаниудыг иргэдийн хяналтад оруулах, үр ашгийг нэмэгдүүлэх зорилгоор 2026-2028 онд хэрэгжүүлэх үндсэн чиглэлийг Улсын Их Хуралд өргөн мэдүүллээ.

Уг тогтоолын төсөл нь төрийн өмчит хуулийн этгээдийн хувьцааг биржээр дамжуулан олон нийтэд нээлттэй худалдах, хувьчлах болон бүтцийн өөрчлөлт хийх замаар хулгайг таслан зогсооход чиглэж байгаа аж.

Үндсэн чиглэлийн хүрээнд төрийн өмчит 18 компани, үйлдвэрийн газрын төрийн мэдлийн 10-66 хүртэлх хувийн хувьцааг хөрөнгийн биржээр дамжуулан олон нийтэд санал болгож, нээлттэй хувьцаат компани болгоно.

Төрийн өмчит найман компанийн хувьцааг бүхэлд нь худалдаж, долоон төрийн өмчит компани, үйлдвэрийн газрыг нэгтгэх, нийлүүлэх замаар зардлыг хэмнэж, бүтцийн өөрчлөлт хийх юм.