Монгол улс анх 2005 оноос хүүхдийн мөнгийг олгож эхэлсэн бөгөөд үүнээс хойш хэд хэдэн удаагийн бодлогын өөрчлөлт орж, зөвхөн зорилтот бүлгийг хамруулдаг байсан бол бүх нийтээр хамруулдаг болж өөрчлөгдөн, Ази тивдээ үлгэр жишээ, дэвшилтэт хөтөлбөр болгож чадсан. 

Хүүхдийн мөнгийг бүх хүүхдэд жигд олгох нь тэгш эрх болон үл ялгаварлан гадуурхах зарчмыг хангадаг. Энэ нь хүүхдийн нэр төрийг хүндэтгэж, тэднийг гутаан доромжлох явдлаас зайлсхийх, эрхэд суурилсан нийгмийн хамгааллын арга хэмжээ юм. Хүүхэдтэй өрхүүдэд чиглэсэн тогтмол, сар тутмын орлого нь тэдэнд орлогын баталгаа болж хэрэглээгээ төлөвлөх боломжийг бий болгодог. 

Дэлхийн олон улс орон Хүүхдийн тэтгэмжийн хөтөлбөрийг олон төрлийн аргаар тогтмол хэрэгжүүлсээр байна. Хүүхдийн тэтгэмжийн хөтөлбөрийг анх 1977 оны 04 дүгээр сараас өмнө Их Британийн засгийн газар аавуудын цалингаас суутгадаг байсан татварыг буулгаж, бууруулсан татварын хэмжээг хүүхдүүдэд зориулах байдлаар хэрэгжүүлж эхэлсэн байдаг. 

Түүнчлэн, “UNICEF”-ийн тайланд хүүхдийн мөнгө нь өрхийн орлогыг тогтворжуулах, зарим өрхүүдэд сөрөг арга хэмжээ (хоол хүнс багасгах, боловсрол, эрүүл мэндийн зардал хасах) авч хэрэглэх шаардлагагүй болгоход хувь нэмэр оруулдаг гэсэн дүгнэлтэд хүрч байжээ хэмээн УИХ-ын гишүүн Х.Баасанжаргал өөрийн сошиал хуудаст бичжээ.

Хүүхдийн мөнгөний талаар мэдэх ёстой 10 зүйл

Эх сурвалж: НҮБ-ын Хүүхдийн Сан