Монгол Улсын Хөдөлмөрийн баатар, Шинжлэх ухааны гавьяат зүтгэлтэн, Шинжлэх Ухааны Академийн жинхэнэ гишүүн, академич Еншөөбү овогт Ринчений Барсболд 2025 оны 8-р сарын 28-ны өдөр өвчний улмаас таалал төгсжээ. 

Р.Барсболд нь 1935 оны 12-р сарын 21-ний өдөр Улаанбаатар хотод нэрт эрдэмтэн Бямбын Ринчений бага хүү болох мэндэлжээ. Тэрбээр 1953-1959 онд Москвагийн Геологи- Хайгуулын дээд сургуулийг Геологич мэргэжлээр суралцан төгсөж, 1969 онд Москва хотноо ЗСБНХУ-ын ШУА-ийн Геологийн хүрээлэнд Геологи-минералогийн ухааны дэд эрдэмтний зэрэг, 1979 онд ШУА-ийн Палеонтологийн хүрээлэнд Биологийн шинжлэх ухааны докторын зэрэг тус тус хамгаалж, 1991 онд Монгол Улсын ШУА-ийн жинхэнэ гишүүн, академичаар сонгогдсон. 

Р.Барсболд нь Монгол Улсын эртний амьтан, ургамлын судалгаа шинжилгээний ажлыг эхлүүлсэн, үлэг гүрвэл судлал, геологи, давхарга зүйн судалгааны салбарт Монголдоо төдийгүй дэлхийд алдартай эрдэмтэн юм.

Нэрт эрдэмтэнд 2024 онд буюу XVII жарны “Хилэнт эх” хэмээх модон луу жилийн Цагаан сарын баярыг тохиолдуулан Монгол Улсын Хөдөлмөрийн баатар цол хүртээсэн билээ.

Ерөнхийлөгч У.Хүрэлсүх Хөдөлмөрийн баатар цол олгохдоо, Эх орондоо палеонтологийн эрдэм судлалын суурийг тавьж, хөгжүүлэх үйлсэд эрдэм мэдлэг, авьяас чадвараа зориулан, үлэг гүрвэлийн судалгааны ажлыг тэргүүлэн ажиллаж, шинжлэх ухааны олон арван өгүүлэл, нийтлэл туурвиж, геологи, ашигт малтмалын салбарыг олон улсад таниулахад оруулсан хувь нэмрийг нь үнэлэн Шинжлэх ухааны академийн Палеонтологийн хүрээлэнгийн зөвлөх, Төрийн шагналт, Шинжлэх ухааны гавьяат зүтгэлтэн, доктор, академич Ринчений Барсболдод хүртээж, “Алтан соёмбо” тэмдэг, Сүхбаатарын одонгоор шагналаа гэсэн юм.