Шөнийн тарифын хөнгөлөлт гэж юу вэ?
Монгол Улсын Засгийн газраас агаарын бохирдлыг бууруулах зорилгоор гэр хорооллын айл өрхийн орой, шөнийн цагаар хэрэглэсэн цахилгааны тарифт 2017 оноос хөнгөлөлт үзүүлж эхэлсэн. Шөнийн тарифын хөнгөлөлт нь жил бүрийн 11-р сарын 01-ээс дөрөвдүгээр сарын 01-ний өдрийг хүртэл үргэлжилдэг.

Шөнийн тарифын хөнгөлөлтөд хэн, хэрхэн хамрагдах вэ?
Нийслэл болон аймгийн төв, 10 мянгаас дээш хүн амтай сум, суурин газрын гэр хорооллын айл өрхийн хэрэглэгчид хамрагдах бөгөөд дараах нөхцөлийг хангасан байна. Үүнд:

• Цахилгааны үлдэгдэл төлбөргүй
• Зөвхөн ахуйн хэрэгцээнд болон амьдарч байгаа гэр сууцаа халаах зориулалтаар хэрэглэх
• Цагийн ялгаварт тарифт тоолууртай өрхүүд хамрагдана.

Хэдээс, хэдэн цагийн хооронд хөнгөлөлт тооцогддог вэ?
Оройн 21:00 цагаас өглөөний 09:00 цаг хүртэлх хэрэглэсэн хэрэглээнд шөнийн тарифт хөнгөлөлт үзүүлнэ.

Хөнгөлөлт тооцох хязгаар бий юу?
Хэрэглэгч нь: 220В-ын сүлжээнд холбогдсон бол 1500кВт.ц хүртэлх, 380В-ын сүлжээнд холбогдсон бол 3000кВт.ц хүртэлх хэрэглээг 100%, хязгаараас давсан хэрэглээг 50% хөнгөлнө.

Цахилгааны төлбөрийг хэрхэн тооцоолдог вэ?
Хэрэглэгчийн төлбөрийг тооцохдоо тоолуурын заалтыг үндэслэн өдөр, орой, шөнийн хэрэглээ тус бүрийн нийт хэрэглээнд эзлэх хувийг гаргаж, хувь тус бүрийг хэрэглээний 150кВт.ц, 151-300кВт.ц, 300кВт.ц-ээс дээш гэсэн гурван ангилал бүхий шатлалд тарифаар үржүүлж, нийлбэр дүнг гаргадаг байна.

Эх сурвалж: УБЦТС