Засгийн газрын хэвлэлийн албаны дарга Д.Баасандамба "Ерөнхий сайд Г.Занданшатар 15.00 цагт ард түмэндээ хандаж мэдэгдэл хийнэ" гэв. 

Ерөнхий сайд ямар асуудлаар мэдээлэл өгөх нь тодорхойгүй байна. Бид та бүхэн Засгийн газрын тэргүүний мэдэгдлийг Төрийн ордноос шууд дамжуулан хүргэнэ.       

Ерөнхий сайд Г.Занданшатар дараах мэдэгдлийг хийв.  

"ЭТТ" ХК-д  онцгой дэглэм тогтоосон. Хяналт шалгалт хийсэн энэ ажлын үр дүнг та бүхэнд танилцуулах гэж байна. Эдийн засгаа сэргээхийн тулд нүүрсний хулгайтай тэмцэхээс бид ажлаа эхлүүлсэн. Би ажлаа авахад төсөв 3.3 их наяд төгрөгөөр тасрах эрсдэл үүссэн байв. Эдийн засгийн өсөлт 2.4 хувь болж унасан.  Учир нь нүүрсний үнэ буурсан.

Би ажлаа эхлүүлэхдээ улсын төсвийг анх удаа 2.2их наядаар хэмнэсэн төсөв боловсруулсан. Өнөөдөр эдийн засаг сэргэсэн. Эдийн засгийн өсөлт 5.7 хувь байна.       

Нүүрсний хулгайтай тэмцэх зорилгоор онцгой дэглэм тогтоосон. Үүний дараа тус компанийн борлуулалт 1.6 дахин, биржийн тээвэр 1.5 дахин, ашиг орлого 3 дахин, олборлолт нэг дахин нэмэгдлээ. Энэ нь тэнд бугшсан нүүрсний хулгайтай холбоотой. 

Валютын нөөц 5.7 тэрбум ам.долларт хүрч, эерэг үзүүлэлтүүд гарч байна.

Гэвч нэг их наяд төгрөгөөр барьсан, нүүрс баяжуулах, нойтон аргын  үйлдвэрийг 18 км-ын цаана барьчихсан. Тээврийн үнэ хоёр дахин буурлаа. 1.5 сая төгрөгөөр тээвэрлэж байсныг бид 400 мянга болгон бууруулав. Би долоодугаар сарын 19-нд очиж ажиллахад ажилчид надад олон мэдээлэл өгсөн. Одоо АТГ энэ асуудлыг шалгаж байна, бүгдийг нь таслан зогсоосон. Нэг их наяд төгрөгөөр барьсан үйлдвэр ашиггүй ажиллаж байна. Учир нь 280 орчим тэрбум төгрөгөөр конвер буюу дамжуурга барих ёстой. Энэ ашиглалтад орох хүртэл үйлдвэр ашиггүй.   

Бор тээгт мөн үйлдвэр барьсан ч ашигладаггүй, бараг л сул зогсож байна. Эдгээр үйлдвэрийг ашигласан бол маш их орлого олох байв. Ийм үрэлгэн, замбараагүй байв. Энэ хулгайг зогсоохын тулд онцгой дэглэм тогтоосон.  

Одоо ЭТТ-н ганцхан орд л эдийн засгийн эргэлтэд ороогүй байгаа нь Бор тээг юм. Энэ ордыг ашиглана гэж улсын төсвийн төсөлд тусгасан. Гурван сарын өмнө нэр дэвшихгүй гэж байсан УИХ-ын дарга энэ тогтоолын төслийг харангуутаа намын даргад нэр дэвшлээ. 

Б.Энхбаяр сайд байхдаа нүүрсний хулгай зохион байгуулсныг та бүхэн санаж байгаа. Залуус гадаа жагсаж, нүүрсний хулгайг зогсоохыг шаардаж байв. Би тухайн үед УИХ-ын дарга нүүрсний хулгайн эсрэг хамтран ажиллана гэж итгэсэн. Нүүрсний хулгайд холбогдсон гэдэгт итгэхийн хүсээгүй. Харамсалтай нь УИХ-ын дарга нэр холбогдсон байв.               

УИХ-ын дарга Д.Амарбаясгалан нүүрсний хэрэгт холбогдсон гэх мэдээллийг би аваад итгэхийг хүсээгүй. Гэвч энэ хэрэгт холбогдсон байв. Би Ерөнхий сайдын хувиар Баттөмөрийн Энхбаярыг Хууль зүй, дотоод хэргийн сайдаар томиллоо гэв.  

Гэрэл зургийг Г.Өнөболд